13 shlokas
- 1
ओदनसवेन यक्ष्यमाणो भवति स उपकल्पयते रोहितं चर्मानडुहं सुवर्णरजतौ च रुक्मौ शतमानं च प्रवर्तं चतुरो वर्णान्ब्राह्मणं राजन्यं वैश्यं शूद्रं चतुरो रसान्मधु सुरां पयो ऽपश्चत्वारि पात्राणि सौवर्णं राजतं कांस्यं मृन्मयं चतस्रो दक्षिणाः शतमानं हिरण्यं तिसृधन्वम् अष्ट्रां माषैः पूर्णं कमण्डलुं चतुष्टयीः शलाकाः पर्णमय्यौ नैयग्रोध्याव् आश्वत्थ्यौ फाल्गुनपाच्यौ चत्वारि नानावृक्ष्याणि पात्राणि सक्तूंस्त्रीणि दर्भपुञ्जीलान्य् औदुम्बरं द्रोणं चतुःस्रक्ति चतुष्टयीर् अपो दिग्भ्यः संभृताः शतं च रथं च
odanasavena yakṣyamāṇo bhavati sa upakalpayate rohitaṃ carmānaḍuhaṃ suvarṇarajatau ca rukmau śatamānaṃ ca pravartaṃ caturo varṇānbrāhmaṇaṃ rājanyaṃ vaiśyaṃ śūdraṃ caturo rasānmadhu surāṃ payo 'paścatvāri pātrāṇi sauvarṇaṃ rājataṃ kāṃsyaṃ mṛnmayaṃ catasro dakṣiṇāḥ śatamānaṃ hiraṇyaṃ tisṛdhanvam aṣṭrāṃ māṣaiḥ pūrṇaṃ kamaṇḍaluṃ catuṣṭayīḥ śalākāḥ parṇamayyau naiyagrodhyāv āśvatthyau phālgunapācyau catvāri nānāvṛkṣyāṇi pātrāṇi saktūṃstrīṇi darbhapuñjīlāny audumbaraṃ droṇaṃ catuḥsrakti catuṣṭayīr apo digbhyaḥ saṃbhṛtāḥ śataṃ ca rathaṃ ca
- 2
एतेनोपकॢप्तेन रोहिणीम् आयतीम् उपरमति
etenopakḷptena rohiṇīm āyatīm uparamati
- 3
अद्य रोहिण्येति पूर्वाग्निम् अन्ववस्यत्य् उत्तपनीयं शालीनो ऽन्वाहार्यपचनम् आहिताग्निः
adya rohiṇyeti pūrvāgnim anvavasyaty uttapanīyaṃ śālīno 'nvāhāryapacanam āhitāgniḥ
- 4
अथाध्वर्युर् अपररात्र आद्रुत्य संशास्त्य् एकौदनं श्रपयतेति
athādhvaryur apararātra ādrutya saṃśāsty ekaudanaṃ śrapayateti
- 5
तं तथा श्रपयन्ति यथा पुरादित्यस्योदयाच्छृतो भवति
taṃ tathā śrapayanti yathā purādityasyodayācchṛto bhavati
- 6
उद्यता सूर्येण कार्य इति ब्राह्मणम्
udyatā sūryeṇa kārya iti brāhmaṇam
- 7
अथैतम् ओदनं श्रपयित्वाभिघार्योदञ्चम् उद्वासयति
athaitam odanaṃ śrapayitvābhighāryodañcam udvāsayati
- 8
अथैतां पात्रीं निर्णिज्योपस्तीर्य तस्याम् एनम् असंघ्नन्न् इवोद्धरति
athaitāṃ pātrīṃ nirṇijyopastīrya tasyām enam asaṃghnann ivoddharati
- 9
सर्पिरासेचनं कृत्वा प्रभूतम् आज्यम् आनीय
sarpirāsecanaṃ kṛtvā prabhūtam ājyam ānīya
- 10
अथैतांश्चतुरो वर्णान्दक्षिणत उदङ्मुखान् उपवेशयति
athaitāṃścaturo varṇāndakṣiṇata udaṅmukhān upaveśayati
- 11
अथान्वारब्धे यजमाने जुहोति सिंहे व्याघ्र उत या पृदाकाव् इति चतस्रः स्रुवाहुतीः
athānvārabdhe yajamāne juhoti siṃhe vyāghra uta yā pṛdākāv iti catasraḥ sruvāhutīḥ
- 12
हुत्वा हुत्वैव संस्रावैः प्रवर्तम् अभिघारयति राड् असि विराड् असि संराड् असि स्वराड् असीति
hutvā hutvaiva saṃsrāvaiḥ pravartam abhighārayati rāḍ asi virāḍ asi saṃrāḍ asi svarāḍ asīti
- 13
अथैतं प्रवर्तम् अग्रेणाहवनीयं पर्याहृत्य दक्षिणतो निदधाति
athaitaṃ pravartam agreṇāhavanīyaṃ paryāhṛtya dakṣiṇato nidadhāti

