21 shlokas
- 1
पृथिसवेन यक्ष्यमाणो भवति
pṛthisavena yakṣyamāṇo bhavati
- 2
स उपकल्पयते रोहितं चर्मानडुहं सुवर्णरजतौ च रुक्माव् औदुम्बरं द्रोणं चतुःस्रक्ति चतुष्टयीर् अपो दिग्भ्यः संभृताः
sa upakalpayate rohitaṃ carmānaḍuhaṃ suvarṇarajatau ca rukmāv audumbaraṃ droṇaṃ catuḥsrakti catuṣṭayīr apo digbhyaḥ saṃbhṛtāḥ
- 3
अथ वै ब्राह्मणं भवति
atha vai brāhmaṇaṃ bhavati
- 4
यत्किंच राजसूयम् अनुत्तरवेदीकं तत्सर्वं भवतीति
yatkiṃca rājasūyam anuttaravedīkaṃ tatsarvaṃ bhavatīti
- 5
स आमावास्येन हविषेष्ट्वाष्टाव् अहान्य् आनुमतप्रभृतिभिर् एति सप्तेन्द्रतुरीयप्रभृतिभिः
sa āmāvāsyena haviṣeṣṭvāṣṭāv ahāny ānumataprabhṛtibhir eti saptendraturīyaprabhṛtibhiḥ
- 6
अथ रत्निनां हविर्भिर्यजते
atha ratnināṃ havirbhiryajate
- 7
अथ देवसुवां हविर्भिर्यजते
atha devasuvāṃ havirbhiryajate
- 8
अथैतां चतुर्हविषम् इष्टिं निर्वपत्य् आग्नेयम् अष्टाकपालम् ऐन्द्रम् एकादशकपालं वैश्वदेवं द्वादशकपालं बार्हस्पत्यं चरुम् इति
athaitāṃ caturhaviṣam iṣṭiṃ nirvapaty āgneyam aṣṭākapālam aindram ekādaśakapālaṃ vaiśvadevaṃ dvādaśakapālaṃ bārhaspatyaṃ carum iti
- 9
तस्या असमुदिते यजमानायतने रोहितं चर्मानडुहं प्राचीनग्रीवम् उत्तरलोमोपस्तृणाति
tasyā asamudite yajamānāyatane rohitaṃ carmānaḍuhaṃ prācīnagrīvam uttaralomopastṛṇāti
- 10
तद्यजमानं प्राञ्चम् उपवेश्य सुवर्णरजताभ्यां रुक्माभ्यां पर्युपास्यौदुम्बरे द्रोणे चतुष्टयीर् अपः समवनीयाभिषिञ्चति ये मे पञ्चाशतं ददुर् अश्वानां सधस्तुतिः
द्युमद् अग्ने महि श्रवो बृहत्कृधि मघोनाम्नृवद् अमृत नृणाम्
tadyajamānaṃ prāñcam upaveśya suvarṇarajatābhyāṃ rukmābhyāṃ paryupāsyaudumbare droṇe catuṣṭayīr apaḥ samavanīyābhiṣiñcati ye me pañcāśataṃ dadur aśvānāṃ sadhastutiḥ
dyumad agne mahi śravo bṛhatkṛdhi maghonāmnṛvad amṛta nṛṇām
- 11
देवस्य त्वा सवितुः प्रसवे ऽश्विनोर्बाहुभ्यां पूष्णो हस्ताभ्यां सरस्वत्यै वाचो यन्तुर्यन्त्रेण पृथिसवेनाभिषिञ्चामीति
devasya tvā savituḥ prasave 'śvinorbāhubhyāṃ pūṣṇo hastābhyāṃ sarasvatyai vāco yanturyantreṇa pṛthisavenābhiṣiñcāmīti
- 12
समुन्मृष्टे समुत्क्रोशन्तीति समानम् आ मुखस्य विमार्जनात्
samunmṛṣṭe samutkrośantīti samānam ā mukhasya vimārjanāt
- 13
अथ संसृपां हविर्भिर्यजते
atha saṃsṛpāṃ havirbhiryajate
- 14
अथ पञ्चहविषा दिशाम् अवेष्ट्या यजते
atha pañcahaviṣā diśām aveṣṭyā yajate
- 15
अथोपातीत्य द्विपशुं पशुबन्धं सात्यदूतानां हविर्भिर्यजते
athopātītya dvipaśuṃ paśubandhaṃ sātyadūtānāṃ havirbhiryajate
- 16
अथ पूर्वैः प्रयुजां हविर्भिर्यजते
atha pūrvaiḥ prayujāṃ havirbhiryajate
- 17
अथ पौर्णमासवैमृधाभ्याम् इष्ट्वोत्तरैः प्रयुजां हविर्भिर्यजते
atha paurṇamāsavaimṛdhābhyām iṣṭvottaraiḥ prayujāṃ havirbhiryajate
- 18
अथ देविकाहविर्भिर्यजते
atha devikāhavirbhiryajate
- 19
अथ त्रैधातवीयया यजते
atha traidhātavīyayā yajate
- 20
अथ सौत्रामण्या यजते
atha sautrāmaṇyā yajate
- 21
संतिष्ठते पृथिसवो ऽध्यर्धेन मासेन
saṃtiṣṭhate pṛthisavo 'dhyardhena māsena

