11 shlokas
- 1
यो अप्स्व् अन्तर् अग्निर्यो वृत्रे यः पुरुषे यो अश्मनि
य आविवेश भुवनानि विश्वा तेभ्यो अग्निभ्यो हुतम् अस्त्व् एतत्
यः सोमे अन्तर्यो गोष्व् अन्तर्वयांसि य आविवेश यो मृगेषु
य आविवेश द्विपदो यश्चतुष्पदस्तेभ्यो अग्निभ्यो हुतम् अस्त्व् एतत्
पृष्टो दिवीत्य् एषा
येनेन्द्रस्य रथं संबभूवुर्यो वैश्वानर उत वैश्वदेव्यः
धीरो यः शक्रः परिभूर् अदाभ्यस्तेभ्यो अग्निभ्यो हुतम् अस्त्व् एतत्
यं हुतादम् अग्निं यम् उ कामम् आहुर्यं दातारं प्रतिग्रहीतारम् आहुः
यो देवानां देवतमस्तपोजास्तेभ्यो अग्निभ्यो हुतम् अस्त्व् एतत्
उक्षान्नाय वशान्नायेत्य् एताभिः षड्भिश्चितिं चितिम् उपधायाभिजुहोति
yo apsv antar agniryo vṛtre yaḥ puruṣe yo aśmani
ya āviveśa bhuvanāni viśvā tebhyo agnibhyo hutam astv etat
yaḥ some antaryo goṣv antarvayāṃsi ya āviveśa yo mṛgeṣu
ya āviveśa dvipado yaścatuṣpadastebhyo agnibhyo hutam astv etat
pṛṣṭo divīty eṣā
yenendrasya rathaṃ saṃbabhūvuryo vaiśvānara uta vaiśvadevyaḥ
dhīro yaḥ śakraḥ paribhūr adābhyastebhyo agnibhyo hutam astv etat
yaṃ hutādam agniṃ yam u kāmam āhuryaṃ dātāraṃ pratigrahītāram āhuḥ
yo devānāṃ devatamastapojāstebhyo agnibhyo hutam astv etat
ukṣānnāya vaśānnāyety etābhiḥ ṣaḍbhiścitiṃ citim upadhāyābhijuhoti
- 2
अग्ने भूरीणीत्य् आग्नेय्या धामच्छदा चितिं चितिम् उपधायाभिजुहोति
agne bhūrīṇīty āgneyyā dhāmacchadā citiṃ citim upadhāyābhijuhoti
- 3
उपतिष्ठत इत्य् एके
upatiṣṭhata ity eke
- 4
आग्नेय्या गायत्र्या प्रथमां चितिम् अभिमृशेद् इत्य् उक्तम्
āgneyyā gāyatryā prathamāṃ citim abhimṛśed ity uktam
- 5
अग्ने देवाꣳ इहा वह जज्ञानो वृक्तबर्हिषे
असि होता न ईड्यः
अगन्म महा मनसा यविष्ठं यो दीदाय समिद्धः स्वे दुरोणे
चित्रभानू रोदसी अन्तरुर्वी स्वाहुतं विश्वतः प्रत्यञ्चम्
मेधाकारं विदथस्य प्रसाधनम् अग्निं होतारं परिभूतमं मतिम्
त्वाम् अर्भस्य हविषः समानम् इत्त्वां महो वृणते नरो नान्यं त्वत्
मनुष्वत्त्वा निधीमहि मनुष्वत्समिधीमहि
अग्ने मनुष्वद् अङ्गिरो देवान्देवायते यज
अग्निर्हि वाजिनं विशे ददाति विश्वचर्षणिः
अग्नी राये स्वाभुवं स प्रीतो याति वार्यम् इषं स्तोतृभ्य आ भरेत्य् एता आम्नाता भवन्ति
agne devām̐ ihā vaha jajñāno vṛktabarhiṣe
asi hotā na īḍyaḥ
aganma mahā manasā yaviṣṭhaṃ yo dīdāya samiddhaḥ sve duroṇe
citrabhānū rodasī antarurvī svāhutaṃ viśvataḥ pratyañcam
medhākāraṃ vidathasya prasādhanam agniṃ hotāraṃ paribhūtamaṃ matim
tvām arbhasya haviṣaḥ samānam ittvāṃ maho vṛṇate naro nānyaṃ tvat
manuṣvattvā nidhīmahi manuṣvatsamidhīmahi
agne manuṣvad aṅgiro devāndevāyate yaja
agnirhi vājinaṃ viśe dadāti viśvacarṣaṇiḥ
agnī rāye svābhuvaṃ sa prīto yāti vāryam iṣaṃ stotṛbhya ā bharety etā āmnātā bhavanti
- 6
षड् उपसदः
ṣaḍ upasadaḥ
- 7
द्व्यहं द्व्यहम् एकैकेनोपसन्मन्त्रेण जुहोति
dvyahaṃ dvyaham ekaikenopasanmantreṇa juhoti
- 8
अनूपसदम् अग्निं चिनोति द्व्यहम्
anūpasadam agniṃ cinoti dvyaham
- 9
उत्तमा चितिः
uttamā citiḥ
- 10
त्रीणि चतुस्तनानि व्रतानि
त्रीणि त्रिस्तनानि
त्रीणि द्विस्तनानि
एकम् एकस्तनम्
trīṇi catustanāni vratāni
trīṇi tristanāni
trīṇi dvistanāni
ekam ekastanam
- 11
आपराह्णिकीभ्यां प्रचर्य श्वेतम् अश्वं परिणीय वसन्ति वसन्ति
āparāhṇikībhyāṃ pracarya śvetam aśvaṃ pariṇīya vasanti vasanti

