21 shlokas
- 1
षड् अर्घ्यार्हा भवन्त्य् आचार्य ऋत्विग्राजा विवाह्यः प्रियः स्नातक इति
ṣaḍ arghyārhā bhavanty ācārya ṛtvigrājā vivāhyaḥ priyaḥ snātaka iti
- 2
अथैनम् अर्हयन्ति
athainam arhayanti
- 3
आदौ च कर्मणः
ādau ca karmaṇaḥ
- 4
अर्घ्यम् उदकं सौषधं दर्भा इति
arghyam udakaṃ sauṣadhaṃ darbhā iti
- 5
कंसे चमसे वा दध्य् आसिच्य मधु च वर्षीयसापिधाय विष्टराभ्यां परिगृह्य पाद्यप्रथमैः प्रतिपद्यन्ते
kaṃse camase vā dadhy āsicya madhu ca varṣīyasāpidhāya viṣṭarābhyāṃ parigṛhya pādyaprathamaiḥ pratipadyante
- 6
मयि दोहो ऽसि विराजो दोहः पाद्यायै विराजो दोहम् अशीयेत्य् आह्रियमाणम् अनुमन्त्रयते
mayi doho 'si virājo dohaḥ pādyāyai virājo doham aśīyety āhriyamāṇam anumantrayate
- 7
विष्टरो ऽसि मातरि सीदेति विष्टरम् आस्तीर्य तस्मिन्न् उपविशति
viṣṭaro 'si mātari sīdeti viṣṭaram āstīrya tasminn upaviśati
- 8
विष्टर आसीनायैकैकं त्रिः प्राह
viṣṭara āsīnāyaikaikaṃ triḥ prāha
- 9
नैव भो इत्य् आह न मार्षेति
naiva bho ity āha na mārṣeti
- 10
शं नो देवीर् इत्य् अपो ऽभिमन्त्र्य पाद्याभिः प्रक्षालयते दक्षिणं पादम् अवनेनिज इदम् अहम् अस्मिन्कुले ब्रह्मवर्चसं दधाम्य् उत्तरं पादम् अवनेनिज इदम् अहं मयि तेजो वीर्यम् अन्नाद्यं प्रजां पशून्ब्रह्मवर्चसं दधामीति
śaṃ no devīr ity apo 'bhimantrya pādyābhiḥ prakṣālayate dakṣiṇaṃ pādam avanenija idam aham asminkule brahmavarcasaṃ dadhāmy uttaraṃ pādam avanenija idam ahaṃ mayi tejo vīryam annādyaṃ prajāṃ paśūnbrahmavarcasaṃ dadhāmīti
- 11
आपोहिष्ठीयाभिर् अर्घ्यं परिगृह्य सावित्रेण मधुपर्कं विष्टरो ऽस्य् अन्तरिक्षम् अधि विश्रयस्वेति विष्टरम् अवकृष्योरु त्वेत्य् अवसार्य तच्चक्षुर् इत्य् अवेक्ष्य पृथिव्यास्त्वेति विष्टरे निधाय मधु वात ऋतायत इति तिसृभिः प्रदेशिन्या प्रदक्षिणम् आलोडयति
āpohiṣṭhīyābhir arghyaṃ parigṛhya sāvitreṇa madhuparkaṃ viṣṭaro 'sy antarikṣam adhi viśrayasveti viṣṭaram avakṛṣyoru tvety avasārya taccakṣur ity avekṣya pṛthivyāstveti viṣṭare nidhāya madhu vāta ṛtāyata iti tisṛbhiḥ pradeśinyā pradakṣiṇam āloḍayati
- 12
वसवस्त्वाग्निराजानो भक्षयन्तु पितरस्त्वा यमराजानो भक्षयन्तु रुद्रास्त्वा सोमराजानो भक्षयन्त्व् आदित्यास्त्वा वरुणराजानो भक्षयन्तु विश्वे त्वा देवा बृहस्पतिराजानो भक्षयन्त्व् इति प्रदक्षिणं प्रतिदिशं प्रतिमन्त्रं पात्रस्यान्तेषु लेपान्निमार्ष्टि
vasavastvāgnirājāno bhakṣayantu pitarastvā yamarājāno bhakṣayantu rudrāstvā somarājāno bhakṣayantv ādityāstvā varuṇarājāno bhakṣayantu viśve tvā devā bṛhaspatirājāno bhakṣayantv iti pradakṣiṇaṃ pratidiśaṃ pratimantraṃ pātrasyānteṣu lepānnimārṣṭi
- 13
यन्मधुनो मधव्यस्य परमस्यान्नाद्यस्य परमम् अन्नाद्यं रूपं तेनाहं मधुनो मधव्यस्य परमस्यान्नाद्यस्य परमो ऽन्नादो मधव्यो भूयासं
त्रय्यै विद्यायै यशो ऽसि श्रियै यशो ऽसि यशसे ब्रह्मणो दीप्तिर् असि सत्यश्रीर्यशः श्रीर्मयि श्रीः श्रीः श्रयताम् इति मधुपर्कस्य चतुष्प्राश्नात्य् अङ्गुष्ठद्वितीयाभिः कनिष्ठया प्रथमम् एवम् अनुपूर्वं सर्वाभिस्तद् अवशिष्टं सुहृदे प्रयच्छति
yanmadhuno madhavyasya paramasyānnādyasya paramam annādyaṃ rūpaṃ tenāhaṃ madhuno madhavyasya paramasyānnādyasya paramo 'nnādo madhavyo bhūyāsaṃ
trayyai vidyāyai yaśo 'si śriyai yaśo 'si yaśase brahmaṇo dīptir asi satyaśrīryaśaḥ śrīrmayi śrīḥ śrīḥ śrayatām iti madhuparkasya catuṣprāśnāty aṅguṣṭhadvitīyābhiḥ kaniṣṭhayā prathamam evam anupūrvaṃ sarvābhistad avaśiṣṭaṃ suhṛde prayacchati
- 14
आचामत्य् अमृतोपस्तरणम् असीति
ācāmaty amṛtopastaraṇam asīti
- 15
तस्मा असिपाणिर्गां प्राह
tasmā asipāṇirgāṃ prāha
- 16
तां शास्ति मम चामुष्य च पाप्मानं जहि हतो मे पाप्मा पाप्मानं मे हतों कुरुतेति
tāṃ śāsti mama cāmuṣya ca pāpmānaṃ jahi hato me pāpmā pāpmānaṃ me hatoṃ kuruteti
- 17
चतुरो नानागोत्रान्ब्राह्मणान्भोजयेत्
caturo nānāgotrānbrāhmaṇānbhojayet
- 18
एष आद्य उपायः
eṣa ādya upāyaḥ
- 19
यद्य् उत्सृजेन्माता रुद्राणाम् इति जपेत्
माता रुद्राणां दुहिता वसूनां स्वसादित्यानाम् अमृतस्य नाभिः
प्र णु वोचं चिकितुषे जनाय मा गाम् अनागाम् अदितिं वधिष्ट
सूयवसाद्भगवती हि भूया अथो वयं भगवन्तः स्याम
अद्धि तृणम् अघ्न्ये विश्वदानीं पिब शुद्धम् उदकम् आचरन्ती
ओ३म् उत्सृजत
तृणान्य् अत्त्व् इत्य् उक्त्वा ताम् उत्सृष्टां पशुम् अङ्गं वा
yady utsṛjenmātā rudrāṇām iti japet
mātā rudrāṇāṃ duhitā vasūnāṃ svasādityānām amṛtasya nābhiḥ
pra ṇu vocaṃ cikituṣe janāya mā gām anāgām aditiṃ vadhiṣṭa
sūyavasādbhagavatī hi bhūyā atho vayaṃ bhagavantaḥ syāma
addhi tṛṇam aghnye viśvadānīṃ piba śuddham udakam ācarantī
o3m utsṛjata
tṛṇāny attv ity uktvā tām utsṛṣṭāṃ paśum aṅgaṃ vā
- 20
नामांसो मधुपर्कः स्याद् इति ह विज्ञायते
nāmāṃso madhuparkaḥ syād iti ha vijñāyate
- 21
अपि वा घृतौदन एव स्यात्
api vā ghṛtaudana eva syāt

