27 shlokas
- 1
प्रणम्य निर्भयं नाथं खेन्द्रदेवं जगत्पतिम्
दिगम्बरं त्रिनेत्रं च जरामृत्युविनाशनम्
praṇamya nirbhayaṃ nāthaṃ khendradevaṃ jagatpatim
digambaraṃ trinetraṃ ca jarāmṛtyuvināśanam
- 2
अमृतं च विषं चैव शिवेनोक्तं रसायनम्
अमृतं विधिसंयुक्तं विधिहीनं तु तद्विषम्
amṛtaṃ ca viṣaṃ caiva śivenoktaṃ rasāyanam
amṛtaṃ vidhisaṃyuktaṃ vidhihīnaṃ tu tadviṣam
- 3
रेचनान्ते इदं सेव्यं सर्वदोषापनुत्तये
मृताभ्रं भक्षयेदादौ मासमेकं विचक्षणः
recanānte idaṃ sevyaṃ sarvadoṣāpanuttaye
mṛtābhraṃ bhakṣayedādau māsamekaṃ vicakṣaṇaḥ
- 4
पश्चात्तु योजयेद्देहे क्षेत्रीकरणमिच्छतः
यत्क्षेत्रीकरणे सूतस्त्वमृतोऽपि विषं भवेत्
paścāttu yojayeddehe kṣetrīkaraṇamicchataḥ
yatkṣetrīkaraṇe sūtastvamṛto'pi viṣaṃ bhavet
- 5
फलसिद्धिः कुतस्तस्य सुबीजस्योषरे यथा
न क्षेत्रकरणाद्देवि किंचित्कुर्याद्रसायनम्
कर्तव्यं क्षेत्रकरणं सर्वस्मिंश्च रसायने
phalasiddhiḥ kutastasya subījasyoṣare yathā
na kṣetrakaraṇāddevi kiṃcitkuryādrasāyanam
kartavyaṃ kṣetrakaraṇaṃ sarvasmiṃśca rasāyane
- 6
भस्मसूतं द्विधा गन्धं क्षणं कन्याविमर्दितम्
रुद्ध्वा लघुपुटे पच्याद् उद्धृत्य मधुसर्पिषा
bhasmasūtaṃ dvidhā gandhaṃ kṣaṇaṃ kanyāvimarditam
ruddhvā laghupuṭe pacyād uddhṛtya madhusarpiṣā
- 7
निष्कं खादेज्जरामृत्युं हन्ति गन्धामृतो रसः
समूलं भृङ्गराजं तु छायाशुष्कं विचूर्णयेत्
niṣkaṃ khādejjarāmṛtyuṃ hanti gandhāmṛto rasaḥ
samūlaṃ bhṛṅgarājaṃ tu chāyāśuṣkaṃ vicūrṇayet
- 8
तत्समं त्रिफलाचूर्णं सर्वतुल्या सिता भवेत्
पलैकं भक्षयेच्चानु तच्च मृत्युरुजापहम्
tatsamaṃ triphalācūrṇaṃ sarvatulyā sitā bhavet
palaikaṃ bhakṣayeccānu tacca mṛtyurujāpaham
- 9
मृतसूतस्य पादांशं हेमभस्म प्रकल्पयेत्
mṛtasūtasya pādāṃśaṃ hemabhasma prakalpayet
- 10
क्षीराज्यं मधुना युक्तं माषैकं कांस्यपात्रके
लेहयेन्मासषट्कं तु जरामृत्युविनाशनम्
kṣīrājyaṃ madhunā yuktaṃ māṣaikaṃ kāṃsyapātrake
lehayenmāsaṣaṭkaṃ tu jarāmṛtyuvināśanam
- 11
वाकुचीचूर्णकर्षैकं धात्रीरसपरिप्लुतम्
अनुपानं लिहेन्नित्यं स्याद्रसो हेमसुन्दरः
vākucīcūrṇakarṣaikaṃ dhātrīrasapariplutam
anupānaṃ lihennityaṃ syādraso hemasundaraḥ
- 12
शुद्धसूतं वज्रभस्म सत्त्वमभ्रकताप्ययोः
कान्तलोहसमं हेम जम्बीरे मर्दयेद्दृढम्
śuddhasūtaṃ vajrabhasma sattvamabhrakatāpyayoḥ
kāntalohasamaṃ hema jambīre mardayeddṛḍham
- 13
सप्ताहं सर्वतुल्यांशं गोलं कृत्वा समुद्धरेत्
गोजिह्वावायसीवन्ध्यानिर्गुण्डीमधुसैन्धवैः
saptāhaṃ sarvatulyāṃśaṃ golaṃ kṛtvā samuddharet
gojihvāvāyasīvandhyānirguṇḍīmadhusaindhavaiḥ
- 14
लेपयेद्वज्रमूषान्ते गोलकं तत्र निक्षिपेत्
तत्कल्कैश्छादितं कृत्वा पक्षैकं भूधरे पचेत्
lepayedvajramūṣānte golakaṃ tatra nikṣipet
tatkalkaiśchāditaṃ kṛtvā pakṣaikaṃ bhūdhare pacet
- 15
यामं यामं समुद्धृत्य लिप्त्वामूषां पुनः पुनः
रुद्ध्वाथ पूर्ववत्पाच्यमेनं पक्षात्समुद्धरेत्
yāmaṃ yāmaṃ samuddhṛtya liptvāmūṣāṃ punaḥ punaḥ
ruddhvātha pūrvavatpācyamenaṃ pakṣātsamuddharet
- 16
यवचिञ्चापलाशाख्यराजीकार्पासतण्डुलैः
एतैः प्रलेपयेन्मूषां गुटिकां तत्र निक्षिपेत्
yavaciñcāpalāśākhyarājīkārpāsataṇḍulaiḥ
etaiḥ pralepayenmūṣāṃ guṭikāṃ tatra nikṣipet
- 17
टङ्कणं श्वेतकाचं च दत्त्वा यामे दृढं दृढम्
खदिराङ्गारयोगेन द्रुतो ऽयं जायते रसः
ṭaṅkaṇaṃ śvetakācaṃ ca dattvā yāme dṛḍhaṃ dṛḍham
khadirāṅgārayogena druto 'yaṃ jāyate rasaḥ
- 18
मूषायां बिडयोगेन समं हेम च जारयेत्
ततस्त्रियामकैर्मर्द्यं सगोमूत्रं दिनैकतः
mūṣāyāṃ biḍayogena samaṃ hema ca jārayet
tatastriyāmakairmardyaṃ sagomūtraṃ dinaikataḥ
- 19
अन्धमूषागतो ध्मातो बद्धो भवति वज्रवत्
मृतसंजीवनी नाम गुटिका वक्रमध्यगा
andhamūṣāgato dhmāto baddho bhavati vajravat
mṛtasaṃjīvanī nāma guṭikā vakramadhyagā
- 20
कर्षमात्रा जरां मृत्युं हन्ति सत्यं शिवोदितम्
शस्त्रस्तम्भं च कुरुते ब्रह्मायुर्भवते नरः
karṣamātrā jarāṃ mṛtyuṃ hanti satyaṃ śivoditam
śastrastambhaṃ ca kurute brahmāyurbhavate naraḥ
- 21
नागवल्लीदलद्रावैः सप्ताहं शुद्धसूतकम्
मर्दयेत्क्षालयेद् अम्लैश्चतुर्निष्कप्रमाणकम्
nāgavallīdaladrāvaiḥ saptāhaṃ śuddhasūtakam
mardayetkṣālayed amlaiścaturniṣkapramāṇakam
- 22
विषकन्दगतं कृत्वा विषेणैव निरोधयेत्
ततः शूकरमांसस्य गर्भे कृत्वाथ सिञ्चयेत्
viṣakandagataṃ kṛtvā viṣeṇaiva nirodhayet
tataḥ śūkaramāṃsasya garbhe kṛtvātha siñcayet
- 23
संध्याकाले बलिं दत्त्वा कुक्कुटीवारुणीयुतम्
ततश्चुल्ल्यां लोहपात्रे तैले धत्तूरसंयुते
saṃdhyākāle baliṃ dattvā kukkuṭīvāruṇīyutam
tataścullyāṃ lohapātre taile dhattūrasaṃyute
- 24
क्षिप्त्वा त्रिंशत्पले पाच्यं तद्रसं मांसपिण्डकम्
संध्याम् आरभ्य मन्दाग्नौ यावत्सूर्योदयं पचेत्
kṣiptvā triṃśatpale pācyaṃ tadrasaṃ māṃsapiṇḍakam
saṃdhyām ārabhya mandāgnau yāvatsūryodayaṃ pacet
- 25
हठाज्जागरणं कुर्यादन्यथा तन्नसिद्धिभाक्
प्रातरुद्धृत्य गुटिकां क्षीरभाण्डे विनिक्षिपेत्
haṭhājjāgaraṇaṃ kuryādanyathā tannasiddhibhāk
prātaruddhṛtya guṭikāṃ kṣīrabhāṇḍe vinikṣipet
- 26
तत्क्षीरं शुष्यति क्षिप्रमेतत्प्रत्ययकारकम्
रतिकाले मुखे धार्या गुटिका वीर्यरोधिनी
tatkṣīraṃ śuṣyati kṣiprametatpratyayakārakam
ratikāle mukhe dhāryā guṭikā vīryarodhinī
- 27
क्षीरं पीत्वा रमेद्रामां कामाकुलकुलान्विताम्
स्वमुखाद्धारयेद्धस्ते तदा वीर्यं विमुञ्चति
kṣīraṃ pītvā ramedrāmāṃ kāmākulakulānvitām
svamukhāddhārayeddhaste tadā vīryaṃ vimuñcati

