47 shlokas
- 1
श्रीदेवी उवाच
त्रिपुराया महामन्त्रं नित्यातन्त्रे श्रुतं मया
इदानीं श्रोतुम् इच्छामि नवार्णस्य च वासनाम्
śrīdevī uvāca
tripurāyā mahāmantraṃ nityātantre śrutaṃ mayā
idānīṃ śrotum icchāmi navārṇasya ca vāsanām
- 2
श्रीशिव उवाच
भूमिश्चन्द्रः शिवो माया शक्तिः कृशानुसादनौ
अर्धचन्द्रश्च बिन्दुश्च नवार्णो मेरुरुच्यते
śrīśiva uvāca
bhūmiścandraḥ śivo māyā śaktiḥ kṛśānusādanau
ardhacandraśca binduśca navārṇo merurucyate
- 3
भूमिबीजजपादेव भूपतिर्जायते ऽचिरात्
चन्द्रबीजजपादेव महासौन्दर्यमाप्नुयात्
bhūmibījajapādeva bhūpatirjāyate 'cirāt
candrabījajapādeva mahāsaundaryamāpnuyāt
- 4
शिवबीजजपाद् एव शिववद्विहरेत्क्षितौ
एकत्रोच्चारणात्सत्यं चतुर्वर्गफलप्रदम्
śivabījajapād eva śivavadviharetkṣitau
ekatroccāraṇātsatyaṃ caturvargaphalapradam
- 5
श्रीदेवी उवाच
यत्त्वया कथितं नाथ योगज्ञानादिकं लयम्
यावत्कामादि संदीप्यो भावयोगो न लभ्यते
śrīdevī uvāca
yattvayā kathitaṃ nātha yogajñānādikaṃ layam
yāvatkāmādi saṃdīpyo bhāvayogo na labhyate
- 6
ऊर्ध्वरेता महायोगी तदधः शक्तियोगतः
ब्रूहि मे जगतांनाथ कथं दीर्घायुषं भवेत्
ūrdhvaretā mahāyogī tadadhaḥ śaktiyogataḥ
brūhi me jagatāṃnātha kathaṃ dīrghāyuṣaṃ bhavet
- 7
श्रीशिव उवाच
शृणु देवि प्रवक्ष्यामि येन दीर्घायुषं भवेत्
श्रुत्वा गोपय यत्नेन न प्रकाश्यं कदाचन
śrīśiva uvāca
śṛṇu devi pravakṣyāmi yena dīrghāyuṣaṃ bhavet
śrutvā gopaya yatnena na prakāśyaṃ kadācana
- 8
पूजयेत्कालिकां देवीं तारिणीं वाथ सुन्दरीम्
षोडशेनोपचारेण पञ्चतत्त्वेन पार्वति
pūjayetkālikāṃ devīṃ tāriṇīṃ vātha sundarīm
ṣoḍaśenopacāreṇa pañcatattvena pārvati
- 9
दिनत्रयं पूजयित्वा षट्चक्रं चिन्तयेदथ
ततस्तु परमेशानि मालामन्त्रं समभ्यसेत्
dinatrayaṃ pūjayitvā ṣaṭcakraṃ cintayedatha
tatastu parameśāni mālāmantraṃ samabhyaset
- 10
षोडशी वा महापूर्वा पत्त्रे चाभ्यासमाचरेत्
चतुष्पत्त्रे चाष्टवारं षट्पत्त्रे द्वादशं जपेत्
ṣoḍaśī vā mahāpūrvā pattre cābhyāsamācaret
catuṣpattre cāṣṭavāraṃ ṣaṭpattre dvādaśaṃ japet
- 11
दशपत्त्रे विंशतिं च द्वादशे वेदनेत्रकम्
षोडशे दशसंख्यं तु चतुर्वारं श्रुवोऽष्टकम्
daśapattre viṃśatiṃ ca dvādaśe vedanetrakam
ṣoḍaśe daśasaṃkhyaṃ tu caturvāraṃ śruvo'ṣṭakam
- 12
कुम्भकेन जपेन्मन्त्रं मालाषट्के सुरेश्वरि
एवं क्रमेण देवेशि स्थिरमायुर्यदा भवेत्
kumbhakena japenmantraṃ mālāṣaṭke sureśvari
evaṃ krameṇa deveśi sthiramāyuryadā bhavet
- 13
प्रजपेदक्षमालायां येन मृत्युंजयो भवेत्
श्रीदेवी उवाच
मूलचक्राच्छिरोऽन्ता च सुषुम्ना परिकीर्तिता
तद्गर्भस्था च या शक्तिः सा देवी कुण्डरूपिका
prajapedakṣamālāyāṃ yena mṛtyuṃjayo bhavet
śrīdevī uvāca
mūlacakrācchiro'ntā ca suṣumnā parikīrtitā
tadgarbhasthā ca yā śaktiḥ sā devī kuṇḍarūpikā
- 14
सदा कुण्डलिनी देवी पञ्चाशद्वर्णभूषिता
मालारूपा कथं देव इति मे संशयो हृदि
sadā kuṇḍalinī devī pañcāśadvarṇabhūṣitā
mālārūpā kathaṃ deva iti me saṃśayo hṛdi
- 15
श्रीशिव उवाच
सहस्रारे महापद्मे बीजकोशे शिवालये
हंसेन वायुयोगेन पूरकेण समानयेत्
śrīśiva uvāca
sahasrāre mahāpadme bījakośe śivālaye
haṃsena vāyuyogena pūrakeṇa samānayet
- 16
सहस्रारं तु सम्प्राप्य शिवं दृष्ट्वा तु कामिनी
मालाकारेण तल्लिङ्गं संवेष्ट्य कुण्डली सदा
sahasrāraṃ tu samprāpya śivaṃ dṛṣṭvā tu kāminī
mālākāreṇa talliṅgaṃ saṃveṣṭya kuṇḍalī sadā
- 17
अकारादिलकारान्ता क्षकारं वक्त्रसंयुतम्
चरमार्णं सरन्ध्रं च निजपुच्छेन कामिनी
akārādilakārāntā kṣakāraṃ vaktrasaṃyutam
caramārṇaṃ sarandhraṃ ca nijapucchena kāminī
- 18
भेदयित्वा स्वपुच्छेन नागपाशं तदूर्ध्वके
एतत्कारणं संव्याप्य संस्थिता कुण्डली यदा
bhedayitvā svapucchena nāgapāśaṃ tadūrdhvake
etatkāraṇaṃ saṃvyāpya saṃsthitā kuṇḍalī yadā
- 19
तदैव प्रजपेन्मन्त्रम् अमरत्वं स विन्दति
रेचनात्कामिनी देवी प्रविशन्ती स्वकेतनम्
tadaiva prajapenmantram amaratvaṃ sa vindati
recanātkāminī devī praviśantī svaketanam
- 20
न तत्र प्रजपेन्मन्त्रं जपान्मृत्युमवाप्नुयात्
रेचके छिन्नमालायां सत्यं हि सुरवन्दिते
na tatra prajapenmantraṃ japānmṛtyumavāpnuyāt
recake chinnamālāyāṃ satyaṃ hi suravandite
- 21
छिन्ने सूत्रे भवेन्मृत्युः पुरैव कथितं मया
इति ते कथितं कान्ते यतो मृत्युंजयो भवेत्
chinne sūtre bhavenmṛtyuḥ puraiva kathitaṃ mayā
iti te kathitaṃ kānte yato mṛtyuṃjayo bhavet
- 22
अथवा निजनासाग्रे दृष्टिमारोप्य यत्नतः
वायुं संधार्य यत्नेन एकोच्चारेण चोच्चरेत्
athavā nijanāsāgre dṛṣṭimāropya yatnataḥ
vāyuṃ saṃdhārya yatnena ekoccāreṇa coccaret
- 23
मालामन्त्रं षोडशीं वा तथा चाष्टादशाक्षरीम्
सहस्रं प्रजपेन्मन्त्रं प्रत्यहं यदि पार्वति
mālāmantraṃ ṣoḍaśīṃ vā tathā cāṣṭādaśākṣarīm
sahasraṃ prajapenmantraṃ pratyahaṃ yadi pārvati
- 24
जित्वा मृत्युं जरां रोगं दीर्घकालं स जीवति
एतदन्यं महायोगं भोगार्थी नहि लभ्यते
jitvā mṛtyuṃ jarāṃ rogaṃ dīrghakālaṃ sa jīvati
etadanyaṃ mahāyogaṃ bhogārthī nahi labhyate
- 25
अथवा परमेशानि डामरोक्तविधानतः
यजेत्कात्यायनीं देवीं भूतपूर्वां प्रयत्नतः
athavā parameśāni ḍāmaroktavidhānataḥ
yajetkātyāyanīṃ devīṃ bhūtapūrvāṃ prayatnataḥ
- 26
तदा पञ्चसहस्राब्दं निश्चितं तु स जीवति
इति ते कथितं सर्वं देहरक्षणकारणम्
tadā pañcasahasrābdaṃ niścitaṃ tu sa jīvati
iti te kathitaṃ sarvaṃ deharakṣaṇakāraṇam
- 27
न भोगी भोगमाप्नोति योगी योगो न लभ्यते
एतत्तत्त्वेन देवेशि भोगो योगायते ध्रुवम्
na bhogī bhogamāpnoti yogī yogo na labhyate
etattattvena deveśi bhogo yogāyate dhruvam
- 28
श्रीदेवी उवाच
यन्मालायां जपेनैव किं फलं लभते नरः
पृथक्पृथङ्महादेव पत्त्रमालाफलं वद
śrīdevī uvāca
yanmālāyāṃ japenaiva kiṃ phalaṃ labhate naraḥ
pṛthakpṛthaṅmahādeva pattramālāphalaṃ vada
- 29
श्रीशिव उवाच
भूमिकामी जपेन्मन्त्रं मूलाधारे चतुष्टये
स्वाधिष्ठाने जपादेव महेन्द्रो जायतेऽचिरात्
śrīśiva uvāca
bhūmikāmī japenmantraṃ mūlādhāre catuṣṭaye
svādhiṣṭhāne japādeva mahendro jāyate'cirāt
- 30
मणिपूरे जपादेव भवेत्स्वर्गस्य भाजनम्
अनाहते महापद्मे जपाद्ब्रह्मपुरं व्रजेत्
maṇipūre japādeva bhavetsvargasya bhājanam
anāhate mahāpadme japādbrahmapuraṃ vrajet

