25 shlokas
- 1
श्रीशिव उवाच
शृणु देवि प्रवक्ष्यामि योगसारं समासतः
ऊर्ध्वमूलम् अधःशाखं वृक्षाकारं कलेवरम्
śrīśiva uvāca
śṛṇu devi pravakṣyāmi yogasāraṃ samāsataḥ
ūrdhvamūlam adhaḥśākhaṃ vṛkṣākāraṃ kalevaram
- 2
ब्रह्माण्डे यानि तीर्थानि तानि सन्ति कलेवरे
बृहद्ब्रह्माण्डं यद्रूपं तद्रूपं क्षुद्ररूपकम्
brahmāṇḍe yāni tīrthāni tāni santi kalevare
bṛhadbrahmāṇḍaṃ yadrūpaṃ tadrūpaṃ kṣudrarūpakam
- 3
ब्रह्माण्डे वर्तते तीर्थं सार्धकोटित्रयात्मकम्
द्विसप्ततिसहस्राणि प्रकाशं वीरवन्दिते
brahmāṇḍe vartate tīrthaṃ sārdhakoṭitrayātmakam
dvisaptatisahasrāṇi prakāśaṃ vīravandite
- 4
चतुर्दशं तु तन्मध्ये तन्मध्ये त्रितयं शुभम्
तन्मध्ये परमेशानि महाधीरा च मुक्तिदा
caturdaśaṃ tu tanmadhye tanmadhye tritayaṃ śubham
tanmadhye parameśāni mahādhīrā ca muktidā
- 5
वासुकी या महामाया भुजगाकाररूपिणी
सार्धत्रिवलयाकारा पातालतलवासिनी
vāsukī yā mahāmāyā bhujagākārarūpiṇī
sārdhatrivalayākārā pātālatalavāsinī
- 6
सप्तस्वर्गं परेशानि क्रमेण शृणु सादरम्
भूर्लोकं च भुवर्लोकं स्वर्लोकं महसं तथा
saptasvargaṃ pareśāni krameṇa śṛṇu sādaram
bhūrlokaṃ ca bhuvarlokaṃ svarlokaṃ mahasaṃ tathā
- 7
जनलोकं तपश्चैव सत्यलोकं वरानने
सप्तस्वर्गमिदं भद्रे पातालं शृणु यत्नतः
janalokaṃ tapaścaiva satyalokaṃ varānane
saptasvargamidaṃ bhadre pātālaṃ śṛṇu yatnataḥ
- 8
अतलं वितलं चैव सुतलं च तलातलम्
महातलं च पातालं रसातलमतः परम्
atalaṃ vitalaṃ caiva sutalaṃ ca talātalam
mahātalaṃ ca pātālaṃ rasātalamataḥ param
- 9
रसातलाच्च सत्यान्तं महाधीरा प्रतिष्ठिता
मेरुमध्यस्थिता नाडी महाधीरा च मुक्तिदा
rasātalācca satyāntaṃ mahādhīrā pratiṣṭhitā
merumadhyasthitā nāḍī mahādhīrā ca muktidā
- 10
सत्यलोके महाविष्णुं शिवं ब्रह्माण्डसंज्ञकम्
तस्य संदर्शनार्थाय वासुकी व्याकुला सदा
satyaloke mahāviṣṇuṃ śivaṃ brahmāṇḍasaṃjñakam
tasya saṃdarśanārthāya vāsukī vyākulā sadā
- 11
स्वर्गषट्कं भेदयित्वा उत्थिता वासुकी यदा
सर्वाः समुद्रगामिन्य ऊर्ध्वस्रोता भवन्ति हि
svargaṣaṭkaṃ bhedayitvā utthitā vāsukī yadā
sarvāḥ samudragāminya ūrdhvasrotā bhavanti hi
- 12
एवं क्रमेण देवेशि शरीरे नाडयः स्थिताः
इडा च पिङ्गला चैव सुषुम्णा मध्यवर्तिनी
evaṃ krameṇa deveśi śarīre nāḍayaḥ sthitāḥ
iḍā ca piṅgalā caiva suṣumṇā madhyavartinī
- 13
नाडीद्वयेन देवेशि समीरं पूरयेद्यदि
ततस्तु प्राणमन्त्रेण कुण्डली च क्रमं चरेत्
nāḍīdvayena deveśi samīraṃ pūrayedyadi
tatastu prāṇamantreṇa kuṇḍalī ca kramaṃ caret
- 14
सहस्रारे महापद्मे नित्ये चाव्ययपङ्कजे
त्रासयुक्ता कुण्डलिनी प्रविशेन्नित्यमन्दिरम्
sahasrāre mahāpadme nitye cāvyayapaṅkaje
trāsayuktā kuṇḍalinī praviśennityamandiram
- 15
सर्वाः पातालगामिन्य ऊर्ध्वस्रोता भवन्ति हि
एतस्मिन्समये देवि वर्णमालां विचिन्तयेत्
sarvāḥ pātālagāminya ūrdhvasrotā bhavanti hi
etasminsamaye devi varṇamālāṃ vicintayet
- 16
अष्टोत्तरशतं मूलमन्त्रं ज्ञानेन संजपेत्
आनयेत्तेन मार्गेण मूलाधारे पुनः सुधीः
aṣṭottaraśataṃ mūlamantraṃ jñānena saṃjapet
ānayettena mārgeṇa mūlādhāre punaḥ sudhīḥ
- 17
षट्चक्रदेवतास्तत्र संतर्प्यामृतधारया
अथान्यत्सम्प्रवक्ष्यामि योनिमुद्रासनं प्रिये
ṣaṭcakradevatāstatra saṃtarpyāmṛtadhārayā
athānyatsampravakṣyāmi yonimudrāsanaṃ priye
- 18
उपविश्यासने मन्त्री प्राङ्मुखो वाप्य् उदङ्मुखः
जानुद्वयं कराभ्यां च प्रकुर्याद्दृढबन्धनम्
upaviśyāsane mantrī prāṅmukho vāpy udaṅmukhaḥ
jānudvayaṃ karābhyāṃ ca prakuryāddṛḍhabandhanam
- 19
ऋजुकायेन देवेशि आजानु नासिकां नयेत्
प्राणमन्त्रेण देवेशि समीरं बहुयत्नतः
ṛjukāyena deveśi ājānu nāsikāṃ nayet
prāṇamantreṇa deveśi samīraṃ bahuyatnataḥ
- 20
पूरयेत्परमेशानि किंचिद्वायुं न रेचयेत्
ऋजुकायं परेशानि विपरीतं प्रयत्नतः
pūrayetparameśāni kiṃcidvāyuṃ na recayet
ṛjukāyaṃ pareśāni viparītaṃ prayatnataḥ
- 21
पूर्वोक्तेनैव विधिना अष्टोत्तरशतं जपेत्
षट्चक्रदेवतास्तत्र संतर्प्यामृतधारया
pūrvoktenaiva vidhinā aṣṭottaraśataṃ japet
ṣaṭcakradevatāstatra saṃtarpyāmṛtadhārayā
- 22
आनयेत्तेन मार्गेण मूलाधारे वरानने
अशेषरोगशमनं योनिमुद्रासनं प्रिये
ānayettena mārgeṇa mūlādhāre varānane
aśeṣarogaśamanaṃ yonimudrāsanaṃ priye
- 23
बहु किं कथ्यते देवि महाव्याधिविनाशनम्
बहु किं कथ्यते देवि मन्त्रचैतन्यकारणम्
bahu kiṃ kathyate devi mahāvyādhivināśanam
bahu kiṃ kathyate devi mantracaitanyakāraṇam
- 24
आत्मसाक्षात्करी मुद्रा महामोक्षप्रदायिनी
शतवक्त्रं यदि भवेत्तदा वक्तुं न शक्यते
ātmasākṣātkarī mudrā mahāmokṣapradāyinī
śatavaktraṃ yadi bhavettadā vaktuṃ na śakyate
- 25
पञ्चवक्त्रेण देवेशि किं मया कथ्यतेऽधुना
कुष्ठरोगविशिष्टोऽपि स भवेत्कामरूपकः
pañcavaktreṇa deveśi kiṃ mayā kathyate'dhunā
kuṣṭharogaviśiṣṭo'pi sa bhavetkāmarūpakaḥ

