12 shlokas
- 1
श्रीदेवी उवाच
काकीचञ्चुं महामुद्रां कथयस्व दयानिधे
येन रूपेण देवेश देहासनपरो भवेत्
śrīdevī uvāca
kākīcañcuṃ mahāmudrāṃ kathayasva dayānidhe
yena rūpeṇa deveśa dehāsanaparo bhavet
- 2
श्रीशिव उवाच
अनाकुलेन देवेशि जिह्वां परमयत्नतः
तालुमूले न्यसेत्पश्चात्ततो वायुं पिबेत्शनैः
śrīśiva uvāca
anākulena deveśi jihvāṃ paramayatnataḥ
tālumūle nyasetpaścāttato vāyuṃ pibetśanaiḥ
- 3
दन्तैर्दन्तान्समापीड्य काकीचञ्चुं समभ्यसेत्
बहुयोन्युक्तविधिना सर्वकर्माणि साधयेत्
dantairdantānsamāpīḍya kākīcañcuṃ samabhyaset
bahuyonyuktavidhinā sarvakarmāṇi sādhayet
- 4
अथातः सम्प्रवक्ष्यामि स्वल्पयोनिं शृणु प्रिये
गुदछिद्रे दक्षगुल्फं संधौ लिङ्गं विनिक्षिपेत्
athātaḥ sampravakṣyāmi svalpayoniṃ śṛṇu priye
gudachidre dakṣagulphaṃ saṃdhau liṅgaṃ vinikṣipet
- 5
नाभिरन्ध्रेऽथवा गुल्फं धारयेद्वामहस्तके
बहुयोन्युक्तविधिना चान्यत्सर्वं समापयेत्
nābhirandhre'thavā gulphaṃ dhārayedvāmahastake
bahuyonyuktavidhinā cānyatsarvaṃ samāpayet
- 6
मुद्रा चैतन्यतन्त्रे च माहात्म्यं कथितं मया
यथा हेमगिरिर्देवि यथा वेगवती नदी
mudrā caitanyatantre ca māhātmyaṃ kathitaṃ mayā
yathā hemagirirdevi yathā vegavatī nadī
- 7
चन्द्रादिकं यथा देवि चिरजीवी तथा भवेत्
श्रीदेवी उवाच
दशावतारं देवेश ब्रूहि मे जगतां गुरो
candrādikaṃ yathā devi cirajīvī tathā bhavet
śrīdevī uvāca
daśāvatāraṃ deveśa brūhi me jagatāṃ guro
- 8
इदानीं श्रोतुमिच्छामि कथयस्व सुविस्तरात्
का वा देवी कथंभूता वद मे परमेश्वर
idānīṃ śrotumicchāmi kathayasva suvistarāt
kā vā devī kathaṃbhūtā vada me parameśvara
- 9
श्रीशिव उवाच
तारा देवी नीलरूपा वगला कूर्ममूर्तिका
धूमावती वराहं स्यात्छिन्नमस्ता नृसिंहिका
śrīśiva uvāca
tārā devī nīlarūpā vagalā kūrmamūrtikā
dhūmāvatī varāhaṃ syātchinnamastā nṛsiṃhikā
- 10
भुवनेश्वरी वामनः स्यान्मातंगी राममूर्तिका
त्रिपुरा जामदग्न्यः स्याद्बलभद्रस्तु भैरवी
bhuvaneśvarī vāmanaḥ syānmātaṃgī rāmamūrtikā
tripurā jāmadagnyaḥ syādbalabhadrastu bhairavī
- 11
महालक्ष्मीर्भवेत्बुद्धो दुर्गा स्यात्कल्किरूपिणी
स्वयं भगवती काली कृष्णमूर्तिः समुद्भवा
mahālakṣmīrbhavetbuddho durgā syātkalkirūpiṇī
svayaṃ bhagavatī kālī kṛṣṇamūrtiḥ samudbhavā
- 12
इति ते कथितं देव्यवतारं दशममेव हि
एतासां पूजनाद्देवि महादेवसमो भवेत्
आसां ध्यानादिकं सर्वं कथितं मे पुरा तव
iti te kathitaṃ devyavatāraṃ daśamameva hi
etāsāṃ pūjanāddevi mahādevasamo bhavet
āsāṃ dhyānādikaṃ sarvaṃ kathitaṃ me purā tava

