14 shlokas
- 1
दशम्यां तस्मिन्न् एवाग्नौ पयसि स्थालीपाकं श्रपयित्वा सर्वगन्धैः फलोत्तरैः सशिरस्कं स्नापयित्वाहतेन वाससा प्रच्छाद्य स्थालीपाकस्य जुहोति कया नश्चित्र इति द्वाभ्यां कया तच्छृण्वे प्रजापतये स्वाहा प्रजापतये नहि त्वद् अन्य इति च द्वाभ्याम्
daśamyāṃ tasminn evāgnau payasi sthālīpākaṃ śrapayitvā sarvagandhaiḥ phalottaraiḥ saśiraskaṃ snāpayitvāhatena vāsasā pracchādya sthālīpākasya juhoti kayā naścitra iti dvābhyāṃ kayā tacchṛṇve prajāpataye svāhā prajāpataye nahi tvad anya iti ca dvābhyām
- 2
अग्नेर् आयुर् असीति तुल्यम् आ ललाटाभिमर्शनात्
agner āyur asīti tulyam ā lalāṭābhimarśanāt
- 3
तद् एव नाम धीयते
tad eva nāma dhīyate
- 4
अन्यद् इत्य् एके
anyad ity eke
- 5
प्राक्स्विष्टकृतः कांस्ये पूतम् आज्यम् आसिच्य हिरण्यं चाबन्धनीयम् अग्नेर् आयुर् इत्य् अवधाय तस्य जुहोतीन्द्रस्य प्राण इति पञ्चभिः
prāksviṣṭakṛtaḥ kāṃsye pūtam ājyam āsicya hiraṇyaṃ cābandhanīyam agner āyur ity avadhāya tasya juhotīndrasya prāṇa iti pañcabhiḥ
- 6
प्राक्संस्थितयजुषो ब्रह्मा घृते हिरण्यम् अवपद्यते सर्वे च ऋत्विजो यद् असर्प इति
prāksaṃsthitayajuṣo brahmā ghṛte hiraṇyam avapadyate sarve ca ṛtvijo yad asarpa iti
- 7
पावमानेनेत्य् उद्धृत्य देवा आयुष्मन्त इति यजमानाय प्रयच्छति
pāvamānenety uddhṛtya devā āyuṣmanta iti yajamānāya prayacchati
- 8
तत्पिबति निरवधयेद्धिरण्याद्घृतम्
tatpibati niravadhayeddhiraṇyādghṛtam
- 9
प्रक्षाल्येमम् अग्न इति हिरण्यम् आबध्नाति
prakṣālyemam agna iti hiraṇyam ābadhnāti
- 10
तस्य ललाटम् अभिमृश्याश्विनोः प्राण इति जपति
tasya lalāṭam abhimṛśyāśvinoḥ prāṇa iti japati
- 11
अङ्गाद् अङ्गात्सम्भवसि हृदयाद् अभि जायसे
आत्मा वै पुत्रनामासि जीव शरदः शतं पश्य शरदः शतम् इति मूर्धनि निघ्राप्य स्वस्त्ययनं वाचयति
aṅgād aṅgātsambhavasi hṛdayād abhi jāyase
ātmā vai putranāmāsi jīva śaradaḥ śataṃ paśya śaradaḥ śatam iti mūrdhani nighrāpya svastyayanaṃ vācayati
- 12
एवम् अत ऊर्ध्वं विप्रोष्यैवं मासि मासि स्थालीपाकस्येष्ट्वा जातकर्मणा वाज्यस्यैवं संवत्सरम्
evam ata ūrdhvaṃ viproṣyaivaṃ māsi māsi sthālīpākasyeṣṭvā jātakarmaṇā vājyasyaivaṃ saṃvatsaram
- 13
मांसं तु नाश्नीतः
māṃsaṃ tu nāśnītaḥ
- 14
समाप्ते संवत्सरे ऽजाविभ्यां वाग्निधान्वन्तरी इष्ट्वा सर्पिष्मद् अन्नं ब्राह्मणान्भोजयेत्
samāpte saṃvatsare 'jāvibhyāṃ vāgnidhānvantarī iṣṭvā sarpiṣmad annaṃ brāhmaṇānbhojayet

