10 shlokas
- 1
गोसवेन यक्ष्यमाणो भवति स उपकल्पयते ऽयुतं दक्षिणाः सुवर्णरजतौ च रुक्मौ पर्णमयं पात्रं प्रतिधुग् अभिषेचनाय
gosavena yakṣyamāṇo bhavati sa upakalpayate 'yutaṃ dakṣiṇāḥ suvarṇarajatau ca rukmau parṇamayaṃ pātraṃ pratidhug abhiṣecanāya
- 2
दीक्षते
dīkṣate
- 3
तस्य षड्दीक्षाः षड् उपसदः
tasya ṣaḍdīkṣāḥ ṣaḍ upasadaḥ
- 4
समानम् आभिषेकस्य कालात्
samānam ābhiṣekasya kālāt
- 5
अभिषेकस्य काले यजमानायतने कृष्णाजिनमात्रं वेदेर् अनुद्धतं भवति
abhiṣekasya kāle yajamānāyatane kṛṣṇājinamātraṃ veder anuddhataṃ bhavati
- 6
तद्यजमानं प्राञ्चम् उपवेश्य सुवर्णरजताभ्यां रुक्माभ्यां पर्युपास्य पर्णमये पात्रे प्रतिधुग् आनीय बृहत स्तोत्रं प्रत्यभिषिञ्चति रेवज्जातः सहसा वृद्धः क्षत्राणां क्षत्रभृत्तमो वयोधाः
महान्महित्वे तस्तभानः क्षत्रे राष्ट्रे च जागृहि
प्रजापतेस्त्वा परमेष्ठिनः स्वाराज्येनाभिषिञ्चामि
tadyajamānaṃ prāñcam upaveśya suvarṇarajatābhyāṃ rukmābhyāṃ paryupāsya parṇamaye pātre pratidhug ānīya bṛhata stotraṃ pratyabhiṣiñcati revajjātaḥ sahasā vṛddhaḥ kṣatrāṇāṃ kṣatrabhṛttamo vayodhāḥ
mahānmahitve tastabhānaḥ kṣatre rāṣṭre ca jāgṛhi
prajāpatestvā parameṣṭhinaḥ svārājyenābhiṣiñcāmi
- 7
देवस्य त्वा सवितुः प्रसवे ऽश्विनोर्बाहुभ्यां पूष्णो हस्ताभ्यां सरस्वत्यै वाचो यन्तुर्यन्त्रेण गोसवेनाभिषिञ्चामीति
devasya tvā savituḥ prasave 'śvinorbāhubhyāṃ pūṣṇo hastābhyāṃ sarasvatyai vāco yanturyantreṇa gosavenābhiṣiñcāmīti
- 8
समुन्मृष्टे समुत्क्रोशन्तीति समानम् आ मुखस्य विमार्जनात्
samunmṛṣṭe samutkrośantīti samānam ā mukhasya vimārjanāt
- 9
स एष गोसवः षट्त्रिंशः सर्व उक्थ्य उभयसामायुतदक्षिणः
sa eṣa gosavaḥ ṣaṭtriṃśaḥ sarva ukthya ubhayasāmāyutadakṣiṇaḥ
- 10
पवमाने कण्वरथंतरं कुर्वन्ति
pavamāne kaṇvarathaṃtaraṃ kurvanti

