48 shlokas
- 1
अनभिसंधिकृते प्रायश्चित्तम् अपराधे
anabhisaṃdhikṛte prāyaścittam aparādhe
- 2
अभिसंधिकृते ऽप्य् एके
abhisaṃdhikṛte 'py eke
- 3
गुरुर् आत्मवतां शास्ता शास्ता राजा दुरात्मनाम्
अथ प्रच्छन्नपापानां शास्ता वैवस्वतो यम इति
gurur ātmavatāṃ śāstā śāstā rājā durātmanām
atha pracchannapāpānāṃ śāstā vaivasvato yama iti
- 4
तत्र च सूर्याभ्युदितः सन्न् अहस्तिष्ठेत्सावित्रीं च जपेत्
tatra ca sūryābhyuditaḥ sann ahastiṣṭhetsāvitrīṃ ca japet
- 5
एवं सूर्याभिनिर्मुक्तो रात्रावासीत
evaṃ sūryābhinirmukto rātrāvāsīta
- 6
कुनखी श्यावदन्तस्तु कृच्छ्रं द्वादशरात्रं चरेत्
kunakhī śyāvadantastu kṛcchraṃ dvādaśarātraṃ caret
- 7
परिवित्तिः कृच्छ्रं द्वादशरात्रं चरित्वा निविशेत तां चैवोपयच्छेत्
parivittiḥ kṛcchraṃ dvādaśarātraṃ caritvā niviśeta tāṃ caivopayacchet
- 8
अथ परिविविदानः कृच्छ्रातिकृच्छ्रौ चरित्वा तस्मै दत्त्वा पुनर्निविशेत तां चैवोपयच्छेत्
atha parivividānaḥ kṛcchrātikṛcchrau caritvā tasmai dattvā punarniviśeta tāṃ caivopayacchet
- 9
अग्रेदिधिषूपतिः कृच्छ्रं द्वादशरात्रं चरित्वा निविशेत तां चोपयच्छेत्
agredidhiṣūpatiḥ kṛcchraṃ dvādaśarātraṃ caritvā niviśeta tāṃ copayacchet
- 10
दिधिषूपतिः कृच्छ्रातिकृच्छ्रौ चरित्वा तस्मै दत्त्वा पुनर्निविशेत्
didhiṣūpatiḥ kṛcchrātikṛcchrau caritvā tasmai dattvā punarniviśet
- 11
वीरहणं परस्ताद्वक्ष्यामः
vīrahaṇaṃ parastādvakṣyāmaḥ
- 12
ब्रह्मोज्झः कृच्छ्रं द्वादशरात्रं चरित्वा पुनर् उपयुञ्जीत वेदम् आचार्यात्
brahmojjhaḥ kṛcchraṃ dvādaśarātraṃ caritvā punar upayuñjīta vedam ācāryāt
- 13
गुरुतल्पगः सवृषणं शिश्नम् उद्धृत्याञ्जलाव् आधाय दक्षिणामुखो गच्छेद्यत्रैव प्रतिहन्यात्तत्र तिष्ठेद् आ प्रलयम्
gurutalpagaḥ savṛṣaṇaṃ śiśnam uddhṛtyāñjalāv ādhāya dakṣiṇāmukho gacchedyatraiva pratihanyāttatra tiṣṭhed ā pralayam
- 14
निष्कालको वा घृताभ्यक्तस्तप्तां सूर्मीं परिष्वजेन्मरणात्पूतो भवतीति विज्ञायते
niṣkālako vā ghṛtābhyaktastaptāṃ sūrmīṃ pariṣvajenmaraṇātpūto bhavatīti vijñāyate
- 15
आचार्यपुत्रशिष्यभार्यासु चैवम्
ācāryaputraśiṣyabhāryāsu caivam
- 16
योनिषु गुर्वीं सखीं गुरुसखीम् अपपात्रां पतितां च गत्वा कृच्छ्राब्दपादं चरेत्
yoniṣu gurvīṃ sakhīṃ gurusakhīm apapātrāṃ patitāṃ ca gatvā kṛcchrābdapādaṃ caret
- 17
एतद् एव चाण्डालपतितान्नभोजनेषु ततः पुनरुपनयनं वपनादीनां तु निवृत्तिः
etad eva cāṇḍālapatitānnabhojaneṣu tataḥ punarupanayanaṃ vapanādīnāṃ tu nivṛttiḥ
- 18
मानवं चात्र श्लोकम् उदाहरन्ति
वपनं मेखला दण्डो भैक्षचर्या व्रतानि च
एतानि तु निवर्तन्ते पुनःसंस्कारकर्मणीति
mānavaṃ cātra ślokam udāharanti
vapanaṃ mekhalā daṇḍo bhaikṣacaryā vratāni ca
etāni tu nivartante punaḥsaṃskārakarmaṇīti
- 19
मत्या मद्यपाने त्व् असुरायाः सुरायाश्चाज्ञाने कृच्छ्रातिकृच्छ्रौ घृतं प्राश्य पुनःसंस्कारश्च
matyā madyapāne tv asurāyāḥ surāyāścājñāne kṛcchrātikṛcchrau ghṛtaṃ prāśya punaḥsaṃskāraśca
- 20
मूत्रशकृच्छुक्राभ्यवहारेषु चैवम्
mūtraśakṛcchukrābhyavahāreṣu caivam
- 21
मद्यभाण्डे स्थिता आपो यदि कश्चिद्द्विजः पिबेत्पद्मोदुम्बरबिल्वपलाशानाम् उदकं पीत्वा त्रिरात्रेणैव शुध्यति
madyabhāṇḍe sthitā āpo yadi kaściddvijaḥ pibetpadmodumbarabilvapalāśānām udakaṃ pītvā trirātreṇaiva śudhyati
- 22
अभ्यासे तु सुराया अग्निवर्णां तां द्विजः पिबेन्मरणात्पूतो भवतीति
abhyāse tu surāyā agnivarṇāṃ tāṃ dvijaḥ pibenmaraṇātpūto bhavatīti
- 23
भ्रूणहनं वक्ष्यामो ब्राह्मणं हत्वा भ्रूणहा भवत्य् अविज्ञातं च गर्भम्
bhrūṇahanaṃ vakṣyāmo brāhmaṇaṃ hatvā bhrūṇahā bhavaty avijñātaṃ ca garbham
- 24
अविज्ञाता हि गर्भाः पुमांसो भवन्ति तस्मात्पुंस्कृत्या जुह्वतीति
avijñātā hi garbhāḥ pumāṃso bhavanti tasmātpuṃskṛtyā juhvatīti
- 25
भ्रूणहाग्निम् उपसमाधाय जुहुयाद् एताः
bhrūṇahāgnim upasamādhāya juhuyād etāḥ
- 26
लोमानि मृत्योर्जुहोमि लोमभिर्मृत्युं वासय इति प्रथमाम्
त्वचं मृत्योर्जुहोमि त्वचा मृत्युं वासय इति द्वितीयाम्
लोहितं मृत्योर्जुहोमि लोहितेन मृत्युं वासय इति तृतीयाम्
मांसं मृत्योर्जुहोमि मांसेन मृत्युं वासय इति चतुर्थीम्
स्नावानि मृत्योर्जुहोमि स्नावभिर्मृत्युं वासय इति पञ्चमीम्
मेदो मृत्योर्जुहोमि मेदसा मृत्युं वासय इति षष्ठीम्
अस्थीनि मृत्योर्जुहोम्य् अस्थिभिर्मृत्युं वासय इति सप्तमीम्
मज्जानं मृत्योर्जुहोमि मज्जाभिर्मृत्युं वासय इत्य् अष्टमीम् इति
lomāni mṛtyorjuhomi lomabhirmṛtyuṃ vāsaya iti prathamām
tvacaṃ mṛtyorjuhomi tvacā mṛtyuṃ vāsaya iti dvitīyām
lohitaṃ mṛtyorjuhomi lohitena mṛtyuṃ vāsaya iti tṛtīyām
māṃsaṃ mṛtyorjuhomi māṃsena mṛtyuṃ vāsaya iti caturthīm
snāvāni mṛtyorjuhomi snāvabhirmṛtyuṃ vāsaya iti pañcamīm
medo mṛtyorjuhomi medasā mṛtyuṃ vāsaya iti ṣaṣṭhīm
asthīni mṛtyorjuhomy asthibhirmṛtyuṃ vāsaya iti saptamīm
majjānaṃ mṛtyorjuhomi majjābhirmṛtyuṃ vāsaya ity aṣṭamīm iti
- 27
राजार्थे ब्राह्मणार्थे वा संग्रामे ऽभिमुखम् आत्मानं घातयेत्
rājārthe brāhmaṇārthe vā saṃgrāme 'bhimukham ātmānaṃ ghātayet
- 28
त्रिर् अजितो वापराद्धः पूतो भवतीति विज्ञायते हि
trir ajito vāparāddhaḥ pūto bhavatīti vijñāyate hi
- 29
निरुक्तं ह्य् एनः कनीयो भवतीति
niruktaṃ hy enaḥ kanīyo bhavatīti
- 30
तथाप्य् उदाहरन्ति
पतितं पतितेत्य् उक्त्वा चोरं चोरेति वा पुनः
वचनात्तुल्यदोषः स्यान्मिथ्या द्विर्दोषतां व्रजेद् इति
tathāpy udāharanti
patitaṃ patitety uktvā coraṃ coreti vā punaḥ
vacanāttulyadoṣaḥ syānmithyā dvirdoṣatāṃ vrajed iti

