21 shlokas
- 1
अथ संध्याम् उपास्ते
atha saṃdhyām upāste
- 2
प्रागस्तमयान्निष्क्रम्योत्तरतो ग्रामस्य पुरस्ताद्वा शुचौ देशे निषद्योपस्पृश्यापाम् अञ्जलिं पूरयित्वा प्रदक्षिणम् आवृत्य
आयाहि विरजे देव्यक्षरे ब्रह्मसंमिते
गायत्रि छन्दसां मातर् इदं ब्रह्म जुषस्व मे
इत्यावाहयति
prāgastamayānniṣkramyottarato grāmasya purastādvā śucau deśe niṣadyopaspṛśyāpām añjaliṃ pūrayitvā pradakṣiṇam āvṛtya
āyāhi viraje devyakṣare brahmasaṃmite
gāyatri chandasāṃ mātar idaṃ brahma juṣasva me
ityāvāhayati
- 3
ओजो ऽसीति जपित्वा कस्ते युनक्तीति योजयित्वा ॐ भूर्भुवः स्वस्तत्सवितुर् इत्य् अष्टौ कृत्वः प्रयुङ्क्त इत्य् आम्नाताः कामा आ देवो यातीति त्रिष्टुभं राजन्यस्य युञ्जत इति जगतीं वैश्यस्य
ojo 'sīti japitvā kaste yunaktīti yojayitvā oṃ bhūrbhuvaḥ svastatsavitur ity aṣṭau kṛtvaḥ prayuṅkta ity āmnātāḥ kāmā ā devo yātīti triṣṭubhaṃ rājanyasya yuñjata iti jagatīṃ vaiśyasya
- 4
उद् उ त्यं जातवेदसमिति द्वे निगद्य कस्ते विमुञ्चतीति विमुच्योदकाञ्जलिम् उत्सृजति
ud u tyaṃ jātavedasamiti dve nigadya kaste vimuñcatīti vimucyodakāñjalim utsṛjati
- 5
एवं प्रातस्तिष्ठन्
evaṃ prātastiṣṭhan
- 6
एतेन धर्मेण द्वादश चतुर्विंशतिं षट्त्रिंशतम् अष्टाचत्वारिंशतं वा वर्षाणि यो ब्राह्मणो राजन्यो वैश्यो वा ब्रह्मचर्यं चरति मुण्डः शिखाजटः सर्वजटो वा मलज्ञुर् अबलः कृशः स्नात्वा स सर्वं विन्दते यत्किंचिन्मनसेच्छतीति
etena dharmeṇa dvādaśa caturviṃśatiṃ ṣaṭtriṃśatam aṣṭācatvāriṃśataṃ vā varṣāṇi yo brāhmaṇo rājanyo vaiśyo vā brahmacaryaṃ carati muṇḍaḥ śikhājaṭaḥ sarvajaṭo vā malajñur abalaḥ kṛśaḥ snātvā sa sarvaṃ vindate yatkiṃcinmanasecchatīti
- 7
एतेन धर्मेण साध्वधीते
etena dharmeṇa sādhvadhīte
- 8
छन्दस्य् अर्थान्बुद्ध्वा स्नास्यन्गां कारयेत्
chandasy arthānbuddhvā snāsyangāṃ kārayet
- 9
आचार्यम् अर्हयेच्छ्रोत्रियः
ācāryam arhayecchrotriyaḥ
- 10
अन्यो वेदपाठी न तस्य स्नानम्
anyo vedapāṭhī na tasya snānam
- 11
आपो हि ष्ठेति तिसृभिर्हिरण्यवर्णाः शुचय इति द्वाभ्यां स्नात्वाहते वाससी परिधत्ते
āpo hi ṣṭheti tisṛbhirhiraṇyavarṇāḥ śucaya iti dvābhyāṃ snātvāhate vāsasī paridhatte
- 12
वस्व् असि वसुमन्तं मा कुरु सौवर्चसाय मा तेजसे ब्रह्मवर्चसाय परिदधामीति परिदधाति
vasv asi vasumantaṃ mā kuru sauvarcasāya mā tejase brahmavarcasāya paridadhāmīti paridadhāti
- 13
यथा द्यौश्च पृथिवी च न बिभीतो न रिष्यतः
एवं मे प्राण मा बिभ एवं मे प्राण मा रिष इत्य् आङ्क्ते
yathā dyauśca pṛthivī ca na bibhīto na riṣyataḥ
evaṃ me prāṇa mā bibha evaṃ me prāṇa mā riṣa ity āṅkte
- 14
हिरण्यम् आबध्नीते
hiraṇyam ābadhnīte
- 15
छत्रं धारयते दण्डं मालां गन्धम्
chatraṃ dhārayate daṇḍaṃ mālāṃ gandham
- 16
प्रतिष्ठे स्थो दैवते द्यावापृथिवी मा मा संताप्तम् इत्य् उपानहौ
pratiṣṭhe stho daivate dyāvāpṛthivī mā mā saṃtāptam ity upānahau
- 17
द्विवस्त्रो ऽत ऊर्ध्वं भवति तस्माच्छोभनं वासो भर्तव्यम् इति श्रुतिः
dvivastro 'ta ūrdhvaṃ bhavati tasmācchobhanaṃ vāso bhartavyam iti śrutiḥ
- 18
आमन्त्र्य गुरून्गुरुवधूश्च स्वान्गृहान्व्रजेत्
āmantrya gurūnguruvadhūśca svāngṛhānvrajet
- 19
प्रतिषिद्धम् अपरया द्वारा निष्क्रमणं मलवद्वाससा सह संवस्त्रणं रजःसुवासिन्या सह शय्या गुरोर्दुरुक्तवचनम् अस्थाने शयनं स्मयनं सरणं स्थानं यानं गानं तस्य चेक्षणम्
pratiṣiddham aparayā dvārā niṣkramaṇaṃ malavadvāsasā saha saṃvastraṇaṃ rajaḥsuvāsinyā saha śayyā gurorduruktavacanam asthāne śayanaṃ smayanaṃ saraṇaṃ sthānaṃ yānaṃ gānaṃ tasya cekṣaṇam
- 20
पौर्णमास्याम् अमावास्यायां वाग्नेयेन पशुना यजेत
paurṇamāsyām amāvāsyāyāṃ vāgneyena paśunā yajeta
- 21
तस्य हविर्भक्षयित्वा यथासुखमत ऊर्ध्वं मधुमांसे प्राश्नीयात्क्षारलवणे च
tasya havirbhakṣayitvā yathāsukhamata ūrdhvaṃ madhumāṃse prāśnīyātkṣāralavaṇe ca

