50 shlokas
- 1
ब्रह्मचारी चेत्स्त्रियम् उपेयाद् अरण्ये चतुष्पथे लौकिके ऽग्नौ रक्षोदैवतं गर्दभं पशुम् आलभेत्
brahmacārī cetstriyam upeyād araṇye catuṣpathe laukike 'gnau rakṣodaivataṃ gardabhaṃ paśum ālabhet
- 2
नैरृतं वा चरुं निर्वपेत्
nairṛtaṃ vā caruṃ nirvapet
- 3
तस्य जुहुयात्कामाय स्वाहा कामकामाय स्वाहा नैरृत्यै स्वाहा रक्षोदेवताभ्यः स्वाहेति
tasya juhuyātkāmāya svāhā kāmakāmāya svāhā nairṛtyai svāhā rakṣodevatābhyaḥ svāheti
- 4
एतद् एव रेतसः प्रयत्नोत्सर्गे दिवास्वप्ने व्रतान्तरेषु वा समावर्तनात्
etad eva retasaḥ prayatnotsarge divāsvapne vratāntareṣu vā samāvartanāt
- 5
तिर्यग्योनिव्यवाये शुक्लम् ऋषभं दद्यात्
tiryagyonivyavāye śuklam ṛṣabhaṃ dadyāt
- 6
गां गत्वा शूद्रावधेन दोषो व्याख्यातः
gāṃ gatvā śūdrāvadhena doṣo vyākhyātaḥ
- 7
ब्रह्मचारिणः शवकर्मणो व्रतान्निवृत्तिः
brahmacāriṇaḥ śavakarmaṇo vratānnivṛttiḥ
- 8
अन्यत्र मातापित्रोः
anyatra mātāpitroḥ
- 9
स चेद्व्याधीयीत कामं गुरोर् उच्छिष्टं भेषजार्थं सर्वं प्राश्नीयात्
sa cedvyādhīyīta kāmaṃ guror ucchiṣṭaṃ bheṣajārthaṃ sarvaṃ prāśnīyāt
- 10
गुरुप्रयुक्तश्चेन्म्रियेत त्रीन्कृच्छ्रांश्चरेद्गुरुः
guruprayuktaścenmriyeta trīnkṛcchrāṃścaredguruḥ
- 11
ब्रह्मचारी चेन्मांसम् अश्नीयाद् उच्छिष्टभोजनीयं कृच्छ्रं द्वादशरात्रं चरित्वा व्रतशेषं समापयेत्
brahmacārī cenmāṃsam aśnīyād ucchiṣṭabhojanīyaṃ kṛcchraṃ dvādaśarātraṃ caritvā vrataśeṣaṃ samāpayet
- 12
श्राद्धसूतकभोजनेषु चैवम्
śrāddhasūtakabhojaneṣu caivam
- 13
अकामतोपनतं मधु वाजसनेयके न दुष्यतीति विज्ञायते
akāmatopanataṃ madhu vājasaneyake na duṣyatīti vijñāyate
- 14
य आत्मत्याग्य् अभिशस्तो भवति सपिण्डानां प्रेतकर्मछेदः
ya ātmatyāgy abhiśasto bhavati sapiṇḍānāṃ pretakarmachedaḥ
- 15
काष्ठजललोष्टपाषाणशस्त्रविषरज्जुभिर्य आत्मानम् अवसादयति स आत्महा भवति
kāṣṭhajalaloṣṭapāṣāṇaśastraviṣarajjubhirya ātmānam avasādayati sa ātmahā bhavati
- 16
अथाप्य् उदाहरन्ति
य आत्मत्यागिनः कुर्यात्स्नेहात्प्रेतक्रियां द्विजः
स तप्तकृच्छ्रसहितं चरेच्चान्द्रायणव्रतम् इति
athāpy udāharanti
ya ātmatyāginaḥ kuryātsnehātpretakriyāṃ dvijaḥ
sa taptakṛcchrasahitaṃ careccāndrāyaṇavratam iti
- 17
चान्द्रायणं परस्ताद्वक्ष्यामः
cāndrāyaṇaṃ parastādvakṣyāmaḥ
- 18
आत्महननाध्यवसाये त्रिरात्रम्
ātmahananādhyavasāye trirātram
- 19
जीवन्न् आत्मत्यागी कृच्छ्रं द्वादशरात्रं चरेत्त्रिरात्रं ह्य् उपवसेन्नित्यं स्निग्धेन वाससा प्राणान् आत्मनि चायम्य त्रिः पठेद् अघमर्षणम् इति
jīvann ātmatyāgī kṛcchraṃ dvādaśarātraṃ carettrirātraṃ hy upavasennityaṃ snigdhena vāsasā prāṇān ātmani cāyamya triḥ paṭhed aghamarṣaṇam iti
- 20
अपि वैतेन कल्पेन गायत्रीं परिवर्तयेत्
api vaitena kalpena gāyatrīṃ parivartayet
- 21
अपि वाग्निम् उपसमाधाय कूष्माण्डैर्जुहुयाद्घृतम्
api vāgnim upasamādhāya kūṣmāṇḍairjuhuyādghṛtam
- 22
यच्चान्यन्महापातकेभ्यः सर्वम् एतेन पूयत इति
yaccānyanmahāpātakebhyaḥ sarvam etena pūyata iti
- 23
अथाप्य् आचमेद् अग्निश्च मा मन्युश्चेति प्रातर्मनसा पापं ध्यात्वोंपूर्वाः सत्यान्ता व्याहृतीर्जपेद् अघमर्षणं वा पठेत्
athāpy ācamed agniśca mā manyuśceti prātarmanasā pāpaṃ dhyātvoṃpūrvāḥ satyāntā vyāhṛtīrjaped aghamarṣaṇaṃ vā paṭhet
- 24
मानुषास्थि स्निग्धं स्पृष्ट्वा त्रिरात्रम् आशौचम्
mānuṣāsthi snigdhaṃ spṛṣṭvā trirātram āśaucam
- 25
अस्निग्धे त्व् अहोरात्रम्
asnigdhe tv ahorātram
- 26
शवानुगमने चैवम्
śavānugamane caivam
- 27
अधीयानानाम् अन्तरागमने ऽहोरात्रम् अभोजनम्
adhīyānānām antarāgamane 'horātram abhojanam
- 28
त्रिरात्रम् अभिषेको विवासश्चान्योन्येन
trirātram abhiṣeko vivāsaścānyonyena
- 29
श्वमार्जारनकुलशीघ्रगाणाम् अहोरात्रम्
śvamārjāranakulaśīghragāṇām ahorātram
- 30
श्वकुक्कुटग्राम्यशूकरकङ्कगृध्रभासपारावतमानुषकाकोलूकमांसादने सप्तरात्रम् उपवासो निष्पुरीषीभावो घृतप्राशः पुनःसंस्कारश्च
śvakukkuṭagrāmyaśūkarakaṅkagṛdhrabhāsapārāvatamānuṣakākolūkamāṃsādane saptarātram upavāso niṣpurīṣībhāvo ghṛtaprāśaḥ punaḥsaṃskāraśca

