11 shlokas
- 1
तेषां प्रसिद्धा दीक्षणीयेष्टिस्तायते
teṣāṃ prasiddhā dīkṣaṇīyeṣṭistāyate
- 2
सकृद् आश्राविते स यत्राह भरतवद् इति तद्गृहपतेर् एवार्षेयं प्रथमं वृणीते ऽथ होतुर् अथात्मनो ऽथ ब्रह्मणो ऽथोद्गातुर् अथ प्रतिप्रस्थातुर् अथ प्रस्तोतुर् अथ प्रशास्तुर् अथ ब्राह्मणाच्छंसिनो ऽच्छावाकस्य सदस्यस्याग्नीधः पोतुर्नेष्टुर्ग्रावस्तुत उन्नेतुः सुब्रह्मण्यस्य प्रतिहर्तुर् अन्ततः
sakṛd āśrāvite sa yatrāha bharatavad iti tadgṛhapater evārṣeyaṃ prathamaṃ vṛṇīte 'tha hotur athātmano 'tha brahmaṇo 'thodgātur atha pratiprasthātur atha prastotur atha praśāstur atha brāhmaṇācchaṃsino 'cchāvākasya sadasyasyāgnīdhaḥ poturneṣṭurgrāvastuta unnetuḥ subrahmaṇyasya pratihartur antataḥ
- 3
ब्रह्मण्वद् इति समानम्
brahmaṇvad iti samānam
- 4
ते सर्व एव दीक्षाहुतिषु समन्वारभन्ते
te sarva eva dīkṣāhutiṣu samanvārabhante
- 5
गृहपतिम् एवाध्वर्युर् उच्चैः कृष्णाजिने वाचयति
gṛhapatim evādhvaryur uccaiḥ kṛṣṇājine vācayati
- 6
तद् एवेतरे ऽनुनिक्रामन्ति
tad evetare 'nunikrāmanti
- 7
अपि वान्योन्यं वाचयन्ति यद्य् अधीयन्तो भवन्ति
api vānyonyaṃ vācayanti yady adhīyanto bhavanti
- 8
ते यथोत्साहं व्रतदुघम् उपयन्त्य् एकैकां वा बह्वीर्वा
te yathotsāhaṃ vratadugham upayanty ekaikāṃ vā bahvīrvā
- 9
तेषां यथैव प्रवरानुपूर्व्यम् एवं घर्मोच्छिष्टे ऽतिग्राह्यभक्षेषु षोडशिनि
teṣāṃ yathaiva pravarānupūrvyam evaṃ gharmocchiṣṭe 'tigrāhyabhakṣeṣu ṣoḍaśini
- 10
षष्ठ्याम् उपसद्य् उत्तरवेदिं संनिवपन्ति यद्य् अनग्निचित्यो भवति
ṣaṣṭhyām upasady uttaravediṃ saṃnivapanti yady anagnicityo bhavati
- 11
अथ यदि साग्निचित्यः प्रथमायाम् एवोपसद्य् उत्तरवेदिं संनिवपन्ति
atha yadi sāgnicityaḥ prathamāyām evopasady uttaravediṃ saṃnivapanti

