46 shlokas
- 1
अथातः पुरुषनिःश्रेयसार्थं धर्मजिज्ञासा
athātaḥ puruṣaniḥśreyasārthaṃ dharmajijñāsā
- 2
ज्ञात्वा चानुतिष्ठन्धार्मिकः
jñātvā cānutiṣṭhandhārmikaḥ
- 3
प्रशस्यतमो भवति लोके प्रेत्य च स्वर्गलोकं समश्नुते
praśasyatamo bhavati loke pretya ca svargalokaṃ samaśnute
- 4
श्रुतिस्मृतिविहितो धर्मः
śrutismṛtivihito dharmaḥ
- 5
तदलाभे शिष्टाचारः प्रमाणम्
tadalābhe śiṣṭācāraḥ pramāṇam
- 6
शिष्टः पुनर् अकामात्मा
śiṣṭaḥ punar akāmātmā
- 7
अगृह्यमाणकारणो धर्मः
agṛhyamāṇakāraṇo dharmaḥ
- 8
आर्यावर्तः प्राग् आदर्शात्प्रत्यक्कालकवनाद् उदक्पारियात्राद्दक्षिणेन हिमवतः
āryāvartaḥ prāg ādarśātpratyakkālakavanād udakpāriyātrāddakṣiṇena himavataḥ
- 9
उत्तरेण च विन्ध्यस्य
uttareṇa ca vindhyasya
- 10
तस्मिन्देशे ये धर्मा ये चाचारास्ते सर्वत्र प्रत्येतव्याः
tasmindeśe ye dharmā ye cācārāste sarvatra pratyetavyāḥ
- 11
न त्व् अन्ये प्रतिलोमकधर्माणाम्
na tv anye pratilomakadharmāṇām
- 12
गङ्गायमुनयोर् अन्तरे ऽप्य् एके
gaṅgāyamunayor antare 'py eke
- 13
यावद्वा कृष्णमृगो विचरति तावद्ब्रह्मवर्चसम् इत्य् अन्ये
yāvadvā kṛṣṇamṛgo vicarati tāvadbrahmavarcasam ity anye
- 14
अथापि भाल्लविनो निदाने गाथाम् उदाहरन्ति
athāpi bhāllavino nidāne gāthām udāharanti
- 15
पश्चात्सिन्धुर्विधारणी सूर्यस्योदयनं पुरः
यावत्कृष्णो ऽभिधावति तावद्वै ब्रह्मवर्चसम् इति
paścātsindhurvidhāraṇī sūryasyodayanaṃ puraḥ
yāvatkṛṣṇo 'bhidhāvati tāvadvai brahmavarcasam iti
- 16
त्रैविद्यवृद्धा यं ब्रूयुर्धर्मं धर्मविदो जनाः
पवने पावने चैव स धर्मो नात्र संशय इति
traividyavṛddhā yaṃ brūyurdharmaṃ dharmavido janāḥ
pavane pāvane caiva sa dharmo nātra saṃśaya iti
- 17
देशधर्मजातिधर्मकुलधर्माञ्श्रुत्यभावाद् अब्रवीन्मनुः
deśadharmajātidharmakuladharmāñśrutyabhāvād abravīnmanuḥ
- 18
सूर्याभ्युदितः सूर्याभिनिम्रुक्तः कुनखी श्यावदन्तः परिवित्तिः परिवेत्ताग्रेदिधिषूर्दिधिषूपतिर्वीरहा ब्रह्मोज्झ इत्य् एनस्विनः
sūryābhyuditaḥ sūryābhinimruktaḥ kunakhī śyāvadantaḥ parivittiḥ parivettāgredidhiṣūrdidhiṣūpatirvīrahā brahmojjha ity enasvinaḥ
- 19
पञ्च महापातकान्य् आचक्षते
pañca mahāpātakāny ācakṣate
- 20
गुरुतल्पं सुरापानं भ्रूणहत्या ब्राह्मणसुवर्णापहरणं पतितसंयोगश्च
gurutalpaṃ surāpānaṃ bhrūṇahatyā brāhmaṇasuvarṇāpaharaṇaṃ patitasaṃyogaśca
- 21
ब्राह्मेण वा यौनेन वा
brāhmeṇa vā yaunena vā
- 22
अथाप्य् उदाहरन्ति
संवत्सरेण पतति पतितेन सहाचरन्
याजनाध्यापनाद्यौनान्न तु यानासनाद्दानाद् इति
athāpy udāharanti
saṃvatsareṇa patati patitena sahācaran
yājanādhyāpanādyaunānna tu yānāsanāddānād iti
- 23
यो ऽग्नीन् अपविध्येद्गुरुं च यः प्रतिदघ्नुयान्नास्तिको नास्तिकवृत्तिः सोमं च विक्रीणीयाद् इत्य् उपपातकानि
yo 'gnīn apavidhyedguruṃ ca yaḥ pratidaghnuyānnāstiko nāstikavṛttiḥ somaṃ ca vikrīṇīyād ity upapātakāni
- 24
तिस्रो ब्राह्मणस्य भार्या वर्णानुपूर्वेण द्वे राजन्यस्य एकैका वैश्यशूद्रयोः
tisro brāhmaṇasya bhāryā varṇānupūrveṇa dve rājanyasya ekaikā vaiśyaśūdrayoḥ
- 25
शूद्राम् अप्य् एके मन्त्रवर्जं तद्वत्
śūdrām apy eke mantravarjaṃ tadvat
- 26
तथा न कुर्यात्
tathā na kuryāt
- 27
अतो हि ध्रुवः कुलापकर्षः प्रेत्य चास्वर्गः
ato hi dhruvaḥ kulāpakarṣaḥ pretya cāsvargaḥ
- 28
षड्विवाहाः
ṣaḍvivāhāḥ
- 29
ब्राह्मो दैव आर्षो गान्धर्वः क्षात्रो मानुषश्चेति
brāhmo daiva ārṣo gāndharvaḥ kṣātro mānuṣaśceti
- 30
इच्छत उदकपूर्वं यां दद्यात्स ब्राह्मः
icchata udakapūrvaṃ yāṃ dadyātsa brāhmaḥ

