17 shlokas
- 1
यावद् एवात्राध्वर्युश्चेष्टति तावद् एष प्रतिप्रस्थातौदुम्बरे द्रोणे चतुष्टयीर् अपः समवनीय चतुरो ग्रहान्गृह्णात्य् अपां यो द्रवणे रसस्तम् अहम् अस्मा आमुष्यायणाय तेजसे ब्रह्मवर्चसाय गृह्णामीति पर्णमयेन
yāvad evātrādhvaryuśceṣṭati tāvad eṣa pratiprasthātaudumbare droṇe catuṣṭayīr apaḥ samavanīya caturo grahāngṛhṇāty apāṃ yo dravaṇe rasastam aham asmā āmuṣyāyaṇāya tejase brahmavarcasāya gṛhṇāmīti parṇamayena
- 2
अपां य ऊर्मौ रसस्तम् अहम् अस्मा आमुष्यायणायौजसे वीर्याय गृह्णामीति नैयग्रोधेन
apāṃ ya ūrmau rasastam aham asmā āmuṣyāyaṇāyaujase vīryāya gṛhṇāmīti naiyagrodhena
- 3
अपां यो मध्यतो रसस्तम् अहम् अस्मा आमुष्यायणाय पुष्ट्यै प्रजननाय गृह्णामीत्य् आश्वत्थेन
apāṃ yo madhyato rasastam aham asmā āmuṣyāyaṇāya puṣṭyai prajananāya gṛhṇāmīty āśvatthena
- 4
अपां यो यज्ञियो रसस्तम् अहम् अस्मा आमुष्यायणायायुषे दीर्घायुत्वाय गृह्णामीत्य् औदुम्बरेण
apāṃ yo yajñiyo rasastam aham asmā āmuṣyāyaṇāyāyuṣe dīrghāyutvāya gṛhṇāmīty audumbareṇa
- 5
अथैतद्रोहितं चर्मानडुहं प्राचीनग्रीवम् उत्तरलोमोपस्तृणाति
athaitadrohitaṃ carmānaḍuhaṃ prācīnagrīvam uttaralomopastṛṇāti
- 6
तद्यजमानं प्राञ्चम् उपवेश्य सुवर्णरजताभ्यां रुक्माभ्यां पर्युपास्याभिषिञ्चत्य् अपां यो द्रवणे रसस्तेनाहम् इमम् आमुष्यायणं तेजसे ब्रह्मवर्चसायाभिषिञ्चामीति पर्णमयेन
tadyajamānaṃ prāñcam upaveśya suvarṇarajatābhyāṃ rukmābhyāṃ paryupāsyābhiṣiñcaty apāṃ yo dravaṇe rasastenāham imam āmuṣyāyaṇaṃ tejase brahmavarcasāyābhiṣiñcāmīti parṇamayena
- 7
अपां य ऊर्मौ रसस्तेनाहम् इमम् आमुष्यायणम् ओजसे वीर्यायाभिषिञ्चामीति नैयग्रोधेन
apāṃ ya ūrmau rasastenāham imam āmuṣyāyaṇam ojase vīryāyābhiṣiñcāmīti naiyagrodhena
- 8
अपां यो मध्यतो रसस्तेनाहम् इमम् आमुष्यायणं पुष्ट्यै प्रजननायाभिषिञ्चामीत्य् आश्वत्थेन
apāṃ yo madhyato rasastenāham imam āmuṣyāyaṇaṃ puṣṭyai prajananāyābhiṣiñcāmīty āśvatthena
- 9
अपां यो यज्ञियो रसस्तेनाहम् इमम् आमुष्यायणम् आयुषे दीर्घायुत्वायाभिषिञ्चामीत्य् औदुम्बरेण
apāṃ yo yajñiyo rasastenāham imam āmuṣyāyaṇam āyuṣe dīrghāyutvāyābhiṣiñcāmīty audumbareṇa
- 10
समुन्मृष्टे समुत्क्रोशन्तीति समानम् आ मुखस्य विमार्जनात्
samunmṛṣṭe samutkrośantīti samānam ā mukhasya vimārjanāt
- 11
उत्तरत एतद्धूपायितं शतं तिष्ठति रथश्च
uttarata etaddhūpāyitaṃ śataṃ tiṣṭhati rathaśca
- 12
तद् अभिप्रैत्य् अभिप्रेहि वीरयस्व उग्रश्चेत्ता सपत्नहा
आतिष्ठ मित्रवर्धनस्तुभ्यं देवा अधि ब्रवन्न् इति
tad abhipraity abhiprehi vīrayasva ugraścettā sapatnahā
ātiṣṭha mitravardhanastubhyaṃ devā adhi bravann iti
- 13
अथ रथस्य पक्षसी संमृशत्य् अङ्कौ न्यङ्काव् अभितो रथं याव् इति
atha rathasya pakṣasī saṃmṛśaty aṅkau nyaṅkāv abhito rathaṃ yāv iti
- 14
रथम् आतिष्ठत्य् आतिष्ठ वृत्रहन् इति प्रतिपद्य आयं पृणक्तु रजसी उपस्थम् इत्य् आतः
ratham ātiṣṭhaty ātiṣṭha vṛtrahan iti pratipadya āyaṃ pṛṇaktu rajasī upastham ity ātaḥ
- 15
अथैतच्छतं त्रिः प्रदक्षिणं परियाय पुरस्कृत्यायाति
athaitacchataṃ triḥ pradakṣiṇaṃ pariyāya puraskṛtyāyāti
- 16
तद् अध्वर्यवे ददाति
tad adhvaryave dadāti
- 17
स एष ओदनसवो राज्ञो वा ब्राह्मणस्य वा वैश्यस्य वा पुष्टिकामस्य यज्ञः
sa eṣa odanasavo rājño vā brāhmaṇasya vā vaiśyasya vā puṣṭikāmasya yajñaḥ

