18 shlokas
- 1
अत्रैतद्द्वादशाहं व्रतं चरति
atraitaddvādaśāhaṃ vrataṃ carati
- 2
स यदि प्राङ्वोदङ्वोच्चरति चार्मपक्षीभ्यां क्षौमं वसानः
sa yadi prāṅvodaṅvoccarati cārmapakṣībhyāṃ kṣaumaṃ vasānaḥ
- 3
अथ यदि दक्षिणतः पश्चाद्वा वैयाघ्रीभ्यां वृष्णिवाससं वसानः
atha yadi dakṣiṇataḥ paścādvā vaiyāghrībhyāṃ vṛṣṇivāsasaṃ vasānaḥ
- 4
अथ द्वादशसु व्युष्टासु द्वे स्रुवाहुती जुहोति ये केशिनो नर्त इति द्वाभ्याम्
atha dvādaśasu vyuṣṭāsu dve sruvāhutī juhoti ye keśino narta iti dvābhyām
- 5
अथ प्रोष्ठम् आरोहत्य् आरोह प्रोष्ठं विषहस्व शत्रून् इति
atha proṣṭham ārohaty āroha proṣṭhaṃ viṣahasva śatrūn iti
- 6
अथास्य शिरः प्रमन्दयति यत्सीमन्तं कङ्कतस्ते लिलेखेति
athāsya śiraḥ pramandayati yatsīmantaṃ kaṅkataste lilekheti
- 7
अथास्य केशान्वपति येनावपत्सविता क्षुरेणेति
athāsya keśānvapati yenāvapatsavitā kṣureṇeti
- 8
प्रवपतो ऽनुमन्त्रयते मा ते केशान् अनुगाद्वर्च एतद् इति
pravapato 'numantrayate mā te keśān anugādvarca etad iti
- 9
अथैनान्समुच्चित्य दर्भस्तम्बे निदधाति तेभ्यो निधानं बहुधा व्यैच्छन् इति
athainānsamuccitya darbhastambe nidadhāti tebhyo nidhānaṃ bahudhā vyaicchan iti
- 10
अथैनम् उष्णोदकेनाप्लावयति बलं ते बाहुवोः सविता दधात्विति
athainam uṣṇodakenāplāvayati balaṃ te bāhuvoḥ savitā dadhātviti
- 11
तेन हैतेन मृत्युर् ईजे प्रजानाम् ऐश्वर्यम् आधिपत्यं राज्यं परीयाम् इति
tena haitena mṛtyur īje prajānām aiśvaryam ādhipatyaṃ rājyaṃ parīyām iti
- 12
ततो वै स प्रजानाम् ऐश्वर्यम् आधिपत्यं राज्यं पर्यैत्
tato vai sa prajānām aiśvaryam ādhipatyaṃ rājyaṃ paryait
- 13
यः कामयेत समानानाम् ऐश्वर्यम् आधिपत्यं राज्यं परीयाम् इति स एतेन यज्ञक्रतुना यजेत
yaḥ kāmayeta samānānām aiśvaryam ādhipatyaṃ rājyaṃ parīyām iti sa etena yajñakratunā yajeta
- 14
समानानाम् ऐश्वर्यम् आधिपत्यं राज्यं पर्येति
samānānām aiśvaryam ādhipatyaṃ rājyaṃ paryeti
- 15
अथ हैतेन सुरथः शैब्य ईज आतिष्ठ्यं परमताम् इयाम् इति
atha haitena surathaḥ śaibya īja ātiṣṭhyaṃ paramatām iyām iti
- 16
ततो वै स आतिष्ठ्यं परमताम् ऐत्
tato vai sa ātiṣṭhyaṃ paramatām ait
- 17
यः कामयेतातिष्ठ्यं परमताम् इयाम् इति स एतेन यज्ञक्रतुना यजेत
yaḥ kāmayetātiṣṭhyaṃ paramatām iyām iti sa etena yajñakratunā yajeta
- 18
आतिष्ठ्यं हैव परमताम् एति
ātiṣṭhyaṃ haiva paramatām eti

