102 shlokas
- 1
गन्धकं वज्रवैक्रान्तं गगनं तालकं शिलाम्
खर्परं शिखितुत्थं च विमला हेममाक्षिकम्
gandhakaṃ vajravaikrāntaṃ gaganaṃ tālakaṃ śilām
kharparaṃ śikhitutthaṃ ca vimalā hemamākṣikam
- 2
कासीसं कान्तपाषाणं वराटाञ्जनहिङ्गुलम्
कङ्कुष्ठं शंखभूनागं टङ्कणं तु शिलाजतु
kāsīsaṃ kāntapāṣāṇaṃ varāṭāñjanahiṅgulam
kaṅkuṣṭhaṃ śaṃkhabhūnāgaṃ ṭaṅkaṇaṃ tu śilājatu
- 3
एते उपरसाः प्रोक्ताः शोध्या द्राव्याश्च मारयेत्
तत्रादौ गन्धकोत्पत्तिं शोधनं त्वथ कथ्यते
ete uparasāḥ proktāḥ śodhyā drāvyāśca mārayet
tatrādau gandhakotpattiṃ śodhanaṃ tvatha kathyate
- 4
श्वेतद्वीपे पुरा देव्याः क्रीडन्त्याः प्रसृतं रजः
क्षीरार्णवे तु स्नाताया दुकूलं रजसान्वितम्
śvetadvīpe purā devyāḥ krīḍantyāḥ prasṛtaṃ rajaḥ
kṣīrārṇave tu snātāyā dukūlaṃ rajasānvitam
- 5
धौतं यत्सलिले तस्मिन्गन्धवद्गन्धकं स्मृतम्
चतुर्धा गन्धकः प्रोक्तो रक्तपीतसितासितैः
dhautaṃ yatsalile tasmingandhavadgandhakaṃ smṛtam
caturdhā gandhakaḥ prokto raktapītasitāsitaiḥ
- 6
रक्तो हेमक्रियासूक्तः पीतश्चैव रसायने
व्रणादिलेपने श्वेतः श्रेष्ठः कृष्णस्तु दुर्लभः
rakto hemakriyāsūktaḥ pītaścaiva rasāyane
vraṇādilepane śvetaḥ śreṣṭhaḥ kṛṣṇastu durlabhaḥ
- 7
अशुद्धगन्धः कुरुतेऽतिकुष्ठं तापं भ्रमं पित्तरुजं करोति
रूपं सुखं वीर्यबलं निहन्ति तस्मात्सुशुद्धं विनियोजनीयम्
aśuddhagandhaḥ kurute'tikuṣṭhaṃ tāpaṃ bhramaṃ pittarujaṃ karoti
rūpaṃ sukhaṃ vīryabalaṃ nihanti tasmātsuśuddhaṃ viniyojanīyam
- 8
साज्यभाण्डे पयः क्षिप्त्वा मुखं वस्त्रेण बन्धयेत्
तत्पृष्ठे गन्धकं क्षिप्त्वा शरावेणावरोधयेत्
sājyabhāṇḍe payaḥ kṣiptvā mukhaṃ vastreṇa bandhayet
tatpṛṣṭhe gandhakaṃ kṣiptvā śarāveṇāvarodhayet
- 9
भाण्डं निक्षिप्य भूम्यां तदूर्ध्वं देयं पुटं लघु
ततः क्षीरेण गन्धं च शुद्धं योगेषु योजयेत्
bhāṇḍaṃ nikṣipya bhūmyāṃ tadūrdhvaṃ deyaṃ puṭaṃ laghu
tataḥ kṣīreṇa gandhaṃ ca śuddhaṃ yogeṣu yojayet
- 10
गन्धकं शोधयेद्दुग्धे दोलायन्त्रेण तत्त्ववित्
तेन शुद्धो भवत्येष धातूणां प्राणमूर्छकः
gandhakaṃ śodhayeddugdhe dolāyantreṇa tattvavit
tena śuddho bhavatyeṣa dhātūṇāṃ prāṇamūrchakaḥ
- 11
घृतयुक्तम् अयोदर्व्या गन्धं वह्णौ प्रगालयेत्
एकीभूतं ततो गन्धं दुग्धमध्ये परिक्षिपेत्
ghṛtayuktam ayodarvyā gandhaṃ vahṇau pragālayet
ekībhūtaṃ tato gandhaṃ dugdhamadhye parikṣipet
- 12
तेन शुद्धो भवेद्गन्धः सर्वयोगेषु योजयेत्
शोधितो रसराजः स्याज्जरामृत्युरुजापहः
अग्निसंदीपनं श्रेष्ठं वीर्यवृद्धिं करोति च
tena śuddho bhavedgandhaḥ sarvayogeṣu yojayet
śodhito rasarājaḥ syājjarāmṛtyurujāpahaḥ
agnisaṃdīpanaṃ śreṣṭhaṃ vīryavṛddhiṃ karoti ca
- 13
अर्कक्षीरैः स्नुहीक्षीरैर्वस्त्रं लेप्यं तु सप्तधा
गन्धकं नवनीतेन पिष्ट्वा वस्त्रं लिपेत्तु तत्
arkakṣīraiḥ snuhīkṣīrairvastraṃ lepyaṃ tu saptadhā
gandhakaṃ navanītena piṣṭvā vastraṃ lipettu tat
- 14
तद्वर्तिर्ज्वलिता वंशैर्धृता धार्या त्वधोमुखी
tadvartirjvalitā vaṃśairdhṛtā dhāryā tvadhomukhī
- 15
तैलं पतत्यधो भाण्डे ग्राह्यं योगेषु योजयेत्
अग्निसंदीपनं श्रेष्ठं वीर्यवृद्धिं करोति च
tailaṃ patatyadho bhāṇḍe grāhyaṃ yogeṣu yojayet
agnisaṃdīpanaṃ śreṣṭhaṃ vīryavṛddhiṃ karoti ca
- 16
श्वेतपीता रक्तकृष्णा द्विजाद्या वज्रजातयः
पुंस्त्रीनपुंसकं चेति लक्षणेन तु लक्षयेत्
śvetapītā raktakṛṣṇā dvijādyā vajrajātayaḥ
puṃstrīnapuṃsakaṃ ceti lakṣaṇena tu lakṣayet
- 17
वृत्ताः फलकसम्पूर्णास्तेजोवन्तो बृहत्तराः
पुरुषास्ते समाख्याता रेखाबिन्दुविवर्जिताः
vṛttāḥ phalakasampūrṇāstejovanto bṛhattarāḥ
puruṣāste samākhyātā rekhābinduvivarjitāḥ
- 18
रेखाबिन्दुसमायुक्ताः षट्कोणास्ताः स्त्रियः स्मृताः
त्रिकोणाः पत्रवद्दीर्घा विज्ञेयास्ते नपुंसकाः
rekhābindusamāyuktāḥ ṣaṭkoṇāstāḥ striyaḥ smṛtāḥ
trikoṇāḥ patravaddīrghā vijñeyāste napuṃsakāḥ
- 19
सर्वेषां पुरुषाः श्रेष्ठा वेधका रसबन्धकाः
स्त्रीवज्रं देहसिद्ध्यर्थं क्रामणं स्यान्नपुंसकम्
sarveṣāṃ puruṣāḥ śreṣṭhā vedhakā rasabandhakāḥ
strīvajraṃ dehasiddhyarthaṃ krāmaṇaṃ syānnapuṃsakam
- 20
विप्रो रसायने प्रोक्तः क्षत्रियो रोगनाशने
वादादौ वैश्यजातीयो वयःस्तम्भे तुरीयकः
vipro rasāyane proktaḥ kṣatriyo roganāśane
vādādau vaiśyajātīyo vayaḥstambhe turīyakaḥ
- 21
स्त्री तु स्त्रिये प्रदातव्या क्लीबे क्लीबं तथैव च
सर्वेषां सर्वदा योज्याः पुरुषा बलवत्तराः
strī tu striye pradātavyā klībe klībaṃ tathaiva ca
sarveṣāṃ sarvadā yojyāḥ puruṣā balavattarāḥ
- 22
पाण्डुरोगं पार्श्वपीडां किलासं दाहसन्ततिम्
रोगानीकं गुरुत्वं च धत्ते वज्रम् अशोधितम्
pāṇḍurogaṃ pārśvapīḍāṃ kilāsaṃ dāhasantatim
rogānīkaṃ gurutvaṃ ca dhatte vajram aśodhitam
- 23
व्याघ्रीकन्दगतं वज्रं दोलायन्त्रे विपाचितम्
सप्ताहं कोद्रवक्वाथे कौलत्थे विमलं भवेत्
vyāghrīkandagataṃ vajraṃ dolāyantre vipācitam
saptāhaṃ kodravakvāthe kaulatthe vimalaṃ bhavet
- 24
व्याघ्रीकन्दगतं वज्रं मृदा लिप्तं पुटे पचेत्
अहोरात्रात्समुद्धृत्य हयमूत्रेण सेचयेत्
वज्रीक्षीरेण वा सिञ्चेत्कुलिशं विमलं भवेत्
vyāghrīkandagataṃ vajraṃ mṛdā liptaṃ puṭe pacet
ahorātrātsamuddhṛtya hayamūtreṇa secayet
vajrīkṣīreṇa vā siñcetkuliśaṃ vimalaṃ bhavet
- 25
त्रिवर्षारूढकार्पासमूलम् आदाय पेषयेत्
त्रिवर्षनागवल्ल्याश्च द्रावेण तं प्रपेषयेत्
trivarṣārūḍhakārpāsamūlam ādāya peṣayet
trivarṣanāgavallyāśca drāveṇa taṃ prapeṣayet
- 26
तद्गोलके क्षिपेद्वज्रं रुद्ध्वा गजपुटे पचेत्
एवं सप्तपुटं कृत्वा कुलिशं म्रियते ध्रुवम्
tadgolake kṣipedvajraṃ ruddhvā gajapuṭe pacet
evaṃ saptapuṭaṃ kṛtvā kuliśaṃ mriyate dhruvam
- 27
कांस्यपात्रे तु भेकस्य मूत्रे वज्रं सुभावयेत्
त्रिः सप्तकृत्वः संतप्तं वज्रमेव मृतं भवेत्
kāṃsyapātre tu bhekasya mūtre vajraṃ subhāvayet
triḥ saptakṛtvaḥ saṃtaptaṃ vajrameva mṛtaṃ bhavet
- 28
त्रिः सप्तकृत्वः संतप्तं खरमूत्रेण सेचयेत्
मत्कुणैस्तालकं पिष्ट्वा तद्गोले कुलिशं क्षिपेत्
triḥ saptakṛtvaḥ saṃtaptaṃ kharamūtreṇa secayet
matkuṇaistālakaṃ piṣṭvā tadgole kuliśaṃ kṣipet
- 29
प्रध्मातं वाजिमूत्रेण सिक्तं पूर्वक्रमेण वै
भस्मीभवति तद्भुक्तं वज्रवत्कुरुते तनुम्
pradhmātaṃ vājimūtreṇa siktaṃ pūrvakrameṇa vai
bhasmībhavati tadbhuktaṃ vajravatkurute tanum
- 30
आयुष्यं सौख्यजनकं बलदं रूपदं तथा
रोगघ्नं मृत्युहरणं वज्रभस्म भवत्यलम्
āyuṣyaṃ saukhyajanakaṃ baladaṃ rūpadaṃ tathā
rogaghnaṃ mṛtyuharaṇaṃ vajrabhasma bhavatyalam

