13 shlokas
- 1
निशायाम् अन्तर्वेद्य् आसीनौ यजमानं पत्नीं च वसतीवरीभिर् अभिपरिहरन्ति
niśāyām antarvedy āsīnau yajamānaṃ patnīṃ ca vasatīvarībhir abhipariharanti
- 2
नादीक्षितं वसतीवरीभिर् अभिपरिहरेयुः
nādīkṣitaṃ vasatīvarībhir abhiparihareyuḥ
- 3
आदाय कुम्भं सव्ये ऽंसे निधाय दक्षिणया द्वारोपनिष्क्रम्य दक्षिणं वेद्यन्तम् अनुपरीत्य दक्षिणस्याम् उत्तरवेदिश्रोण्यां सादयतीन्द्राग्नियोर्भागधेयी स्थेति
ādāya kumbhaṃ savye 'ṃse nidhāya dakṣiṇayā dvāropaniṣkramya dakṣiṇaṃ vedyantam anuparītya dakṣiṇasyām uttaravediśroṇyāṃ sādayatīndrāgniyorbhāgadheyī stheti
- 4
आदाय कुम्भं दक्षिणे ऽंसे निधाय यथेतं प्रतिपरीत्योत्तरया द्वारोपनिष्क्रम्योत्तरं वेद्यन्तम् अनुपरीत्योत्तरस्याम् उत्तरवेदिश्रोण्यां सादयति मित्रावरुणयोर्भागधेयी स्थेति
ādāya kumbhaṃ dakṣiṇe 'ṃse nidhāya yathetaṃ pratiparītyottarayā dvāropaniṣkramyottaraṃ vedyantam anuparītyottarasyām uttaravediśroṇyāṃ sādayati mitrāvaruṇayorbhāgadheyī stheti
- 5
आदाय कुम्भं सव्ये ऽंसे निधाय यथेतं प्रतिपरीत्य पूर्वया द्वारोपनिष्क्रम्याग्नीध्रे सादयति विश्वेषां देवानां भागधेयी स्थ यज्ञे जागृतेति
ādāya kumbhaṃ savye 'ṃse nidhāya yathetaṃ pratiparītya pūrvayā dvāropaniṣkramyāgnīdhre sādayati viśveṣāṃ devānāṃ bhāgadheyī stha yajñe jāgṛteti
- 6
अत्र एता उपवासयति
atra etā upavāsayati
- 7
आह्वयति सुब्रह्मण्यः सुब्रह्मण्यं पितापुत्रीयाम्
āhvayati subrahmaṇyaḥ subrahmaṇyaṃ pitāputrīyām
- 8
ततः पयांसि विशास्ति
या यजमानस्य व्रतधुक्तस्या आशिरं कुरुत या पत्नियै तस्यै दधिग्रहाय या घर्मधुक्तस्यै दधिघर्माय तप्तम् अनातक्तं मैत्रावरुणाय शृतातङ्क्यं कुरुतादित्यग्रहायेति
tataḥ payāṃsi viśāsti
yā yajamānasya vratadhuktasyā āśiraṃ kuruta yā patniyai tasyai dadhigrahāya yā gharmadhuktasyai dadhigharmāya taptam anātaktaṃ maitrāvaruṇāya śṛtātaṅkyaṃ kurutādityagrahāyeti
- 9
यथाचोदितं कुर्वन्ति
yathācoditaṃ kurvanti
- 10
अत्रामिक्षायाः सायंदोहं दोहयति
atrāmikṣāyāḥ sāyaṃdohaṃ dohayati
- 11
हविर्धाने यजमानं जागरयन्ति
प्राग्वंशे पत्नीम्
havirdhāne yajamānaṃ jāgarayanti
prāgvaṃśe patnīm
- 12
आग्नीध्र ऋत्विजो वसन्ति
न सदसि कश्चन वसति
āgnīdhra ṛtvijo vasanti
na sadasi kaścana vasati
- 13
यजमान एवैतां रात्रिं राजानं गोपायतीति विज्ञायते
yajamāna evaitāṃ rātriṃ rājānaṃ gopāyatīti vijñāyate

