23 shlokas
- 1
या दिव्या आपः पयसा संबभूवुर्या अन्तरिक्ष उत पार्थिवीर्याः
तासां त्वा सर्वासां रुचा अभिषिञ्चामि वर्चसा
yā divyā āpaḥ payasā saṃbabhūvuryā antarikṣa uta pārthivīryāḥ
tāsāṃ tvā sarvāsāṃ rucā abhiṣiñcāmi varcasā
- 2
अभि त्वा वर्चसासिचम्दिव्येन पयसा सह
यथासा राष्ट्रवर्धनस्तथा त्वा सविता करत्
abhi tvā varcasāsicamdivyena payasā saha
yathāsā rāṣṭravardhanastathā tvā savitā karat
- 3
इन्द्रं विश्वा अवीवृधन्समुद्रव्यचसं गिरः
रथीतमं रथीनाम्वाजानां सत्पतिं पतिम्
indraṃ viśvā avīvṛdhansamudravyacasaṃ giraḥ
rathītamaṃ rathīnāmvājānāṃ satpatiṃ patim
- 4
वसवस्त्वा पुरस्ताद् अभिषिञ्चन्तु गायत्रेण छन्दसेति पुरस्तात्
vasavastvā purastād abhiṣiñcantu gāyatreṇa chandaseti purastāt
- 5
एता एव तिस्रो ऽनुद्रुत्य रुद्रास्त्वा दक्षिणतो ऽभिषिञ्चन्तु त्रैष्टुभेन छन्दसेति दक्षिणतः
etā eva tisro 'nudrutya rudrāstvā dakṣiṇato 'bhiṣiñcantu traiṣṭubhena chandaseti dakṣiṇataḥ
- 6
एता एव तिस्रो ऽनुद्रुत्य आदित्यास्त्वा पश्चाद् अभिषिञ्चन्तु जागतेन छन्दसेति पश्चात्
etā eva tisro 'nudrutya ādityāstvā paścād abhiṣiñcantu jāgatena chandaseti paścāt
- 7
एता एव तिस्रो ऽनुद्रुत्य विश्वे त्वा देवा उत्तरतो ऽभिषिञ्चन्त्व् आनुष्टुभेन छन्दसेत्य् उत्तरतः
etā eva tisro 'nudrutya viśve tvā devā uttarato 'bhiṣiñcantv ānuṣṭubhena chandasety uttarataḥ
- 8
एता एव तिस्रो ऽनुद्रुत्य बृहस्पतिस्त्वोपरिष्टाद् अभिषिञ्चतु पाङ्क्तेन छन्दसेत्य् उपरिष्टात्
etā eva tisro 'nudrutya bṛhaspatistvopariṣṭād abhiṣiñcatu pāṅktena chandasety upariṣṭāt
- 9
अथास्योर ऊर्ध्वम् उन्मृज्यते अरुणं त्वा वृकम् उग्रं खजंकरम् इति
athāsyora ūrdhvam unmṛjyate aruṇaṃ tvā vṛkam ugraṃ khajaṃkaram iti
- 10
अथास्य बाहू अनुमार्ष्टि प्र बाहवा सिसृतं जीवसे न इति
athāsya bāhū anumārṣṭi pra bāhavā sisṛtaṃ jīvase na iti
- 11
अथैनाव् उपावहरतीन्द्रस्य ते वीर्यकृतो बाहू उपावहरामीति
athaināv upāvaharatīndrasya te vīryakṛto bāhū upāvaharāmīti
- 12
अत्रास्मै धनुः प्रयच्छति यदि पुरस्ताद् अप्रत्तं भवति
atrāsmai dhanuḥ prayacchati yadi purastād aprattaṃ bhavati
- 13
समुन्मृष्टे समुत्क्रोशन्तीति समानम् आ मुखस्य विमार्जनात्
samunmṛṣṭe samutkrośantīti samānam ā mukhasya vimārjanāt
- 14
उत्तरत एतद्धूपायितं सतं तिष्ठति रथश्च
uttarata etaddhūpāyitaṃ sataṃ tiṣṭhati rathaśca
- 15
तद् अभिप्रैत्य् अभिप्रेहि वीरयस्व उग्रश्चेत्ता सपत्नहा
आ तिष्ठ वृत्रहन्तमस्तुभ्यं देवा अधि ब्रवन् इति
tad abhipraity abhiprehi vīrayasva ugraścettā sapatnahā
ā tiṣṭha vṛtrahantamastubhyaṃ devā adhi bravan iti
- 16
अथ रथस्य पक्षसी संमृशत्य् अङ्कौ न्यङ्काव् अभितो रथं यौ ध्वान्तं वाताग्रम् अनु संचरन्तौ
दूरेहेतिर् इन्द्रियावान्पतत्री ते नो ऽग्नयः पप्रयः पारयन्त्व् इति
atha rathasya pakṣasī saṃmṛśaty aṅkau nyaṅkāv abhito rathaṃ yau dhvāntaṃ vātāgram anu saṃcarantau
dūrehetir indriyāvānpatatrī te no 'gnayaḥ paprayaḥ pārayantv iti
- 17
अथ रथम् उपतिष्ठते नमस्त ऋषे गदेति
atha ratham upatiṣṭhate namasta ṛṣe gadeti
- 18
अथ रश्मीन् आदत्त एवा ब्रह्मन्तवेद् अस्तु तिष्ठा रथे अधि यद्वज्रहस्तः
आ रश्मीन्देव युवसे स्वश्व इति
atha raśmīn ādatta evā brahmantaved astu tiṣṭhā rathe adhi yadvajrahastaḥ
ā raśmīndeva yuvase svaśva iti
- 19
रथम् आतिष्ठत्य् आ तिष्ठ वृत्रहन्रथम् आतिष्ठन्तं परि अनु त्वेन्द्रो मदत्व् इन्द्रं विश्वा अवीवृधन् इत्य् आतः
ratham ātiṣṭhaty ā tiṣṭha vṛtrahanratham ātiṣṭhantaṃ pari anu tvendro madatv indraṃ viśvā avīvṛdhan ity ātaḥ
- 20
अत्र धनुर् अधिज्यं कुरुते परि मा सेन्या घोषास्तन्मे ऽनुमतिर् अनुमन्यताम् इति द्वाभ्याम्
atra dhanur adhijyaṃ kurute pari mā senyā ghoṣāstanme 'numatir anumanyatām iti dvābhyām
- 21
अथैतच्छतं त्रिः प्रदक्षिणं परियाय पुरस्कृत्यायाति
athaitacchataṃ triḥ pradakṣiṇaṃ pariyāya puraskṛtyāyāti
- 22
अत्रास्मै प्रत्यवरोहणत आसन्दीं निदधाति
atrāsmai pratyavarohaṇata āsandīṃ nidadhāti
- 23
तां तथा प्रत्यवरोहति यथा राजसूये तथा
tāṃ tathā pratyavarohati yathā rājasūye tathā

