45 shlokas
- 1
श्रीदेवी उवाच
त्वत्प्रसादान्महादेव पवित्राहं न चान्यथा
शम्भुनाथार्चनं देव श्रोतुम् इच्छामि साम्प्रतम्
śrīdevī uvāca
tvatprasādānmahādeva pavitrāhaṃ na cānyathā
śambhunāthārcanaṃ deva śrotum icchāmi sāmpratam
- 2
शिव उवाच
शृणु पार्वति वक्ष्यामि यन्मां त्वं परिपृच्छसि
नकुलीशं समुद्धृत्य मनुस्वरविभूषितम्
śiva uvāca
śṛṇu pārvati vakṣyāmi yanmāṃ tvaṃ paripṛcchasi
nakulīśaṃ samuddhṛtya manusvaravibhūṣitam
- 3
बिन्दुनादकलायुक्तं प्रासादाख्यं महामनुम्
अस्य मन्त्रस्य माहात्म्यम् ऊर्ध्वाम्नाये मयोदितम्
bindunādakalāyuktaṃ prāsādākhyaṃ mahāmanum
asya mantrasya māhātmyam ūrdhvāmnāye mayoditam
- 4
नमस्कारं समुद्धृत्य वान्तं नेत्रविभूषितम्
वारुणं मुखवृत्तं च वायुं ललाटसंयुतम्
namaskāraṃ samuddhṛtya vāntaṃ netravibhūṣitam
vāruṇaṃ mukhavṛttaṃ ca vāyuṃ lalāṭasaṃyutam
- 5
अयं पञ्चाक्षरो मन्त्रः पञ्चाम्नायफलप्रदः
प्रणवादि यदा देवि तदा मन्त्रं षडक्षरम्
ayaṃ pañcākṣaro mantraḥ pañcāmnāyaphalapradaḥ
praṇavādi yadā devi tadā mantraṃ ṣaḍakṣaram
- 6
प्रासादाख्यं समुद्धृत्य अर्धनारीश्वराय च
पुनः प्रासादमुद्धृत्य मन्त्रं परमगोपनम्
prāsādākhyaṃ samuddhṛtya ardhanārīśvarāya ca
punaḥ prāsādamuddhṛtya mantraṃ paramagopanam
- 7
एवं बहुविधाकारं विग्रहं मे नगात्मजे
कण्ठे तु गरलं देवि न कलौ भावयेत्क्वचित्
evaṃ bahuvidhākāraṃ vigrahaṃ me nagātmaje
kaṇṭhe tu garalaṃ devi na kalau bhāvayetkvacit
- 8
यदीच्छेदात्मनो मृत्युं यदि उन्मत्तम् इच्छति
तदैव सहसा देवि नीलकण्ठम् उपासते
yadīcchedātmano mṛtyuṃ yadi unmattam icchati
tadaiva sahasā devi nīlakaṇṭham upāsate
- 9
दुरदृष्टवशाद्देवि नीलकण्ठस्तवादिकम्
करोति कारयेद्वापि मम हत्यां करोति सः
duradṛṣṭavaśāddevi nīlakaṇṭhastavādikam
karoti kārayedvāpi mama hatyāṃ karoti saḥ
- 10
अत एव महेशानि स पापिष्ठो न चान्यथा
निषिद्धाचरणं पापं करोति यदि पामरः
ata eva maheśāni sa pāpiṣṭho na cānyathā
niṣiddhācaraṇaṃ pāpaṃ karoti yadi pāmaraḥ
- 11
पुत्रदाराधनं तस्य नाशमेति न संशयः
कण्ठे तु गरलं देवि यदि पूजापरो भवेत्
putradārādhanaṃ tasya nāśameti na saṃśayaḥ
kaṇṭhe tu garalaṃ devi yadi pūjāparo bhavet
- 12
इहलोके दरिद्रः स्यान्मृते शूकरतां व्रजेत्
नीलकण्ठस्य यन्मन्त्रं यदि कुर्यात्पुरस्क्रियाम्
ihaloke daridraḥ syānmṛte śūkaratāṃ vrajet
nīlakaṇṭhasya yanmantraṃ yadi kuryātpuraskriyām
- 13
पक्षान्तरे महेशानि तस्य मृत्युर्न चान्यथा
शृणु देवि प्रवक्ष्यामि पार्थिवं शिवपूजनम्
pakṣāntare maheśāni tasya mṛtyurna cānyathā
śṛṇu devi pravakṣyāmi pārthivaṃ śivapūjanam
- 14
तत्रादौ परमेशानि गुरुदेवं नमेत्सुधीः
ॐ हराय नमस्कारं मृत्तिकामाहरेत्सुधीः
tatrādau parameśāni gurudevaṃ nametsudhīḥ
oṃ harāya namaskāraṃ mṛttikāmāharetsudhīḥ
- 15
महेश्वराय नमस्कारं लिङ्गं निर्माय यत्नतः
शूलपाणे इहोच्चार्य सुसंप्रतिष्ठितो भव
maheśvarāya namaskāraṃ liṅgaṃ nirmāya yatnataḥ
śūlapāṇe ihoccārya susaṃpratiṣṭhito bhava
- 16
अनेन मनुना देवि जीवन्यासो विधीयते
शकारं बिन्दुसंयुक्तं दीर्घमुक्तं षडङ्गकम्
anena manunā devi jīvanyāso vidhīyate
śakāraṃ bindusaṃyuktaṃ dīrghamuktaṃ ṣaḍaṅgakam
- 17
तस्य ध्यानं प्रवक्ष्यामि शृणुष्व सुसमाहिता
ॐ ध्यायेन्नित्यं महेशं रजतगिरिनिभं चारुचन्द्रावतंसं रत्नाकल्पोज्ज्वलाङ्गं परशुमृगवराभीतिहस्तं प्रसन्नम्
पद्मासीनं समन्तात्स्तुतम् अमरगणैर्व्याघ्रकृत्तिं वसानं विश्वाद्यं विश्वबीजं निखिलभयहरं पञ्चवक्त्रं त्रिनेत्रम्
tasya dhyānaṃ pravakṣyāmi śṛṇuṣva susamāhitā
oṃ dhyāyennityaṃ maheśaṃ rajatagirinibhaṃ cārucandrāvataṃsaṃ ratnākalpojjvalāṅgaṃ paraśumṛgavarābhītihastaṃ prasannam
padmāsīnaṃ samantātstutam amaragaṇairvyāghrakṛttiṃ vasānaṃ viśvādyaṃ viśvabījaṃ nikhilabhayaharaṃ pañcavaktraṃ trinetram
- 18
पुष्पं शिरसि संधार्य मानसैः पूजनं चरेत्
पुनर्ध्यात्वा महेशानि शिवे पुष्पं निधाय च
puṣpaṃ śirasi saṃdhārya mānasaiḥ pūjanaṃ caret
punardhyātvā maheśāni śive puṣpaṃ nidhāya ca
- 19
पिनाकधृगिति चोच्चार्य इहागच्छ द्वयं वदेत्
इह तिष्ठ ततो द्वंद्वं संनिधेहि द्वयम् इह
pinākadhṛgiti coccārya ihāgaccha dvayaṃ vadet
iha tiṣṭha tato dvaṃdvaṃ saṃnidhehi dvayam iha
- 20
इह सन्नि ततो रुद्धस्वशब्दं च ततो वदेत्
यावत्पूजां समुच्चार्य ततश्चैवं करोम्यहम्
iha sanni tato ruddhasvaśabdaṃ ca tato vadet
yāvatpūjāṃ samuccārya tataścaivaṃ karomyaham
- 21
स्नानीयं च पशुपतिं ङेयुक्तं च नमश्चरेत्
वेदाद्यं योजयेद्देवि ब्राह्मणः साधकोत्तमः
snānīyaṃ ca paśupatiṃ ṅeyuktaṃ ca namaścaret
vedādyaṃ yojayeddevi brāhmaṇaḥ sādhakottamaḥ
- 22
एतत्पाद्यं महेशानि षडक्षरमनुं ततः
नमस्कारं समुच्चार्य सर्वं दद्याद्विचक्षणः
etatpādyaṃ maheśāni ṣaḍakṣaramanuṃ tataḥ
namaskāraṃ samuccārya sarvaṃ dadyādvicakṣaṇaḥ
- 23
पूजयित्वा महेशानि चाष्टमूर्तिं प्रपूजयेत्
शर्वो भवस्तथा रुद्र उग्रो भीमः पशोः पतिः
pūjayitvā maheśāni cāṣṭamūrtiṃ prapūjayet
śarvo bhavastathā rudra ugro bhīmaḥ paśoḥ patiḥ
- 24
महादेवं च ईशानं ङेयुतं कुरु यत्नतः
क्षितिं जलं तथा चाग्निं वायुं चाकाशमेव च
mahādevaṃ ca īśānaṃ ṅeyutaṃ kuru yatnataḥ
kṣitiṃ jalaṃ tathā cāgniṃ vāyuṃ cākāśameva ca
- 25
यजमानं तथा सोमं सूर्यं च मूर्तिना सह
सर्वत्र ङेयुतं कृत्वा पूजयेत्साधकोत्तमः
yajamānaṃ tathā somaṃ sūryaṃ ca mūrtinā saha
sarvatra ṅeyutaṃ kṛtvā pūjayetsādhakottamaḥ
- 26
प्रणवादिनमोऽन्तेन वामावर्तेन पूजयेत्
मूर्तयोऽष्टौ शिवस्यैताः पूर्वादिक्रमयोगतः
praṇavādinamo'ntena vāmāvartena pūjayet
mūrtayo'ṣṭau śivasyaitāḥ pūrvādikramayogataḥ
- 27
आग्नेय्यान्ताः प्रपूज्याथ विद्यां लिङ्गिशिवं यजेत्
अष्टोत्तरसहस्रं वा शतं वा प्रजपेत्ततः
āgneyyāntāḥ prapūjyātha vidyāṃ liṅgiśivaṃ yajet
aṣṭottarasahasraṃ vā śataṃ vā prajapettataḥ
- 28
गुह्यातिगुह्यगोप्ता त्वं गृहाणास्मत्कृतं जपम्
सिद्धिर्भवतु मे देव त्वत्प्रसादान्महेश्वर
guhyātiguhyagoptā tvaṃ gṛhāṇāsmatkṛtaṃ japam
siddhirbhavatu me deva tvatprasādānmaheśvara
- 29
ततस्तोयं समादाय जपं चैव समर्पयेत्
मुखवाद्यं ततः कृत्वा चाष्टाङ्गं प्रणमेत्सुधीः
tatastoyaṃ samādāya japaṃ caiva samarpayet
mukhavādyaṃ tataḥ kṛtvā cāṣṭāṅgaṃ praṇametsudhīḥ
- 30
संहारेण महादेव क्षमस्वेति विसर्जयेत्
एवं पूजा प्रकर्तव्या शक्तिमन्त्रान्यजेद्यदि
saṃhāreṇa mahādeva kṣamasveti visarjayet
evaṃ pūjā prakartavyā śaktimantrānyajedyadi

