16 shlokas
- 1
अथ खल्व् अयं पुरुषो मिथ्या व्याकरोत्य् अयाज्यं वा याजयत्य् अप्रतिग्राह्यं वा प्रतिगृह्णात्य् अनन्नं वाश्नात्य् अनाचरणीयम् एवाचरति
atha khalv ayaṃ puruṣo mithyā vyākaroty ayājyaṃ vā yājayaty apratigrāhyaṃ vā pratigṛhṇāty anannaṃ vāśnāty anācaraṇīyam evācarati
- 2
तत्र प्रायश्चित्तं कुर्यान्न कुर्याद् इति मीमांसन्ते
tatra prāyaścittaṃ kuryānna kuryād iti mīmāṃsante
- 3
न कुर्याद् इत्य् आहुः
na kuryād ity āhuḥ
- 4
न हि कर्म क्षीयत इति
na hi karma kṣīyata iti
- 5
कुर्याद् इत्य् एव तस्माच्छ्रुतिनिदर्शनात्
kuryād ity eva tasmācchrutinidarśanāt
- 6
तरति सर्वं पाप्मानं तरति ब्रह्महत्यां यो ऽश्वमेधेन यजत इति
tarati sarvaṃ pāpmānaṃ tarati brahmahatyāṃ yo 'śvamedhena yajata iti
- 7
इति चाभिशस्तो गोसवेनाग्निष्टुता यजेत
iti cābhiśasto gosavenāgniṣṭutā yajeta
- 8
तस्य निष्क्रयणानि जपस्तपो होम उपवासो दानम्
tasya niṣkrayaṇāni japastapo homa upavāso dānam
- 9
उपनिषदो वेदादयो वेदान्ताः सर्वछन्दः संहिता मधून्य् अघमर्षणम् अथर्वशिरो रुद्राः पुरुषसूक्तं राजनरौहिणे सामनी कूष्माण्डानि पावमान्यः सावित्री चेति पावनानि
upaniṣado vedādayo vedāntāḥ sarvachandaḥ saṃhitā madhūny aghamarṣaṇam atharvaśiro rudrāḥ puruṣasūktaṃ rājanarauhiṇe sāmanī kūṣmāṇḍāni pāvamānyaḥ sāvitrī ceti pāvanāni
- 10
अथाप्य् उदाहरन्ति
वैश्वानरीं व्रातपतीं पवित्रेष्टिं तथैव च
सकृद् ऋतौ प्रयुञ्जानः पुनाति दशपूरुषम् इति
athāpy udāharanti
vaiśvānarīṃ vrātapatīṃ pavitreṣṭiṃ tathaiva ca
sakṛd ṛtau prayuñjānaḥ punāti daśapūruṣam iti
- 11
उपवासन्यायेन पयोव्रतता फलभक्षता प्रसृतयावको हिरण्यप्राशनं सोमपानम् इति मेध्यानि
upavāsanyāyena payovratatā phalabhakṣatā prasṛtayāvako hiraṇyaprāśanaṃ somapānam iti medhyāni
- 12
सर्वे शिलोच्चयाः सर्वाः स्रवन्त्यः पुण्या ह्रदास्तीर्थान्य् ऋषिनिवासगोष्ठपरिष्कन्धा इति देशाः
sarve śiloccayāḥ sarvāḥ sravantyaḥ puṇyā hradāstīrthāny ṛṣinivāsagoṣṭhapariṣkandhā iti deśāḥ
- 13
संवत्सरो मासश्चतुर्विंशत्यहर्द्वादशाहः षडहस्त्र्यहर् अहोरात्रा इति कालाः
saṃvatsaro māsaścaturviṃśatyahardvādaśāhaḥ ṣaḍahastryahar ahorātrā iti kālāḥ
- 14
एतान्य् एवानादेशे विकल्पेन क्रियेरन्
etāny evānādeśe vikalpena kriyeran
- 15
एनःसु गुरुषु गुरूणि लघुषु लघूनि
enaḥsu guruṣu gurūṇi laghuṣu laghūni
- 16
कृच्छ्रातिकृच्छ्रौ चान्द्रायणम् इति सर्वप्रायश्चित्तिः सर्वप्रायश्चित्तिर् इति
kṛcchrātikṛcchrau cāndrāyaṇam iti sarvaprāyaścittiḥ sarvaprāyaścittir iti

