21 shlokas
- 1
शोणितशुक्रसंभवः पुरुषो भवति मातापितृनिमित्तकः
śoṇitaśukrasaṃbhavaḥ puruṣo bhavati mātāpitṛnimittakaḥ
- 2
तस्य प्रदानविक्रयत्यागेषु मातापितरौ प्रभवतः
tasya pradānavikrayatyāgeṣu mātāpitarau prabhavataḥ
- 3
न त्व् एकं पुत्रं दद्यात्प्रतिगृह्णीयाद्वा
na tv ekaṃ putraṃ dadyātpratigṛhṇīyādvā
- 4
स हि सन्तानाय पूर्वेषाम्
sa hi santānāya pūrveṣām
- 5
न स्त्री पुत्रं दद्यात्प्रतिगृह्णीयाद्वान्यत्रानुज्ञानाद्भर्तुः
na strī putraṃ dadyātpratigṛhṇīyādvānyatrānujñānādbhartuḥ
- 6
पुत्रं प्रतिगृहीष्यन्बन्धून् आहूय राजनि च निवेद्य निवेशनस्य मध्ये व्याहृतिभिर्हुत्वादूरबान्धवं बन्धुसंनिकृष्टम् एव प्रतिगृह्णीयात्
putraṃ pratigṛhīṣyanbandhūn āhūya rājani ca nivedya niveśanasya madhye vyāhṛtibhirhutvādūrabāndhavaṃ bandhusaṃnikṛṣṭam eva pratigṛhṇīyāt
- 7
सन्देहे चोत्पन्ने दूरेबान्धवं शूद्रम् इव स्थापयेत्
sandehe cotpanne dūrebāndhavaṃ śūdram iva sthāpayet
- 8
विज्ञायते ह्य् एकेन बहूंस्त्रायत इति
vijñāyate hy ekena bahūṃstrāyata iti
- 9
तस्मिंश्चेत्प्रतिगृहीत औरसः पुत्र उत्पद्येत चतुर्थभागभागी स्याद्दत्तकः
tasmiṃścetpratigṛhīta aurasaḥ putra utpadyeta caturthabhāgabhāgī syāddattakaḥ
- 10
यदि नाभ्युदयिकेषु युक्तः स्यात्
yadi nābhyudayikeṣu yuktaḥ syāt
- 11
वेदविप्लावकः शूद्रयाजक उत्तमवर्णवर्गपतितास्तेषां पात्रनिनयनम्
vedaviplāvakaḥ śūdrayājaka uttamavarṇavargapatitāsteṣāṃ pātraninayanam
- 12
अपात्रसङ्कराद् अकृत्स्नं पात्रम् आदाय दासो ऽसवर्णापुत्रो वा बन्धुर् असदृशो वा गुणहीनः सव्येन पादेन प्रवृत्ताग्रान्दर्भांल्लोहितान्वोपस्तीर्य पूर्णपात्रम् अस्मै निनयेत्
apātrasaṅkarād akṛtsnaṃ pātram ādāya dāso 'savarṇāputro vā bandhur asadṛśo vā guṇahīnaḥ savyena pādena pravṛttāgrāndarbhāṃllohitānvopastīrya pūrṇapātram asmai ninayet
- 13
निनेतारं चास्य प्रकीर्णकेशा ज्ञातयो ऽन्वालभेरन्
ninetāraṃ cāsya prakīrṇakeśā jñātayo 'nvālabheran
- 14
अपसव्यं कृत्वा गृहेषु स्वैरम् आपद्येरन्
apasavyaṃ kṛtvā gṛheṣu svairam āpadyeran
- 15
अत ऊर्ध्वं न तं धर्मयेयुः
ata ūrdhvaṃ na taṃ dharmayeyuḥ
- 16
तद्धर्माणस्तं धर्मयन्तः
taddharmāṇastaṃ dharmayantaḥ
- 17
पतितानां तु चरितव्रतानां प्रत्युद्धारः
patitānāṃ tu caritavratānāṃ pratyuddhāraḥ
- 18
अथाप्य् उदाहरन्ति
अग्रे ऽभ्युद्धरतां गच्छेत्क्रीडन्न् इव हसन्न् इव
पश्चात्पातयतां गच्छेच्छोचन्न् इव रुदन्न् इवेति
athāpy udāharanti
agre 'bhyuddharatāṃ gacchetkrīḍann iva hasann iva
paścātpātayatāṃ gacchecchocann iva rudann iveti
- 19
आचार्यमातृपितृहन्तारस्तत्प्रसादाद् अपयाप्याद्वा एषा तेषां प्रत्यापत्तिः
ācāryamātṛpitṛhantārastatprasādād apayāpyādvā eṣā teṣāṃ pratyāpattiḥ
- 20
पुण्यह्रदात्प्रसृताद्वा काञ्चनं पात्रं माहेयं वा पूरयित्वापोहिष्ठाभिर् एनम् अद्भिर् अभिषिञ्चन्ति
puṇyahradātprasṛtādvā kāñcanaṃ pātraṃ māheyaṃ vā pūrayitvāpohiṣṭhābhir enam adbhir abhiṣiñcanti
- 21
सर्व एवाभिषिक्तस्य प्रत्युद्धारः पुत्रजन्मना व्याख्यातो व्याख्यात इति
sarva evābhiṣiktasya pratyuddhāraḥ putrajanmanā vyākhyāto vyākhyāta iti

