38 shlokas
- 1
श्रीदेवी उवाच
महायोगमयी देवी खेचरी परमा कला
योगज्ञानं विना सिद्धिर्नास्ति सत्यं सुरेश्वर
śrīdevī uvāca
mahāyogamayī devī khecarī paramā kalā
yogajñānaṃ vinā siddhirnāsti satyaṃ sureśvara
- 2
ब्रूहि मे देवदेवेश क्षुद्रब्रह्माण्डमध्यतः
किमाधारे स्थिता नाथ सप्तद्वीपा वसुंधरा
brūhi me devadeveśa kṣudrabrahmāṇḍamadhyataḥ
kimādhāre sthitā nātha saptadvīpā vasuṃdharā
- 3
समुद्रसप्तकं नाथ किमाकारं प्रतिष्ठति
मूलाधारे महीचक्रे संस्थिता मानवादयः
samudrasaptakaṃ nātha kimākāraṃ pratiṣṭhati
mūlādhāre mahīcakre saṃsthitā mānavādayaḥ
- 4
क्षुद्ररूपा जनाः सर्वे किमाकारेण संस्थिताः
स्वकीयाङ्गुलिमानेन मारुतं कथय प्रभो
kṣudrarūpā janāḥ sarve kimākāreṇa saṃsthitāḥ
svakīyāṅgulimānena mārutaṃ kathaya prabho
- 5
श्रीशिव उवाच
मूलाधारे स्थिता देवि सप्तद्वीपा वसुंधरा
वलयाकाररूपेण समुद्राः सप्त संस्थिताः
śrīśiva uvāca
mūlādhāre sthitā devi saptadvīpā vasuṃdharā
valayākārarūpeṇa samudrāḥ sapta saṃsthitāḥ
- 6
जम्बुद्वीपं मध्यदेशे तद्बाह्ये लवणाम्बुधिः
शाकद्वीपं महेशानि तद्बाह्ये दधिसागरः
jambudvīpaṃ madhyadeśe tadbāhye lavaṇāmbudhiḥ
śākadvīpaṃ maheśāni tadbāhye dadhisāgaraḥ
- 7
तद्बाह्ये शाल्मलीद्वीपं सागरो दुग्धतद्बहिः
तद्बाह्ये पाटलाद्वीपं तद्बाह्ये तु जलान्तकः
tadbāhye śālmalīdvīpaṃ sāgaro dugdhatadbahiḥ
tadbāhye pāṭalādvīpaṃ tadbāhye tu jalāntakaḥ
- 8
पृथिव्यां वर्तते देवि यद्रूपा मानवादयः
तेन रूपेण देवेशि मूलाधारे तु जन्तवः
pṛthivyāṃ vartate devi yadrūpā mānavādayaḥ
tena rūpeṇa deveśi mūlādhāre tu jantavaḥ
- 9
षण्णवत्यङ्गुलं देवि मारुतं परिकीर्तितम्
मार्तण्डस्थितिमानं तु अधिकं परिकीर्तितम्
ṣaṇṇavatyaṅgulaṃ devi mārutaṃ parikīrtitam
mārtaṇḍasthitimānaṃ tu adhikaṃ parikīrtitam
- 10
श्रीदेवी उवाच
कियद्भुवं तु ब्रह्माण्डं वद भूतलवासिनः
अङ्गुल्येकेन किं मानं कथयस्व दयानिधे
śrīdevī uvāca
kiyadbhuvaṃ tu brahmāṇḍaṃ vada bhūtalavāsinaḥ
aṅgulyekena kiṃ mānaṃ kathayasva dayānidhe
- 11
श्रीशिव उवाच
अङ्गुल्येकेन देवेशि सहस्राब्दं प्रजायते
षण्णवतिसहस्राब्दं भवेद्भूतलवासिनः
śrīśiva uvāca
aṅgulyekena deveśi sahasrābdaṃ prajāyate
ṣaṇṇavatisahasrābdaṃ bhavedbhūtalavāsinaḥ
- 12
पादाङ्गुष्ठादिगुल्फान्तं प्रिये रन्ध्रसहस्रकम्
रन्ध्रं चन्द्रसहस्राब्दं गुल्फादिजानुसंधिषु
pādāṅguṣṭhādigulphāntaṃ priye randhrasahasrakam
randhraṃ candrasahasrābdaṃ gulphādijānusaṃdhiṣu
- 13
जान्वादिगुदपर्यन्तं मानं विंशसहस्रकम्
मूलाधारादिलिङ्गान्तं चतुर्वर्षसहस्रकम्
jānvādigudaparyantaṃ mānaṃ viṃśasahasrakam
mūlādhārādiliṅgāntaṃ caturvarṣasahasrakam
- 14
लिङ्गादिनाभिपर्यन्तं भवेदृषिसहस्रकम्
नाभ्यादिहृदयान्तं च ग्रहसंख्यसहस्रकम्
liṅgādinābhiparyantaṃ bhavedṛṣisahasrakam
nābhyādihṛdayāntaṃ ca grahasaṃkhyasahasrakam
- 15
हृदादिकण्ठपर्यन्तमृषिसंख्यसहस्रकम्
विशुद्धादिकमाज्ञान्तं मानं रुद्रसहस्रकम्
hṛdādikaṇṭhaparyantamṛṣisaṃkhyasahasrakam
viśuddhādikamājñāntaṃ mānaṃ rudrasahasrakam
- 16
आज्ञाचक्राच्छिवान्तं वै दिक्सहस्रं सुरेश्वरि
सूर्यसंख्यासहस्रं तु समीरश्चाधिकः स्मृतः
ājñācakrācchivāntaṃ vai diksahasraṃ sureśvari
sūryasaṃkhyāsahasraṃ tu samīraścādhikaḥ smṛtaḥ
- 17
शरीरसहकारेण हासो वृद्धिश्च जायते
षड्गुणो रतिकाले च त्रिगुणो भोजनाद्बहिः
śarīrasahakāreṇa hāso vṛddhiśca jāyate
ṣaḍguṇo ratikāle ca triguṇo bhojanādbahiḥ
- 18
धमने चाष्टधा प्रोक्तः समीरो वृद्धितां गतः
सद्गुरोर् उपदेशेन मन्त्रमार्गेण पार्वति
dhamane cāṣṭadhā proktaḥ samīro vṛddhitāṃ gataḥ
sadguror upadeśena mantramārgeṇa pārvati
- 19
यदि चैकाङ्गुलं ह्रस्वं सहस्राब्दं स जीवति
एवं क्रमेण देवेशि समता यदि वा भवेत्
yadi caikāṅgulaṃ hrasvaṃ sahasrābdaṃ sa jīvati
evaṃ krameṇa deveśi samatā yadi vā bhavet
- 20
जित्वा मृत्युं महेशानि शम्भुवद्विहरेत्क्षितौ
अत एव महेशानि योनिमुद्रा मयोदिता
jitvā mṛtyuṃ maheśāni śambhuvadviharetkṣitau
ata eva maheśāni yonimudrā mayoditā
- 21
प्राणायामेन देवेशि तथैव योनिमुद्रया
तथैवाभ्यासयोगेन यदि वायुः समो भवेत्
prāṇāyāmena deveśi tathaiva yonimudrayā
tathaivābhyāsayogena yadi vāyuḥ samo bhavet
- 22
जित्वा मृत्युं महेशानि खेचरो जायतेऽचिरात्
प्रमाणं कथितं सर्वं मनुष्यस्य प्रियंवदे
jitvā mṛtyuṃ maheśāni khecaro jāyate'cirāt
pramāṇaṃ kathitaṃ sarvaṃ manuṣyasya priyaṃvade
- 23
श्वासोच्छ्वासविकासेन कुण्डली गगनं चरेत्
श्रीदेवी उवाच
इदानीं पृथिवीमानं वद मे परमेश्वर
śvāsocchvāsavikāsena kuṇḍalī gaganaṃ caret
śrīdevī uvāca
idānīṃ pṛthivīmānaṃ vada me parameśvara
- 24
सप्तस्वर्गस्थितो यो यो या या शक्तिः स्थिता सदा
तत्सर्वं श्रोतुमिच्छामि यदि स्नेहोऽस्ति मां प्रति
saptasvargasthito yo yo yā yā śaktiḥ sthitā sadā
tatsarvaṃ śrotumicchāmi yadi sneho'sti māṃ prati
- 25
श्रीशिव उवाच
मूलाधारे महीचक्रे संस्थिता मानवादयः
तेषां मानेन देवेशि चार्धं चैव द्विसप्ततिः
śrīśiva uvāca
mūlādhāre mahīcakre saṃsthitā mānavādayaḥ
teṣāṃ mānena deveśi cārdhaṃ caiva dvisaptatiḥ
- 26
द्विगुणः परमेशानि तद्बाह्ये लवणाम्बुधिः
एवं क्रमेण देवेशि द्विगुणं परिकीर्तितम्
dviguṇaḥ parameśāni tadbāhye lavaṇāmbudhiḥ
evaṃ krameṇa deveśi dviguṇaṃ parikīrtitam
- 27
डाकिनीसहितो ब्रह्मा मूलाधारे तु सुन्दरि
राकिणीसहितो विष्णुः स्वाधिष्ठाने व्यवस्थितः
ḍākinīsahito brahmā mūlādhāre tu sundari
rākiṇīsahito viṣṇuḥ svādhiṣṭhāne vyavasthitaḥ
- 28
लाकिनीसहितो रुद्रो मणिपूरे सुरेश्वरि
अनाहते महापद्मे काकिनीसहितो हरः
lākinīsahito rudro maṇipūre sureśvari
anāhate mahāpadme kākinīsahito haraḥ
- 29
विशुद्धाख्ये वसेन्नित्या साकिनी च सदाशिवः
हाकिनी परशिवो देवश्चाज्ञाचक्रे सुरेश्वरि
viśuddhākhye vasennityā sākinī ca sadāśivaḥ
hākinī paraśivo devaścājñācakre sureśvari
- 30
सहस्रारे महापद्मे विश्वरूपः परः शिवः
महाकुण्डलिनी तत्र स्थिता नित्या सुरेश्वरि
sahasrāre mahāpadme viśvarūpaḥ paraḥ śivaḥ
mahākuṇḍalinī tatra sthitā nityā sureśvari

