57 shlokas
- 1
श्रीदेवी उवाच
श्रुतं महाकालिकाया मन्त्रं परमगोपनम्
संक्षेपं कथितं नाथ वासनां वद मां प्रति
śrīdevī uvāca
śrutaṃ mahākālikāyā mantraṃ paramagopanam
saṃkṣepaṃ kathitaṃ nātha vāsanāṃ vada māṃ prati
- 2
श्रीशिव उवाच
शृणु देवि महामन्त्रवासनां सर्वसिद्धिदाम्
यस्याः श्रवणमात्रेण मन्त्राः सिद्धा भवन्ति हि
śrīśiva uvāca
śṛṇu devi mahāmantravāsanāṃ sarvasiddhidām
yasyāḥ śravaṇamātreṇa mantrāḥ siddhā bhavanti hi
- 3
ककारस्योर्ध्वकोणेषु प्राणो वायुः प्रतिष्ठितः
अपानो वायुकोणे च समानो मध्यदेशतः
kakārasyordhvakoṇeṣu prāṇo vāyuḥ pratiṣṭhitaḥ
apāno vāyukoṇe ca samāno madhyadeśataḥ
- 4
उदानो ऽङ्कुशकोणे च मात्रायां व्यान एव च
बीजं तु कालिकारूपं प्रकारं शृणु पार्वति
udāno 'ṅkuśakoṇe ca mātrāyāṃ vyāna eva ca
bījaṃ tu kālikārūpaṃ prakāraṃ śṛṇu pārvati
- 5
कलाभागे जटाजूटं केशं च परमेश्वरि
बिन्दुमस्तकभालं तु नासा नेत्रं च पार्वति
kalābhāge jaṭājūṭaṃ keśaṃ ca parameśvari
bindumastakabhālaṃ tu nāsā netraṃ ca pārvati
- 6
श्रोत्रयुग्मं तथा वक्त्रं स्कन्दनाद् अव्यवस्थितम्
चतुर्बाहुं तथा देहं स्तनद्वंद्वं कटिद्वयम्
śrotrayugmaṃ tathā vaktraṃ skandanād avyavasthitam
caturbāhuṃ tathā dehaṃ stanadvaṃdvaṃ kaṭidvayam
- 7
हृदयं जठरं पादं तथा सर्वाङ्गुलिः शिवे
ब्रह्मरूपं ककारं च सर्वाङ्गं तनुसंशयः
hṛdayaṃ jaṭharaṃ pādaṃ tathā sarvāṅguliḥ śive
brahmarūpaṃ kakāraṃ ca sarvāṅgaṃ tanusaṃśayaḥ
- 8
शकारं कामरूपं च योनिरूपं न चान्यथा
चन्द्रसूर्याग्निरूपं च रेफं परमदुर्लभम्
śakāraṃ kāmarūpaṃ ca yonirūpaṃ na cānyathā
candrasūryāgnirūpaṃ ca rephaṃ paramadurlabham
- 9
सर्वाङ्गद्योतनं तेजो जगदानन्दरूपकम्
बिन्दुनिर्वाणदं नादं महामोक्षप्रदं सदा
sarvāṅgadyotanaṃ tejo jagadānandarūpakam
bindunirvāṇadaṃ nādaṃ mahāmokṣapradaṃ sadā
- 10
सर्वविघ्नहरं देवि ककारं तोयरूपकम्
सर्वपापहरं रेफं तस्माद्वह्निर्न चान्यथा
sarvavighnaharaṃ devi kakāraṃ toyarūpakam
sarvapāpaharaṃ rephaṃ tasmādvahnirna cānyathā
- 11
ईकारं परमेशानि शक्तिं चाव्ययरूपिणीम्
महामोक्षप्रदा देवी तस्मान्माया प्रकीर्तिता
īkāraṃ parameśāni śaktiṃ cāvyayarūpiṇīm
mahāmokṣapradā devī tasmānmāyā prakīrtitā
- 12
ककारं ब्रह्मरूपं च मकारं विष्णुरूपकम्
रेफः संहाररूपत्वाच्छिवरूपो न चान्यथा
kakāraṃ brahmarūpaṃ ca makāraṃ viṣṇurūpakam
rephaḥ saṃhārarūpatvācchivarūpo na cānyathā
- 13
ब्रह्मविष्णुशिवः साक्षात्ककारं परमेश्वरि
अनुच्चार्यं तदेव स्याद्विना मायायुतं शिवे
brahmaviṣṇuśivaḥ sākṣātkakāraṃ parameśvari
anuccāryaṃ tadeva syādvinā māyāyutaṃ śive
- 14
मायायुक्तं यदा देवि तदा मुक्तिप्रदं महत्
अत एव महेशानि मायाशक्तिर्निगद्यते
māyāyuktaṃ yadā devi tadā muktipradaṃ mahat
ata eva maheśāni māyāśaktirnigadyate
- 15
ककारं धर्मदं देवि ईकारश्चार्थदायकम्
रकारं कामदं कान्ते मकारं मोक्षदायकम्
kakāraṃ dharmadaṃ devi īkāraścārthadāyakam
rakāraṃ kāmadaṃ kānte makāraṃ mokṣadāyakam
- 16
एकत्रोच्चारणाद्देवि निर्वाणमोक्षदायिनी
माहात्म्यं देवदेवेशि किं वक्तुं शक्यते मया
ekatroccāraṇāddevi nirvāṇamokṣadāyinī
māhātmyaṃ devadeveśi kiṃ vaktuṃ śakyate mayā
- 17
जिह्वाकोटिसहस्रेण वक्त्रकोटिशतेन च
जन्मान्तरसहस्रेण वर्णितुं नैव शक्यते
jihvākoṭisahasreṇa vaktrakoṭiśatena ca
janmāntarasahasreṇa varṇituṃ naiva śakyate
- 18
विधिवल्लक्षजापेन पुरश्चरणम् उच्यते
एतद्रूपं महामायां कूर्चबीजं तु सुन्दरि
vidhivallakṣajāpena puraścaraṇam ucyate
etadrūpaṃ mahāmāyāṃ kūrcabījaṃ tu sundari
- 19
वाग्भवं प्रणवं देवि एतद्रूपं न संशयः
अग्निजाया महाविद्या एतद्रूपं न संशयः
vāgbhavaṃ praṇavaṃ devi etadrūpaṃ na saṃśayaḥ
agnijāyā mahāvidyā etadrūpaṃ na saṃśayaḥ
- 20
द्रुतसिद्धिप्रदा विद्या वह्निजाया परा मनुः
सम्बोधनपदेनैव सदा संनिधिकारिणी
drutasiddhipradā vidyā vahnijāyā parā manuḥ
sambodhanapadenaiva sadā saṃnidhikāriṇī
- 21
अथ वक्ष्ये महाविद्यापुरश्चरणम् उत्तमम्
कथितं मन्त्रराजस्य त्रिपुरश्चरणं शृणु
atha vakṣye mahāvidyāpuraścaraṇam uttamam
kathitaṃ mantrarājasya tripuraścaraṇaṃ śṛṇu
- 22
दिवा लक्षं जपेन्मन्त्रं हविष्याशी जितेन्द्रियः
दिव्यवीरमते देवि रात्रौ लक्षं जपेत्सुधीः
divā lakṣaṃ japenmantraṃ haviṣyāśī jitendriyaḥ
divyavīramate devi rātrau lakṣaṃ japetsudhīḥ
- 23
अथ षडक्षरस्यास्य शृणु देवि पुरस्क्रियाम्
दिव्यवीरमतेनैव विंशत्येकेन पार्वति
atha ṣaḍakṣarasyāsya śṛṇu devi puraskriyām
divyavīramatenaiva viṃśatyekena pārvati
- 24
तथा च त्र्यक्षरं मन्त्रं प्रजपेत्साधकाग्रणीः
ध्यानपूजादिकं सर्वं समानं वीरवन्दिते
tathā ca tryakṣaraṃ mantraṃ prajapetsādhakāgraṇīḥ
dhyānapūjādikaṃ sarvaṃ samānaṃ vīravandite
- 25
एतस्याः सदृशी विद्या फलदा नास्ति योगिनि
सर्वमन्त्रस्य चैतन्यं शृणु पार्वति सादरम्
etasyāḥ sadṛśī vidyā phaladā nāsti yogini
sarvamantrasya caitanyaṃ śṛṇu pārvati sādaram
- 26
सहस्रारे महापद्मे बिन्दुरूपं परं शिवम्
कुण्डलिनीं समुत्थाप्य हंसेन मनुना सुधीः
sahasrāre mahāpadme bindurūpaṃ paraṃ śivam
kuṇḍalinīṃ samutthāpya haṃsena manunā sudhīḥ
- 27
नासाग्रे या स्थिरा दृष्टिर्जायते परमेश्वरि
तदैव मन्त्रचैतन्यं कुण्डलीचक्रगं भवेत्
nāsāgre yā sthirā dṛṣṭirjāyate parameśvari
tadaiva mantracaitanyaṃ kuṇḍalīcakragaṃ bhavet
- 28
सहस्रारे महापद्मे कुण्डल्या सहितं गुरुम्
भावयेत्सर्वमन्त्राणां चैतन्यं जायते प्रिये
sahasrāre mahāpadme kuṇḍalyā sahitaṃ gurum
bhāvayetsarvamantrāṇāṃ caitanyaṃ jāyate priye
- 29
तदैव प्रजपेन्मन्त्रं सिद्धिदं नात्र संशयः
श्रीदेवी उवाच
इदानीं तारिणीमन्त्रवासनां वद शंकर
कालिका मोक्षदा नित्या तारिणी भववारिधौ
tadaiva prajapenmantraṃ siddhidaṃ nātra saṃśayaḥ
śrīdevī uvāca
idānīṃ tāriṇīmantravāsanāṃ vada śaṃkara
kālikā mokṣadā nityā tāriṇī bhavavāridhau
- 30
श्रीशंकर उवाच
कलाकेशं महेशानि बिन्दुमस्तकमीरितम्
नादं च वक्त्रं भालं च नासां नेत्रं च पार्वति
śrīśaṃkara uvāca
kalākeśaṃ maheśāni bindumastakamīritam
nādaṃ ca vaktraṃ bhālaṃ ca nāsāṃ netraṃ ca pārvati

