46 shlokas
- 1
देवी उवाच
श्रुता पूजा कालिकायास्ताराया वद साम्प्रतम्
यस्याः प्रसङ्गमात्रेण वाचश्चित्तायते नृणाम्
devī uvāca
śrutā pūjā kālikāyāstārāyā vada sāmpratam
yasyāḥ prasaṅgamātreṇa vācaścittāyate nṛṇām
- 2
ईश्वर उवाच
शृणु चार्वङ्गि सुभगे तारायाः पूजनं महत्
मन्त्रेणाचमनं कृत्वा गुरुदेवं नमेत्ततः
īśvara uvāca
śṛṇu cārvaṅgi subhage tārāyāḥ pūjanaṃ mahat
mantreṇācamanaṃ kṛtvā gurudevaṃ namettataḥ
- 3
जलं संशोध्य हस्तौ च पादौ च क्षालयेत्ततः
मन्त्रेणाचमनं कृत्वा ततः पीठं विचिन्तयेत्
jalaṃ saṃśodhya hastau ca pādau ca kṣālayettataḥ
mantreṇācamanaṃ kṛtvā tataḥ pīṭhaṃ vicintayet
- 4
शिखां बद्ध्वा ततो देवि त्रिविधं विघ्ननाशनम्
भूम्यासनं च संशोध्य वस्त्रे ग्रन्थिं विधाय च
śikhāṃ baddhvā tato devi trividhaṃ vighnanāśanam
bhūmyāsanaṃ ca saṃśodhya vastre granthiṃ vidhāya ca
- 5
कायवाक्शोधनं कृत्वा ततः पुष्पविशोधनम्
यन्त्रं कृत्वा साधकेन्द्रः सामान्यार्घ्यं च विन्यसेत्
kāyavākśodhanaṃ kṛtvā tataḥ puṣpaviśodhanam
yantraṃ kṛtvā sādhakendraḥ sāmānyārghyaṃ ca vinyaset
- 6
द्वारपालांश्च संपूज्य पीठपूजां समारभेत्
पीठशक्तीश्च लक्ष्म्याद्यास्ततः पीठमनुं जपेत्
dvārapālāṃśca saṃpūjya pīṭhapūjāṃ samārabhet
pīṭhaśaktīśca lakṣmyādyāstataḥ pīṭhamanuṃ japet
- 7
भूतशुद्धिं प्रवक्ष्यामि विशेषमिह यद्भवेत्
कूर्चयुक्तेन हंसेन पूरकेण सुरेश्वरि
bhūtaśuddhiṃ pravakṣyāmi viśeṣamiha yadbhavet
kūrcayuktena haṃsena pūrakeṇa sureśvari
- 8
कुण्डल्या सह चात्मानं चतुर्विंशतिबीजकम्
तत्र लीनानि देवेशि परमात्मनि साधकः
kuṇḍalyā saha cātmānaṃ caturviṃśatibījakam
tatra līnāni deveśi paramātmani sādhakaḥ
- 9
मायया संदहेत्पापं पुरुषं कज्जलप्रभम्
कुम्भकेन वरारोहे भस्म कुर्याद्विचक्षणः
māyayā saṃdahetpāpaṃ puruṣaṃ kajjalaprabham
kumbhakena varārohe bhasma kuryādvicakṣaṇaḥ
- 10
वधूबीजेन देवेशि भस्मना सह रेचयेत्
पूरकेण तु कूर्चेन ललाटेऽमृतसंचयम्
vadhūbījena deveśi bhasmanā saha recayet
pūrakeṇa tu kūrcena lalāṭe'mṛtasaṃcayam
- 11
चिन्तयेत्परमेशानि कुम्भकेनामृताम्बुधिम्
आं ह्रीं क्रों वह्निबीजान्तं हृदि चैकादशं जपेत्
cintayetparameśāni kumbhakenāmṛtāmbudhim
āṃ hrīṃ kroṃ vahnibījāntaṃ hṛdi caikādaśaṃ japet
- 12
ततस्तु चिन्तयेद्धीमान् ॐकाराद्रक्तपङ्कजम्
तस्योपरि पुनर्ध्यायेत्हुंकारं नीलसंनिभम्
tatastu cintayeddhīmān oṃkārādraktapaṅkajam
tasyopari punardhyāyethuṃkāraṃ nīlasaṃnibham
- 13
तस्योपरि पुनर्ध्यायेद्बीजभूषितकर्तृकाम्
तस्योपरि परं बिन्दुं शिवरूपं च अव्ययम्
tasyopari punardhyāyedbījabhūṣitakartṛkām
tasyopari paraṃ binduṃ śivarūpaṃ ca avyayam
- 14
वालुकायाः सहस्रैकभागं बिन्दुं सुदुर्लभम्
बिन्दुमध्ये मणिद्वीपं शतयोजनविस्तृतम्
vālukāyāḥ sahasraikabhāgaṃ binduṃ sudurlabham
bindumadhye maṇidvīpaṃ śatayojanavistṛtam
- 15
बिन्दुमध्ये परं ज्योतिर्बुद्बुदाकारमण्डलम्
यथैव बुद्बुदे देवि प्रतिबिम्बं प्रपश्यति
bindumadhye paraṃ jyotirbudbudākāramaṇḍalam
yathaiva budbude devi pratibimbaṃ prapaśyati
- 16
तथा निरीक्षणं कार्यं प्रकुर्याज्ज्ञानचक्षुषा
मणिद्वीपं तु तन्मध्ये सुवर्णवालुकामयम्
tathā nirīkṣaṇaṃ kāryaṃ prakuryājjñānacakṣuṣā
maṇidvīpaṃ tu tanmadhye suvarṇavālukāmayam
- 17
परितो भावयेन्मन्त्री परिखातो मनोहरम्
मध्ये कल्पद्रुमं ध्यायेदात्मानं तारिणीमयम्
parito bhāvayenmantrī parikhāto manoharam
madhye kalpadrumaṃ dhyāyedātmānaṃ tāriṇīmayam
- 18
उद्यदादित्यसंकाशं ज्योतिर्मण्डलमुत्तमम्
चतुर्द्वारसमायुक्तं हेमप्राकारभूषितम्
udyadādityasaṃkāśaṃ jyotirmaṇḍalamuttamam
caturdvārasamāyuktaṃ hemaprākārabhūṣitam
- 19
बहुचामरघण्टादिदेवकन्यासुशोभितम्
मन्दवायुसमायुक्तं गन्धधूपैर् अलंकृतम्
bahucāmaraghaṇṭādidevakanyāsuśobhitam
mandavāyusamāyuktaṃ gandhadhūpair alaṃkṛtam
- 20
तन्मध्ये वेदिकां ध्यायेन्नानारत्नोपशोभिताम्
सुवर्णसूत्ररचितं चिन्तयेच्छत्त्रम् उत्तमम्
tanmadhye vedikāṃ dhyāyennānāratnopaśobhitām
suvarṇasūtraracitaṃ cintayecchattram uttamam
- 21
तदधश्चिन्तयेन्मन्त्री रत्नसिंहासनं प्रिये
तत्र देवीं चिन्तयेच्च यथोक्तध्यानयोगतः
tadadhaścintayenmantrī ratnasiṃhāsanaṃ priye
tatra devīṃ cintayecca yathoktadhyānayogataḥ
- 22
योगसारे यथोक्तैस्तु उपचारैः प्रपूजयेत्
प्राणायामं ततः कृत्वा ऋष्यादिन्यासमाचरेत्
yogasāre yathoktaistu upacāraiḥ prapūjayet
prāṇāyāmaṃ tataḥ kṛtvā ṛṣyādinyāsamācaret
- 23
वर्णन्यासं ततः कृत्वा कराङ्गन्यासमाचरेत्
तालत्रयं छोटिकाभिर्दशदिग्बन्धनं चरेत्
varṇanyāsaṃ tataḥ kṛtvā karāṅganyāsamācaret
tālatrayaṃ choṭikābhirdaśadigbandhanaṃ caret
- 24
षोढान्यासं ततः कृत्वा व्यापकं तदनन्तरम्
विशेषार्घ्यं च संस्थाप्य पञ्चतत्त्वं विशोधयेत्
ṣoḍhānyāsaṃ tataḥ kṛtvā vyāpakaṃ tadanantaram
viśeṣārghyaṃ ca saṃsthāpya pañcatattvaṃ viśodhayet
- 25
सुधादेवीं समानीय पञ्चीकरणमाचरेत्
कुम्भे पुष्पं समादाय त्रिकोणे त्रिः प्रपूजयेत्
sudhādevīṃ samānīya pañcīkaraṇamācaret
kumbhe puṣpaṃ samādāya trikoṇe triḥ prapūjayet
- 26
वामदेहं त्रिधा चोक्त्वा खेचरीं दशधा जपेत्
तथा चानन्दगायत्रीम् ऋचं च त्रिर्जपेत्सुधीः
vāmadehaṃ tridhā coktvā khecarīṃ daśadhā japet
tathā cānandagāyatrīm ṛcaṃ ca trirjapetsudhīḥ
- 27
ब्रह्मशापं शुक्रशापं कृष्णशापं सुरेश्वरि
दिग्जपान्नाशयेद्धीमान्ततो मन्त्रत्रयं जपेत्
brahmaśāpaṃ śukraśāpaṃ kṛṣṇaśāpaṃ sureśvari
digjapānnāśayeddhīmāntato mantratrayaṃ japet
- 28
छुरिकां चामृतं चैव प्रीतिसंरक्षणीं तथा
पावमानं च त्रिर्जप्त्वा शोषणादीन्समाचरेत्
churikāṃ cāmṛtaṃ caiva prītisaṃrakṣaṇīṃ tathā
pāvamānaṃ ca trirjaptvā śoṣaṇādīnsamācaret
- 29
वारुणं त्रिर्जपेद्देवि चामृतं सप्तधा जपेत्
विद्यातत्त्वे धेनुमुद्रां प्रदर्श्य मूलमष्टधा
vāruṇaṃ trirjapeddevi cāmṛtaṃ saptadhā japet
vidyātattve dhenumudrāṃ pradarśya mūlamaṣṭadhā
- 30
कुण्डलिनीं समुत्थाप्य शिवोऽहं भावयेत्ततः
मांसं मीनं शोधयित्वा मुद्राशोधनमाचरेत्
kuṇḍalinīṃ samutthāpya śivo'haṃ bhāvayettataḥ
māṃsaṃ mīnaṃ śodhayitvā mudrāśodhanamācaret

