22 shlokas
- 1
श्रीदेवी उवाच
सार्धत्रिकोटिनाडीनाम् आलयं च कलेवरम्
क्रमेण श्रोतुम् इच्छामि तद्वदस्व मयि प्रभो
śrīdevī uvāca
sārdhatrikoṭināḍīnām ālayaṃ ca kalevaram
krameṇa śrotum icchāmi tadvadasva mayi prabho
- 2
श्रीशिव उवाच
लोम्नि कूपे सपादार्धकोटयश्चैव सुन्दरि
हस्तास्ये च तदा पादेऽग्निलक्षनाडयः स्थिताः
śrīśiva uvāca
lomni kūpe sapādārdhakoṭayaścaiva sundari
hastāsye ca tadā pāde'gnilakṣanāḍayaḥ sthitāḥ
- 3
उदरे च तथा पायौ पञ्चलक्षाः प्रकीर्तिताः
हृदादिसर्वगात्रेषु नवलक्षाः प्रकीर्तिताः
udare ca tathā pāyau pañcalakṣāḥ prakīrtitāḥ
hṛdādisarvagātreṣu navalakṣāḥ prakīrtitāḥ
- 4
अथ पार्श्वे तथा चर्मे तथैव सर्वसंधिषु
रुद्रान्न्यूनं स्थितं लक्षं शरीरे नाडयः प्रिये
atha pārśve tathā carme tathaiva sarvasaṃdhiṣu
rudrānnyūnaṃ sthitaṃ lakṣaṃ śarīre nāḍayaḥ priye
- 5
इडा च पिङ्गला चैव सुषुम्ना चित्रिणी तथा
ब्रह्मनाडी च तन्मध्ये पञ्चनाड्यः प्रकीर्तिताः
iḍā ca piṅgalā caiva suṣumnā citriṇī tathā
brahmanāḍī ca tanmadhye pañcanāḍyaḥ prakīrtitāḥ
- 6
कुहूश्च शङ्खिनी चैव गान्धारी हस्तिजिह्विका
नर्दिनी च तथा निद्रा रुद्रसंख्या व्यवस्थिता
kuhūśca śaṅkhinī caiva gāndhārī hastijihvikā
nardinī ca tathā nidrā rudrasaṃkhyā vyavasthitā
- 7
एता नाड्यः परेशानि सुषुम्नायाः प्रजायते
श्रीदेवी उवाच
वेदाक्षिवसुरन्ध्रास्तु बाणसंख्यजलान्तकाः
किमाधारे पद्ममध्ये संस्थिताः परमेश्वर
etā nāḍyaḥ pareśāni suṣumnāyāḥ prajāyate
śrīdevī uvāca
vedākṣivasurandhrāstu bāṇasaṃkhyajalāntakāḥ
kimādhāre padmamadhye saṃsthitāḥ parameśvara
- 8
श्रीशिव उवाच
योगपद्मस्य माहात्म्यं मया वक्तुं न शक्यते
मूलाधारे पद्ममध्ये लंबीजं चातिशोभनम्
śrīśiva uvāca
yogapadmasya māhātmyaṃ mayā vaktuṃ na śakyate
mūlādhāre padmamadhye laṃbījaṃ cātiśobhanam
- 9
लंबीजस्य बिन्दुमध्ये पृथ्वीचक्रं मनोहरम्
वलयाकाररूपेण समुद्राः सप्तकाः स्थिताः
laṃbījasya bindumadhye pṛthvīcakraṃ manoharam
valayākārarūpeṇa samudrāḥ saptakāḥ sthitāḥ
- 10
श्रीदेवी उवाच
बिन्दुमानं महादेव कथयस्व मयि प्रभो
क्रमेण योगपद्मस्य प्रमाणं वद शंकर
śrīdevī uvāca
bindumānaṃ mahādeva kathayasva mayi prabho
krameṇa yogapadmasya pramāṇaṃ vada śaṃkara
- 11
श्रीशिव उवाच
परमाणुत्रिभागैकभागं बिन्दुं सुविस्तरम्
तन्मध्ये सागराः सर्वे सप्तद्वीपा वसुंधरा
śrīśiva uvāca
paramāṇutribhāgaikabhāgaṃ binduṃ suvistaram
tanmadhye sāgarāḥ sarve saptadvīpā vasuṃdharā
- 12
अव्ययं परमं सूक्ष्मं बिन्दुरूपं परं शिवम्
प्रमाणं चास्य देवस्य किं वक्तुं शक्यते मया
avyayaṃ paramaṃ sūkṣmaṃ bindurūpaṃ paraṃ śivam
pramāṇaṃ cāsya devasya kiṃ vaktuṃ śakyate mayā
- 13
ब्रह्मलोकं परेशानि नादोपरि विचिन्तयेत्
डाकिनीसहितो ब्रह्मा तथैव निवसेत्सदा
brahmalokaṃ pareśāni nādopari vicintayet
ḍākinīsahito brahmā tathaiva nivasetsadā
- 14
लकारं पार्थिवं बीजं शक्तिरूपं सुरेश्वरि
पृथ्वीचक्रस्य मध्ये तु स्वयम्भूलिङ्गम् अद्भुतम्
lakāraṃ pārthivaṃ bījaṃ śaktirūpaṃ sureśvari
pṛthvīcakrasya madhye tu svayambhūliṅgam adbhutam
- 15
सार्धत्रिवलयाकारकुण्डल्या वेष्टितं सदा
लिङ्गच्छिद्रं स्ववक्त्रेण कुण्डल्याच्छाद्य संस्थिता
sārdhatrivalayākārakuṇḍalyā veṣṭitaṃ sadā
liṅgacchidraṃ svavaktreṇa kuṇḍalyācchādya saṃsthitā
- 16
तेनैव वर्तते वायुरिडापिङ्गलयोः सदा
सहस्रारदर्शनाय सदा जाग्रत्स्वरूपिणी
tenaiva vartate vāyuriḍāpiṅgalayoḥ sadā
sahasrāradarśanāya sadā jāgratsvarūpiṇī
- 17
यदैव ब्रह्ममार्गेण सहस्रारे समुत्थिता
तदैव परमेशानि श्वासोच्छ्वासविकाशनम्
yadaiva brahmamārgeṇa sahasrāre samutthitā
tadaiva parameśāni śvāsocchvāsavikāśanam
- 18
केसरस्य तु मध्ये च चतुःपत्त्रे सुरेश्वरि
अनन्तरूपिणी दुर्गा शम्भुश्चानन्तरूपधृक्
kesarasya tu madhye ca catuḥpattre sureśvari
anantarūpiṇī durgā śambhuścānantarūpadhṛk
- 19
नानासुखविलासेन सदा कामेन वर्तते
श्रीदेवी उवाच
लिङ्गच्छिद्रं समाकृष्य संस्थिता कुण्डली कथम्
nānāsukhavilāsena sadā kāmena vartate
śrīdevī uvāca
liṅgacchidraṃ samākṛṣya saṃsthitā kuṇḍalī katham
- 20
कथयस्व सदानन्द सर्वज्ञस्त्वं सुरेश्वर
श्रीशिव उवाच
लिङ्गमध्ये महत्तेजो वह्निरूपं च सुन्दरि
kathayasva sadānanda sarvajñastvaṃ sureśvara
śrīśiva uvāca
liṅgamadhye mahattejo vahnirūpaṃ ca sundari
- 21
यत्किंचिद्वायुयोगेन ब्रह्माण्डो दह्यते यतः
अतः सा कुण्डली देवी मुखेनाच्छाद्य संस्थिता
yatkiṃcidvāyuyogena brahmāṇḍo dahyate yataḥ
ataḥ sā kuṇḍalī devī mukhenācchādya saṃsthitā
- 22
तेनैव पार्थिवे लिङ्गे बिन्दुशक्तिं नियोजयेत्
बिन्दुशक्तिं समुत्थाप्य लिङ्गपूजा प्रकीर्तिता
tenaiva pārthive liṅge binduśaktiṃ niyojayet
binduśaktiṃ samutthāpya liṅgapūjā prakīrtitā

