22 shlokas
- 1
यद्य् अकार्यशतं साग्रं कृतं वेदश्च धार्यते
सर्वं तत्तस्य वेदाग्निर्दहत्य् अग्निर् इवेन्धनम्
yady akāryaśataṃ sāgraṃ kṛtaṃ vedaśca dhāryate
sarvaṃ tattasya vedāgnirdahaty agnir ivendhanam
- 2
यथा जातबलो वह्निर्दहत्य् आर्द्रान् अपि द्रुमान्
तथा दहति वेदाग्निः कर्मजं दोषम् आत्मनः
yathā jātabalo vahnirdahaty ārdrān api drumān
tathā dahati vedāgniḥ karmajaṃ doṣam ātmanaḥ
- 3
हत्वापि स इमांल्लोकान्भुञ्जानो ऽपि यतस्ततः
ऋग्वेदं धारयन्विप्रो नैनः प्राप्नोति किंचन
hatvāpi sa imāṃllokānbhuñjāno 'pi yatastataḥ
ṛgvedaṃ dhārayanvipro nainaḥ prāpnoti kiṃcana
- 4
न वेदबलम् आश्रित्य पापकर्मरतिर्भवेत्
अज्ञानाच्च प्रमादाच्च दह्यते कर्म नेतरत्
na vedabalam āśritya pāpakarmaratirbhavet
ajñānācca pramādācca dahyate karma netarat
- 5
तपस्तप्यति यो ऽरण्ये मुनिर्मूलफलाशनः
ऋचम् एकां च यो ऽधीते तच्च तानि च तत्समम्
tapastapyati yo 'raṇye munirmūlaphalāśanaḥ
ṛcam ekāṃ ca yo 'dhīte tacca tāni ca tatsamam
- 6
इतिहासपुराणाभ्यां वेदं समुपबृंहयेत्
बिभेत्य् अल्पश्रुताद्वेदो माम् अयं प्रहरिष्यति
itihāsapurāṇābhyāṃ vedaṃ samupabṛṃhayet
bibhety alpaśrutādvedo mām ayaṃ prahariṣyati
- 7
वेदाभ्यासो ऽन्वहं शक्त्या महायज्ञक्रियाक्रमः
नाशयत्य् आशु पापानि महापातकजान्य् अपि
vedābhyāso 'nvahaṃ śaktyā mahāyajñakriyākramaḥ
nāśayaty āśu pāpāni mahāpātakajāny api
- 8
वेदोदितं स्वकं कर्म नित्यं कुर्याद् अतन्द्रितः
तद्धि कुर्वन्यथाशक्त्या प्राप्नोति परमां गतिम्
vedoditaṃ svakaṃ karma nityaṃ kuryād atandritaḥ
taddhi kurvanyathāśaktyā prāpnoti paramāṃ gatim
- 9
याजनाध्यापनाद्यौनात्तथैवासत्प्रतिग्रहात्
विप्रेषु न भवेद्दोषो ज्वलनार्कसमो हि सः
yājanādhyāpanādyaunāttathaivāsatpratigrahāt
vipreṣu na bhaveddoṣo jvalanārkasamo hi saḥ
- 10
शङ्कास्थाने समुत्पन्ने अभोज्यभोज्यसंज्ञके
आहारशुद्धिं वक्ष्यामि तन्मे निगदतः शृणु
śaṅkāsthāne samutpanne abhojyabhojyasaṃjñake
āhāraśuddhiṃ vakṣyāmi tanme nigadataḥ śṛṇu
- 11
अक्षारलवणां रूक्षां पिबेद्ब्राह्मीं सुवर्चलाम्
त्रिरात्रं शङ्खपुष्पीं च ब्राह्मणः पयसा सह
akṣāralavaṇāṃ rūkṣāṃ pibedbrāhmīṃ suvarcalām
trirātraṃ śaṅkhapuṣpīṃ ca brāhmaṇaḥ payasā saha
- 12
पलाशबिल्वपत्राणि कुशान्पद्मान् उदुम्बरान्
क्वाथयित्वा पिबेद् आपस्त्रिरात्रेणैव शुध्यति
palāśabilvapatrāṇi kuśānpadmān udumbarān
kvāthayitvā pibed āpastrirātreṇaiva śudhyati
- 13
गोमूत्रं गोमयं क्षीरं दधि सर्पिः कुशोदकम्
एकरात्रोपवासश्च श्वपाकम् अपि शोधयेत्
gomūtraṃ gomayaṃ kṣīraṃ dadhi sarpiḥ kuśodakam
ekarātropavāsaśca śvapākam api śodhayet
- 14
गोमूत्रं गोमयं चैव क्षीरं दधि घृतं तथा
पञ्चरात्रं तदाहारः पञ्चगव्येन शुध्यति
gomūtraṃ gomayaṃ caiva kṣīraṃ dadhi ghṛtaṃ tathā
pañcarātraṃ tadāhāraḥ pañcagavyena śudhyati
- 15
यवान्विधिनोपयुञ्जानः प्रत्यक्षेणैव शुध्यति
विशुद्धभावे शुद्धाः स्युर् अशुद्धे तु सरागिणः
yavānvidhinopayuñjānaḥ pratyakṣeṇaiva śudhyati
viśuddhabhāve śuddhāḥ syur aśuddhe tu sarāgiṇaḥ
- 16
हविष्यान्प्रातर् आशांस्त्रीन्सायम् आशांस्तथैव च
अयाचितं तथैव स्याद् उपवासत्रयं भवेत्
haviṣyānprātar āśāṃstrīnsāyam āśāṃstathaiva ca
ayācitaṃ tathaiva syād upavāsatrayaṃ bhavet
- 17
अथ चेत्त्वरते कर्तुं दिवसं मारुताशनः
रात्रौ जलाशये व्युष्टः प्राजापत्येन तत्समम्
atha cettvarate kartuṃ divasaṃ mārutāśanaḥ
rātrau jalāśaye vyuṣṭaḥ prājāpatyena tatsamam
- 18
सावित्र्यष्टसहस्रं तु जपं कृत्वोत्थिते रवौ
मुच्यते पातकैः सर्वैर्यदि न ब्रह्महा भवेत्
sāvitryaṣṭasahasraṃ tu japaṃ kṛtvotthite ravau
mucyate pātakaiḥ sarvairyadi na brahmahā bhavet
- 19
यो वै स्तेनः सुरापो वा भ्रूणहा गुरुतल्पगः
धर्मशास्त्रम् अधीत्यैव मुच्यते सर्वपातकैः
yo vai stenaḥ surāpo vā bhrūṇahā gurutalpagaḥ
dharmaśāstram adhītyaiva mucyate sarvapātakaiḥ
- 20
दुरितानां दुरिष्टानां पापानां महतां तथा
कृच्छ्रं चान्द्रायणं चैव सर्वपापप्रणाशनम्
duritānāṃ duriṣṭānāṃ pāpānāṃ mahatāṃ tathā
kṛcchraṃ cāndrāyaṇaṃ caiva sarvapāpapraṇāśanam
- 21
एकैकं वर्धयेत्पिण्डं शुक्ले कृष्णे च ह्रासयेत्
अमावास्यां न भुञ्जीत एवं चान्द्रायणो विधिः
ekaikaṃ vardhayetpiṇḍaṃ śukle kṛṣṇe ca hrāsayet
amāvāsyāṃ na bhuñjīta evaṃ cāndrāyaṇo vidhiḥ
- 22
एवं चान्द्रायणो विधिर् इति
evaṃ cāndrāyaṇo vidhir iti

