19 shlokas
- 1
द्वादशाहेन यक्ष्यमाणो भवत्य् एको वा बहवो वा
dvādaśāhena yakṣyamāṇo bhavaty eko vā bahavo vā
- 2
उतो ह्य् एको दक्षिणावता यजते
uto hy eko dakṣiṇāvatā yajate
- 3
स यद्य् एको यदि बहवो ऽमावास्याया एव षडहेनोपरिष्टाद्दीक्षन्ते
sa yady eko yadi bahavo 'māvāsyāyā eva ṣaḍahenopariṣṭāddīkṣante
- 4
ते गृहपतेर् अरण्योः संजानते पृथग्वा
te gṛhapater araṇyoḥ saṃjānate pṛthagvā
- 5
ते यदि गृहपतेर् अरण्योः संजानते मथित्वा गार्हपत्यम् आहवनीयम् उद्धरन्ति
te yadi gṛhapater araṇyoḥ saṃjānate mathitvā gārhapatyam āhavanīyam uddharanti
- 6
ग्रामाद्व्रतश्रपणम् आहरन्ति
grāmādvrataśrapaṇam āharanti
- 7
यद्य् उ वै पृथक्संजानते गृहपतिर् एव प्रथमो मन्थते
yady u vai pṛthaksaṃjānate gṛhapatir eva prathamo manthate
- 8
तद् एवेतरे पर्युपविश्य मथित्वा मथित्वैव गार्हपत्यं संनिवपन्ति
tad evetare paryupaviśya mathitvā mathitvaiva gārhapatyaṃ saṃnivapanti
- 9
तस्माद् एकवद्भूताद् आहवनीयम् उद्धरन्ति
tasmād ekavadbhūtād āhavanīyam uddharanti
- 10
ग्रामाद्व्रतश्रपणान् आहृत्य संनिवपन्ति
grāmādvrataśrapaṇān āhṛtya saṃnivapanti
- 11
अथ यदि पश्चाद् अपर आगच्छति मथित्वैव गार्हपत्ये ऽर्धं निवपत्य् आहवनीये ऽर्धं ग्रामाद्व्रतश्रपणम् आहृत्याप्यर्जति
atha yadi paścād apara āgacchati mathitvaiva gārhapatye 'rdhaṃ nivapaty āhavanīye 'rdhaṃ grāmādvrataśrapaṇam āhṛtyāpyarjati
- 12
उपो एनं पूर्वेषु कर्मसु ह्वयन्ते
upo enaṃ pūrveṣu karmasu hvayante
- 13
अथातः पवनस्यैव मीमांसा
athātaḥ pavanasyaiva mīmāṃsā
- 14
गृहपतिम् एवाध्वर्युः प्रथमं पवयत्य् अथ होतारम् अथ ब्रह्माणम् अथोद्गातारम्
gṛhapatim evādhvaryuḥ prathamaṃ pavayaty atha hotāram atha brahmāṇam athodgātāram
- 15
प्रतिप्रस्थाताध्वर्युं पवयति प्रस्तोतारं प्रशास्तारं ब्राह्मणाच्छंसिनम्
pratiprasthātādhvaryuṃ pavayati prastotāraṃ praśāstāraṃ brāhmaṇācchaṃsinam
- 16
आग्नीध्रः प्रतिप्रस्थातारं पवयत्य् अच्छावाकं नेष्टारं पोतारं सदस्यम्
āgnīdhraḥ pratiprasthātāraṃ pavayaty acchāvākaṃ neṣṭāraṃ potāraṃ sadasyam
- 17
उन्नेताग्नीध्रं पवयति ग्रावस्तुतं सुब्रह्मण्यं प्रतिहर्तारम् आत्मानम् अन्ततः
unnetāgnīdhraṃ pavayati grāvastutaṃ subrahmaṇyaṃ pratihartāram ātmānam antataḥ
- 18
ते चेद्ब्रूयुर् अध्वर्युर्वाव सर्वस्य पवयिता स नः सर्वान्पवयत्व् इति स एवैनान्सर्वान्पवयति
te cedbrūyur adhvaryurvāva sarvasya pavayitā sa naḥ sarvānpavayatv iti sa evainānsarvānpavayati
- 19
अपि वान्योन्यं पवयन्ति यद्य् अधीयन्तो भवन्ति
api vānyonyaṃ pavayanti yady adhīyanto bhavanti

