18 shlokas
- 1
गृहस्थो विनीतक्रोधहर्षो गुरुणानुज्ञातः स्नात्वासमानार्षेयाम् अस्पृष्टमैथुनाम् अवरवयसीं सदृशीं भार्यां विन्देत
gṛhastho vinītakrodhaharṣo guruṇānujñātaḥ snātvāsamānārṣeyām aspṛṣṭamaithunām avaravayasīṃ sadṛśīṃ bhāryāṃ vindeta
- 2
पञ्चमीं मातृबन्धुभ्यः सप्तमीं पितृबन्धुभ्यः
pañcamīṃ mātṛbandhubhyaḥ saptamīṃ pitṛbandhubhyaḥ
- 3
वैवाह्यम् अग्निम् इन्धीत
vaivāhyam agnim indhīta
- 4
सायम् आगतम् अतिथिं नापरुन्ध्यात्
sāyam āgatam atithiṃ nāparundhyāt
- 5
नास्यानश्नन्गृहे वसेत्
nāsyānaśnangṛhe vaset
- 6
यस्य नाश्नाति वासार्थी ब्राह्मणो गृहम् आगतः
सुकृतं तस्य यत्किंचित्सर्वम् आदाय गच्छति
yasya nāśnāti vāsārthī brāhmaṇo gṛham āgataḥ
sukṛtaṃ tasya yatkiṃcitsarvam ādāya gacchati
- 7
एकरात्रं तु निवसन्न् अतिथिर्ब्राह्मणः स्मृतः
अनित्यं हि स्थितो यस्मात्तस्माद् अतिथिर् उच्यते
ekarātraṃ tu nivasann atithirbrāhmaṇaḥ smṛtaḥ
anityaṃ hi sthito yasmāttasmād atithir ucyate
- 8
नैकग्रामीण अतिथिर्विप्रः साङ्गतिकस्तथा
काले प्राप्ते अकाले वा नास्यानश्नन्गृहे वसेत्
naikagrāmīṇa atithirvipraḥ sāṅgatikastathā
kāle prāpte akāle vā nāsyānaśnangṛhe vaset
- 9
श्रद्धाशीलो ऽस्पृहयालुर् अलम् अग्न्याधेयाय नानाहिताग्निः स्यात्
śraddhāśīlo 'spṛhayālur alam agnyādheyāya nānāhitāgniḥ syāt
- 10
अलं च सोमाय नासोमयाजी
alaṃ ca somāya nāsomayājī
- 11
युक्तः स्वाध्याये यज्ञे प्रजनने च
yuktaḥ svādhyāye yajñe prajanane ca
- 12
गृहेष्व् अभ्यागतं प्रत्युत्थानासनवाक्सूनृतानसूयाभिर्महयेत्
gṛheṣv abhyāgataṃ pratyutthānāsanavāksūnṛtānasūyābhirmahayet
- 13
यथाशक्ति चान्नेन सर्वाणि भूतानि
yathāśakti cānnena sarvāṇi bhūtāni
- 14
गृहस्थ एव यजते गृहस्थस्तप्यते तपः
चतुर्णाम् आश्रमाणां तु गृहस्थश्च विशिष्यते
gṛhastha eva yajate gṛhasthastapyate tapaḥ
caturṇām āśramāṇāṃ tu gṛhasthaśca viśiṣyate
- 15
यथा नदीनदाः सर्वे समुद्रे यान्ति संस्थितिम्
एवम् आश्रमिणः सर्वे गृहस्थे यान्ति संस्थितिम्
yathā nadīnadāḥ sarve samudre yānti saṃsthitim
evam āśramiṇaḥ sarve gṛhasthe yānti saṃsthitim
- 16
यथा मातरम् आश्रित्य सर्वे जीवन्ति जन्तवः
एवं गृहस्थम् आश्रित्य सर्वे जीवन्ति भिक्षुकाः
yathā mātaram āśritya sarve jīvanti jantavaḥ
evaṃ gṛhastham āśritya sarve jīvanti bhikṣukāḥ
- 17
नित्योदकी नित्ययज्ञोपवीती नित्यस्वाध्यायी पतितान्नवर्जी
ऋतौ च गच्छन्विधिवच्च जुह्वन्न ब्राह्मणश्च्यवते ब्रह्मलोकात्
nityodakī nityayajñopavītī nityasvādhyāyī patitānnavarjī
ṛtau ca gacchanvidhivacca juhvanna brāhmaṇaścyavate brahmalokāt
- 18
ब्रह्मलोकाद् इति
brahmalokād iti

