18 shlokas
- 1
तासाम् उक्ता मीमांसा
tāsām uktā mīmāṃsā
- 2
स्वयमृतुयाजम् एवैतद् अहर्भवति
svayamṛtuyājam evaitad aharbhavati
- 3
नैतद् अहर् अन्योन्यस्यर्तुयाजं यजन्ति
naitad ahar anyonyasyartuyājaṃ yajanti
- 4
स यत्राह अध्वर्यू यजतम् इति तद् अध्वर्यू जघनेन हविर्धाने उपविश्य स्वयमृतुयाजं यजतो ये३ यजामहे अश्विनाध्वर्यू आध्वर्यवाद् ऋतुना सोमं पिबताम् अर्वाञ्चम् अद्य यय्यं नृवाहणम्रथं युञ्जाथाम् इह वां विमोचनं पृङ्क्तं हवींषि मधुना हि कं गतम् अथा सोमं पिबतं वाजिनीवसू ऋतुना सोमं पिबताम्वौ३षत् इति
sa yatrāha adhvaryū yajatam iti tad adhvaryū jaghanena havirdhāne upaviśya svayamṛtuyājaṃ yajato ye3 yajāmahe aśvinādhvaryū ādhvaryavād ṛtunā somaṃ pibatām arvāñcam adya yayyaṃ nṛvāhaṇamrathaṃ yuñjāthām iha vāṃ vimocanaṃ pṛṅktaṃ havīṃṣi madhunā hi kaṃ gatam athā somaṃ pibataṃ vājinīvasū ṛtunā somaṃ pibatāmvau3ṣat iti
- 5
स यत्राह गृहपते यजेति तद्गृहपतिर्जघनेन गार्हपत्यम् उपविश्य स्वयमृतुयाजं यजति ये३ यजामहे अग्निं गृहपतिं गार्हपत्यात्सुगृहपतयस्त्वयाग्न इमे सुन्वन्तो यजमानाः स्युः सुगृहपतिस्त्वम् एभिः सुन्वद्भिर्यजमानैः स्या अग्निर्गृहपतिर्गार्हपत्यात् ऋतुना सोमं पिबतु जोष्य् अग्ने समिधं जोष्य् आहुतिम्जोषि ब्रह्म जन्यं जोषि सुष्टुतिं विश्वेभिर्विश्वाꣳ ऋतुना वसो मह उशन्देवाꣳ उशतः पायया हविः ऋतुना सोमं पिबतू वौ३षड् इति
sa yatrāha gṛhapate yajeti tadgṛhapatirjaghanena gārhapatyam upaviśya svayamṛtuyājaṃ yajati ye3 yajāmahe agniṃ gṛhapatiṃ gārhapatyātsugṛhapatayastvayāgna ime sunvanto yajamānāḥ syuḥ sugṛhapatistvam ebhiḥ sunvadbhiryajamānaiḥ syā agnirgṛhapatirgārhapatyāt ṛtunā somaṃ pibatu joṣy agne samidhaṃ joṣy āhutimjoṣi brahma janyaṃ joṣi suṣṭutiṃ viśvebhirviśvām̐ ṛtunā vaso maha uśandevām̐ uśataḥ pāyayā haviḥ ṛtunā somaṃ pibatū vau3ṣaḍ iti
- 6
सांवाशिनम् एतद् अहर्भवति
sāṃvāśinam etad aharbhavati
- 7
उत्तरतो वत्सान्धारयन्ति दक्षिणतो मातॄः
uttarato vatsāndhārayanti dakṣiṇato mātṝḥ
- 8
माहेन्द्रस्य स्तोत्रे ऽन्तरेण सदोहविर्धाने संवाश्य वत्सान्मातृभिः संसृजन्ति
māhendrasya stotre 'ntareṇa sadohavirdhāne saṃvāśya vatsānmātṛbhiḥ saṃsṛjanti
- 9
बध्नन्ति वत्सान्
badhnanti vatsān
- 10
उत्सृजन्ति मातॄः
utsṛjanti mātṝḥ
- 11
माहेन्द्रस्य स्तोत्रम् उपाकरोति
māhendrasya stotram upākaroti
- 12
अथापराह्ण उक्थ्यपर्यायेषु शिल्पानि क्रियन्ते
athāparāhṇa ukthyaparyāyeṣu śilpāni kriyante
- 13
पारुच्छेपीर्होता शंसति
pārucchepīrhotā śaṃsati
- 14
वालखिल्या मैत्रावरुणो विहरति
vālakhilyā maitrāvaruṇo viharati
- 15
वृषाकपिं ब्राह्मणाच्छंसी शंसत्य् एवयामरुतम् अच्छावाकः
vṛṣākapiṃ brāhmaṇācchaṃsī śaṃsaty evayāmarutam acchāvākaḥ
- 16
संतिष्ठते पृष्ठ्यः षडहः
saṃtiṣṭhate pṛṣṭhyaḥ ṣaḍahaḥ
- 17
अहीनसंततिं करोति
ahīnasaṃtatiṃ karoti
- 18
अथ वसतीवरीः परिहृत्य पयांसि विशिष्योपवसन्ति
atha vasatīvarīḥ parihṛtya payāṃsi viśiṣyopavasanti

