8 shlokas
- 1
ऋतं च स्थ सत्यं च स्थ देवस्य वः सवितुः प्रसवे मधुमतीः सादयामि
चक्षुषे वाम्
मन्दरा स्थाभिभुवो विश्वेषां वो देवानां देवताभिर्गृह्णामि
सपत्नघ्नीश्च स्थाभिमातिघ्नीश्च स्थ देवस्य वः सवितुः प्रसवे मधुमतीः सादयामि
रेतसे वाम्
अधिपति स्थौजस्वान् आदित्यानां वो देवानां देवताभिर्गृह्णामि
रक्षोघ्नीश्च स्थारातिघ्नीश्च स्थ देवस्य वः सवितुः प्रसवे मधुमतीः सादयामि
प्रजाभ्यो वाम्
क्षत्रभृत स्थौजस्विनीर्मित्रावरुणयोर्वो ब्रह्मणा देवताभिर्गृह्णामि
वसु च स्थ वामं च स्थ देवस्य वः सवितुः प्रसवे मधुमतीः सादयामि
तेजसे वाम्
व्रजक्षित स्थोर्ध्वश्रितो बृहस्पतेर्वो ब्रह्मणा देवताभिर्गृह्णामि
भूतं च स्थ भव्यं च स्थ देवस्य वः सवितुः प्रसवे मधुमतीः सादयामि
वर्चसे वाम् इति कुम्भेष्टकानां ग्रहणसादनप्रत्यसनाः
ṛtaṃ ca stha satyaṃ ca stha devasya vaḥ savituḥ prasave madhumatīḥ sādayāmi
cakṣuṣe vām
mandarā sthābhibhuvo viśveṣāṃ vo devānāṃ devatābhirgṛhṇāmi
sapatnaghnīśca sthābhimātighnīśca stha devasya vaḥ savituḥ prasave madhumatīḥ sādayāmi
retase vām
adhipati sthaujasvān ādityānāṃ vo devānāṃ devatābhirgṛhṇāmi
rakṣoghnīśca sthārātighnīśca stha devasya vaḥ savituḥ prasave madhumatīḥ sādayāmi
prajābhyo vām
kṣatrabhṛta sthaujasvinīrmitrāvaruṇayorvo brahmaṇā devatābhirgṛhṇāmi
vasu ca stha vāmaṃ ca stha devasya vaḥ savituḥ prasave madhumatīḥ sādayāmi
tejase vām
vrajakṣita sthordhvaśrito bṛhaspatervo brahmaṇā devatābhirgṛhṇāmi
bhūtaṃ ca stha bhavyaṃ ca stha devasya vaḥ savituḥ prasave madhumatīḥ sādayāmi
varcase vām iti kumbheṣṭakānāṃ grahaṇasādanapratyasanāḥ
- 2
हिरण्यवर्णा इत्य् उपहिता अभिमन्त्रयते
hiraṇyavarṇā ity upahitā abhimantrayate
- 3
दिवि श्रयस्वेति बार्हस्पत्यं नैवारं पयसि चरुं मध्ये कुम्भेष्टकानाम् उपदधाति
divi śrayasveti bārhaspatyaṃ naivāraṃ payasi caruṃ madhye kumbheṣṭakānām upadadhāti
- 4
सम् अन्या यन्तीत्य् एषा
हिरण्यवर्णः स हिरण्यसंदृग् अपां पतिः सेद् उ हिरण्यवर्णः
हिरण्ययात्परि योनेर्निषद्या हिरण्यदा ददत्य् अन्नम् अस्मा इत्य् एताभ्यां च नैवारम्
sam anyā yantīty eṣā
hiraṇyavarṇaḥ sa hiraṇyasaṃdṛg apāṃ patiḥ sed u hiraṇyavarṇaḥ
hiraṇyayātpari yonerniṣadyā hiraṇyadā dadaty annam asmā ity etābhyāṃ ca naivāram
- 5
त्रिवृत्ते अग्ने शिरस्तन्मे अग्ने शिरः
पञ्चदशौ ते अग्ने बाहू तौ मे अग्ने बाहू
सप्तदशस्ते अग्न आत्मा स मे अग्न आत्मा
एकविंशौ ते अग्ने ऊरू तौ मे अग्ने ऊरू
त्रिणवौ ते अग्ने अष्ठीवन्तौ तौ मे अग्ने अष्ठीवन्तौ
त्रयस्त्रिंशं ते अग्ने प्रतिष्ठानं तन्मे अग्ने प्रतिष्ठानम् इत्य् एताः शिरसि पक्षयोर्मध्ये पुच्छे वोपदधाति
trivṛtte agne śirastanme agne śiraḥ
pañcadaśau te agne bāhū tau me agne bāhū
saptadaśaste agna ātmā sa me agna ātmā
ekaviṃśau te agne ūrū tau me agne ūrū
triṇavau te agne aṣṭhīvantau tau me agne aṣṭhīvantau
trayastriṃśaṃ te agne pratiṣṭhānaṃ tanme agne pratiṣṭhānam ity etāḥ śirasi pakṣayormadhye pucche vopadadhāti
- 6
त्रिवृत्ते अग्ने शिरस्तेन मा पाहीति संनमयंस्तां ताम् उपतिष्ठते यजमानः
trivṛtte agne śirastena mā pāhīti saṃnamayaṃstāṃ tām upatiṣṭhate yajamānaḥ
- 7
त्वाम् अग्ने वृषभम् इत्य् ऋषभम् उपधाय लोकं पृण ता अस्य सूददोहस इत्य् अविशिष्टम् अपरिमिताभिर्लोकंपृणाभिः प्रच्छादयति
tvām agne vṛṣabham ity ṛṣabham upadhāya lokaṃ pṛṇa tā asya sūdadohasa ity aviśiṣṭam aparimitābhirlokaṃpṛṇābhiḥ pracchādayati
- 8
सर्वान्वर्णान् इष्टकानां कुर्याद् इति
sarvānvarṇān iṣṭakānāṃ kuryād iti

