23 shlokas
- 1
अप्तोर्यामेण यक्ष्यमाणो भवति
aptoryāmeṇa yakṣyamāṇo bhavati
- 2
दीक्षते
dīkṣate
- 3
तस्यापरिमिता दीक्षा द्वादशोपसदः
tasyāparimitā dīkṣā dvādaśopasadaḥ
- 4
त्रिवृद्बहिष्पवमानः पञ्चदशं होतुर् आज्यं सप्तदशं मैत्रावरुणस्यैकविंशं ब्राह्मणाच्छंसिनस्त्रिणवम् अच्छावाकस्य
trivṛdbahiṣpavamānaḥ pañcadaśaṃ hotur ājyaṃ saptadaśaṃ maitrāvaruṇasyaikaviṃśaṃ brāhmaṇācchaṃsinastriṇavam acchāvākasya
- 5
त्रयस्त्रिंशो माध्यंदिनः पवमानः
trayastriṃśo mādhyaṃdinaḥ pavamānaḥ
- 6
चतुर्विंशं होतुः पृष्ठं रथंतरं च वैराजं च सामनी अन्यतरेणान्यतरत्परिष्टुवन्ति
caturviṃśaṃ hotuḥ pṛṣṭhaṃ rathaṃtaraṃ ca vairājaṃ ca sāmanī anyatareṇānyataratpariṣṭuvanti
- 7
चतुश्चत्वारिंशं मैत्रावरुणस्य वामदेव्यं च शाक्वरं च सामनी अन्यतरेणान्यतरत्परिष्टुवन्ति
catuścatvāriṃśaṃ maitrāvaruṇasya vāmadevyaṃ ca śākvaraṃ ca sāmanī anyatareṇānyataratpariṣṭuvanti
- 8
अष्टाचत्वारिंशं ब्राह्मणाच्छंसिनो नौधसं च वैरूपं च सामनी अन्यतरेणान्यतरत्परिष्टुवन्ति
aṣṭācatvāriṃśaṃ brāhmaṇācchaṃsino naudhasaṃ ca vairūpaṃ ca sāmanī anyatareṇānyataratpariṣṭuvanti
- 9
एकविंशम् अच्छावाकस्य कालेयं च रैवतं च सामनी अन्यतरेणान्यतरत्परिष्टुवन्ति
ekaviṃśam acchāvākasya kāleyaṃ ca raivataṃ ca sāmanī anyatareṇānyataratpariṣṭuvanti
- 10
तम् एतम् अष्टापृष्ठ इति छन्दोगा आचक्षते
tam etam aṣṭāpṛṣṭha iti chandogā ācakṣate
- 11
त्रिणव आर्भवः पवमानस्त्रयस्त्रिंशम् अग्निष्टोमसामैकविंशान्य् उक्थ्यानि सषोडशिकानि पञ्चदशानीतराणि त्रिवृद्राथंतरः सन्धिः
triṇava ārbhavaḥ pavamānastrayastriṃśam agniṣṭomasāmaikaviṃśāny ukthyāni saṣoḍaśikāni pañcadaśānītarāṇi trivṛdrāthaṃtaraḥ sandhiḥ
- 12
तत्क्षुद्राः पशवो ऽतिसेदुः
tatkṣudrāḥ paśavo 'tiseduḥ
- 13
सोमो वा एतद् अतिरिच्यमान इयाय
somo vā etad atiricyamāna iyāya
- 14
ते देवा अब्रुवन्न् अप्तोर्वा अयम् अत्यरेचि तस्य को याम इति
te devā abruvann aptorvā ayam atyareci tasya ko yāma iti
- 15
तद् अप्तोर्यामस्याप्तोर्यामत्वम्
tad aptoryāmasyāptoryāmatvam
- 16
तस्मा एतान्य् अतिरिक्तस्तोत्राण्य् अवकल्पयांचक्रुस्त्रिवृद्धोतुर्जराबोधीयं पञ्चदशं मैत्रावरुणस्य सौहविषं सप्तदशं ब्राह्मणाच्छंसिन उद्वंशीयम् एकविंशम् अच्छावाकस्य वारवन्तीयम्
tasmā etāny atiriktastotrāṇy avakalpayāṃcakrustrivṛddhoturjarābodhīyaṃ pañcadaśaṃ maitrāvaruṇasya sauhaviṣaṃ saptadaśaṃ brāhmaṇācchaṃsina udvaṃśīyam ekaviṃśam acchāvākasya vāravantīyam
- 17
तद् उ वा आहुर्यद् अच्छावाकचमसम् अनु यज्ञः संतिष्ठेतान्तं यज्ञं गमयेत्
tad u vā āhuryad acchāvākacamasam anu yajñaḥ saṃtiṣṭhetāntaṃ yajñaṃ gamayet
- 18
अथो हान्तं यजमानो गामुकः स्यात्
atho hāntaṃ yajamāno gāmukaḥ syāt
- 19
होत्र एव स्तुवीरन्होतानुशंस्यात्तथा मध्यतो यज्ञः समाधीयत इति
hotra eva stuvīranhotānuśaṃsyāttathā madhyato yajñaḥ samādhīyata iti
- 20
तद् उ वा आहुः सर्वाण्य् एवाश्विनानि स्तुतशस्त्राणि स्युः
tad u vā āhuḥ sarvāṇy evāśvināni stutaśastrāṇi syuḥ
- 21
यद्ध किंच रात्रिम् उपातिरिच्यते सर्वं तद् आश्विनम् इति न्व् एकम्
yaddha kiṃca rātrim upātiricyate sarvaṃ tad āśvinam iti nv ekam
- 22
अथापरं त्रिवृत्पञ्चदशं सप्तदशम् एकविंशम्
athāparaṃ trivṛtpañcadaśaṃ saptadaśam ekaviṃśam
- 23
अथैतेषां देवता अग्निर् इन्द्रो विश्वे देवा विष्णुर् इति
athaiteṣāṃ devatā agnir indro viśve devā viṣṇur iti

