10 shlokas
- 1
प्रधिमुखे पुरस्तात्संहिते समावकृत्ते पश्चाद्द्व्यङ्गुल उत्तराधिषवणफलके भवति चतुरङ्गुलं वा
pradhimukhe purastātsaṃhite samāvakṛtte paścāddvyaṅgula uttarādhiṣavaṇaphalake bhavati caturaṅgulaṃ vā
- 2
पुरस्ताद् अंहीयसी भवतः पश्चात्प्रथीयसी
purastād aṃhīyasī bhavataḥ paścātprathīyasī
- 3
द्वौ दक्षिणेनापिदधाति द्वाव् उत्तरेण रक्षोहणौ वलगहनाव् उपदधामि वैष्णवी इति
dvau dakṣiṇenāpidadhāti dvāv uttareṇa rakṣohaṇau valagahanāv upadadhāmi vaiṣṇavī iti
- 4
पर्यूहति रक्षोहणौ वलगहनौ पर्यूहामि वैष्णवी इति
paryūhati rakṣohaṇau valagahanau paryūhāmi vaiṣṇavī iti
- 5
परिस्तृणाति रक्षोहणौ वलगहनौ परिस्तृणामि वैष्णवी इति
paristṛṇāti rakṣohaṇau valagahanau paristṛṇāmi vaiṣṇavī iti
- 6
अभिमन्त्रयते रक्षोहणौ वलगहनौ वैष्णवी इति
abhimantrayate rakṣohaṇau valagahanau vaiṣṇavī iti
- 7
रक्षोहणं त्वा वलगहनं वैष्णवं प्रोक्षामीत्य् अधिषवणचर्म प्रोक्षत्य् आनडुहं रोहितम्
rakṣohaṇaṃ tvā valagahanaṃ vaiṣṇavaṃ prokṣāmīty adhiṣavaṇacarma prokṣaty ānaḍuhaṃ rohitam
- 8
अधिषवणफलकयोर् अधिषवणचर्मास्तृणात्य् उत्तरलोमासेचनवद्रक्षोहा त्वा वलगहा वैष्णवम् आस्तृणामीति
adhiṣavaṇaphalakayor adhiṣavaṇacarmāstṛṇāty uttaralomāsecanavadrakṣohā tvā valagahā vaiṣṇavam āstṛṇāmīti
- 9
तस्मिंश्चतुरो ग्राव्णः सादयत्य् ऊर्ध्वसानून् आहननप्रकारान् उपरं प्रतिष्ठं मध्ये पञ्चमं बृहन्न् असि बृहद्ग्रावा बृहतीम् इन्द्राय वाचं वदेत्य् एकैकम्
tasmiṃścaturo grāvṇaḥ sādayaty ūrdhvasānūn āhananaprakārān uparaṃ pratiṣṭhaṃ madhye pañcamaṃ bṛhann asi bṛhadgrāvā bṛhatīm indrāya vācaṃ vadety ekaikam
- 10
औपरवात्पुरीषाद्दक्षिणस्य हविर्धानस्याग्रेणोपस्तम्भनं चतुःस्रक्तिं खरं करोति यावन्तं पात्रेभ्य आप्तं मन्यते
auparavātpurīṣāddakṣiṇasya havirdhānasyāgreṇopastambhanaṃ catuḥsraktiṃ kharaṃ karoti yāvantaṃ pātrebhya āptaṃ manyate

