25 shlokas
- 1
श्रीदेव्य् उवाच
ब्रूहि मे जगतां नाथ सर्वविद्यामय प्रभो
महाविद्यासु सर्वासु पूज्यासु भुवनत्रये
śrīdevy uvāca
brūhi me jagatāṃ nātha sarvavidyāmaya prabho
mahāvidyāsu sarvāsu pūjyāsu bhuvanatraye
- 2
एतासां दक्षिणे भागे नानारूपं पिनाकधृक्
पृथक्पृथक्महादेव कथयस्व मयि प्रभो
etāsāṃ dakṣiṇe bhāge nānārūpaṃ pinākadhṛk
pṛthakpṛthakmahādeva kathayasva mayi prabho
- 3
श्रीशिव उवाच
शृणु चार्वङ्गि सुभगे कालिकायाश्च भैरवम्
महाकालं दक्षिणाया दक्षभागे प्रपूजयेत्
śrīśiva uvāca
śṛṇu cārvaṅgi subhage kālikāyāśca bhairavam
mahākālaṃ dakṣiṇāyā dakṣabhāge prapūjayet
- 4
महाकालेन वै सार्धं दक्षिणा रमते सदा
ताराया दक्षिणे भागे अक्षोभ्यं परिपूजयेत्
mahākālena vai sārdhaṃ dakṣiṇā ramate sadā
tārāyā dakṣiṇe bhāge akṣobhyaṃ paripūjayet
- 5
समुद्रमथने देवि कालकूटं समुत्थितम्
सर्वे देवाः सदाराश्च महाक्षोभम् अवाप्नुयुः
samudramathane devi kālakūṭaṃ samutthitam
sarve devāḥ sadārāśca mahākṣobham avāpnuyuḥ
- 6
क्षोभादिरहितं यस्मात्पीतं हालाहलं विषम्
अत एव महेशानि अक्षोभ्यः परिकीर्तितः
kṣobhādirahitaṃ yasmātpītaṃ hālāhalaṃ viṣam
ata eva maheśāni akṣobhyaḥ parikīrtitaḥ
- 7
तेन सार्धं महामाया तारिणी रमते सदा
महात्रिपुरसुन्दर्या दक्षिणे पूजयेच्छिवम्
tena sārdhaṃ mahāmāyā tāriṇī ramate sadā
mahātripurasundaryā dakṣiṇe pūjayecchivam
- 8
पञ्चवक्त्रं त्रिनेत्रं च प्रतिवक्त्रे सुरेश्वरि
तेन सार्धं महादेवी सदा कामकुतूहला
pañcavaktraṃ trinetraṃ ca prativaktre sureśvari
tena sārdhaṃ mahādevī sadā kāmakutūhalā
- 9
अत एव महेशानि पञ्चमीति प्रकीर्तिता
श्रीमद्भुवनसुन्दर्या दक्षिणे त्र्यम्बकं यजेत्
ata eva maheśāni pañcamīti prakīrtitā
śrīmadbhuvanasundaryā dakṣiṇe tryambakaṃ yajet
- 10
स्वर्गे मर्त्ये च पाताले या चाद्या भुवनेश्वरी
एतासु रमते येन त्र्यम्बकस्तेन कथ्यते
svarge martye ca pātāle yā cādyā bhuvaneśvarī
etāsu ramate yena tryambakastena kathyate
- 11
सशक्तिश्च समाख्यातः सर्वतन्त्रप्रपूजितः
भैरव्या दक्षिणे भागे दक्षिणामूर्तिसंज्ञकम्
saśaktiśca samākhyātaḥ sarvatantraprapūjitaḥ
bhairavyā dakṣiṇe bhāge dakṣiṇāmūrtisaṃjñakam
- 12
पूजयेत्परयत्नेन पञ्चवक्त्रं तमेव हि
छिन्नमस्तादक्षिणांशे कबन्धं पूजयेच्छिवम्
pūjayetparayatnena pañcavaktraṃ tameva hi
chinnamastādakṣiṇāṃśe kabandhaṃ pūjayecchivam
- 13
कबन्धपूजनाद्देवि सर्वसिद्धीश्वरो भवेत्
धूमावती महाविद्या विधवारूपधारिणी
kabandhapūjanāddevi sarvasiddhīśvaro bhavet
dhūmāvatī mahāvidyā vidhavārūpadhāriṇī
- 14
वगलाया दक्षभागे एकवक्त्रं प्रपूजयेत्
महारुद्रेति विख्यातं जगत्संहारकारकम्
vagalāyā dakṣabhāge ekavaktraṃ prapūjayet
mahārudreti vikhyātaṃ jagatsaṃhārakārakam
- 15
मातंगीदक्षिणांशे च मतंगं पूजयेच्छिवम्
तमेव दक्षिणामूर्तिं जगदानन्दरूपकम्
mātaṃgīdakṣiṇāṃśe ca mataṃgaṃ pūjayecchivam
tameva dakṣiṇāmūrtiṃ jagadānandarūpakam
- 16
कमलाया दक्षिणांशे विष्णुरूपं सदाशिवम्
पूजयेत्परमेशानि स सिद्धो नात्र संशयः
kamalāyā dakṣiṇāṃśe viṣṇurūpaṃ sadāśivam
pūjayetparameśāni sa siddho nātra saṃśayaḥ
- 17
पूजयेदन्नपूर्णाया दक्षिणे ब्रह्मरूपकम्
महामोक्षप्रदं देवं दशवक्त्रं महेश्वरम्
pūjayedannapūrṇāyā dakṣiṇe brahmarūpakam
mahāmokṣapradaṃ devaṃ daśavaktraṃ maheśvaram
- 18
दुर्गाया दक्षिणे देशे नारदं परिपूजयेत्
नाकारः सृष्टिकर्ता च दकारः पालकः सदा
durgāyā dakṣiṇe deśe nāradaṃ paripūjayet
nākāraḥ sṛṣṭikartā ca dakāraḥ pālakaḥ sadā
- 19
रेफः संहाररूपत्वान्नारदः परिकीर्तितः
अन्यासु सर्वविद्यासु ऋषिर्यः परिकीर्तितः
rephaḥ saṃhārarūpatvānnāradaḥ parikīrtitaḥ
anyāsu sarvavidyāsu ṛṣiryaḥ parikīrtitaḥ
- 20
स एव तस्या भर्ता च दक्षभागे प्रपूजयेत्
श्रीदेवी उवाच
या चाद्या परमा विद्या द्वितीया भैरवी परा
त्रैलोक्यजननी नित्या सा कथं शववाहना
sa eva tasyā bhartā ca dakṣabhāge prapūjayet
śrīdevī uvāca
yā cādyā paramā vidyā dvitīyā bhairavī parā
trailokyajananī nityā sā kathaṃ śavavāhanā
- 21
श्रीशिव उवाच
या चाद्या परमेशानि स्वयं कालस्वरूपिणी
श्रीशिवस्य हृदम्भोजे स्थिता संहाररूपिणी
śrīśiva uvāca
yā cādyā parameśāni svayaṃ kālasvarūpiṇī
śrīśivasya hṛdambhoje sthitā saṃhārarūpiṇī
- 22
अत एव महाकालो जगत्संहारकारकः
संहाररूपिणी काली यदा व्यक्तस्वरूपिणी
ata eva mahākālo jagatsaṃhārakārakaḥ
saṃhārarūpiṇī kālī yadā vyaktasvarūpiṇī
- 23
तदैव सहसा देवि शवरूपः सदाशिवः
तत्क्षणाच्चञ्चलापाङ्गि सा देवी शववाहना
tadaiva sahasā devi śavarūpaḥ sadāśivaḥ
tatkṣaṇāccañcalāpāṅgi sā devī śavavāhanā
- 24
श्रीदेवी उवाच
शवरूपो महादेव मृतदेहः सदाशिवः
मृतदेहं महादेव सलिलं वा कथं नहि
śrīdevī uvāca
śavarūpo mahādeva mṛtadehaḥ sadāśivaḥ
mṛtadehaṃ mahādeva salilaṃ vā kathaṃ nahi
- 25
श्रीशिव उवाच
यस्मिन्व्यक्ता महाकाली शक्तिहीनः सदाशिवः
शक्त्या युक्तो यदा देवि तदैव शिवरूपकः
शक्तिहीनः शवः साक्षात्पुरुषत्वं न मुञ्चति
śrīśiva uvāca
yasminvyaktā mahākālī śaktihīnaḥ sadāśivaḥ
śaktyā yukto yadā devi tadaiva śivarūpakaḥ
śaktihīnaḥ śavaḥ sākṣātpuruṣatvaṃ na muñcati

