11 shlokas
- 1
कुमारे जाते जातकर्म
kumāre jāte jātakarma
- 2
प्राक्स्तनप्राशनाद्व्रीहिं च यवं च जातरूपेणावघृष्येदम् अन्नम् इति प्राशयेद् इदम् अन्नम् अयं रस इदं प्राणेनामृतं सह पृथिवी ते माता द्यौः पिता जीवाहि शरदः शतं पश्याहि शरदः शतम् इति
prākstanaprāśanādvrīhiṃ ca yavaṃ ca jātarūpeṇāvaghṛṣyedam annam iti prāśayed idam annam ayaṃ rasa idaṃ prāṇenāmṛtaṃ saha pṛthivī te mātā dyauḥ pitā jīvāhi śaradaḥ śataṃ paśyāhi śaradaḥ śatam iti
- 3
अथैनम् अभिमन्त्रयते ऽङ्गादङ्गात्सम्भवसि हृदयाद् अधि जायसे
आत्मा वै पुत्रनामासि स जीव शरदः शतं पश्याहि शरदः शतम् इति
athainam abhimantrayate 'ṅgādaṅgātsambhavasi hṛdayād adhi jāyase
ātmā vai putranāmāsi sa jīva śaradaḥ śataṃ paśyāhi śaradaḥ śatam iti
- 4
अथैनं परिददात्यह्ने त्वा परिददाम्य् अहस्त्वा रात्र्यै परिददातु रात्रिस्त्वाहोरात्राभ्यां परिददात्व् अहोरात्रौ त्वार्धमासेभ्यः परिदत्ताम् अर्धमासास्त्वा मासेभ्यः परिददतु मासास्त्वर्तुभ्यः परिददत्व् ऋतवस्त्वा संवत्सराय परिददतु संवत्सरस्त्वा जरायै मृत्यवे परिददात्विति
athainaṃ paridadātyahne tvā paridadāmy ahastvā rātryai paridadātu rātristvāhorātrābhyāṃ paridadātv ahorātrau tvārdhamāsebhyaḥ paridattām ardhamāsāstvā māsebhyaḥ paridadatu māsāstvartubhyaḥ paridadatv ṛtavastvā saṃvatsarāya paridadatu saṃvatsarastvā jarāyai mṛtyave paridadātviti
- 5
को ऽसि कतमो ऽसीत्याह सं मासं प्रविशासाविति
ko 'si katamo 'sītyāha saṃ māsaṃ praviśāsāviti
- 6
अथास्य गुह्यं नाम ददाति वेदो ऽसीति
athāsya guhyaṃ nāma dadāti vedo 'sīti
- 7
अथास्य मूर्धानम् उपजिघ्रत्यश्मा भव परशुर्भव हिरण्यम् अस्तृतं भव पशूनां त्वा हिंकारेणाभिजिघ्रामीति
athāsya mūrdhānam upajighratyaśmā bhava paraśurbhava hiraṇyam astṛtaṃ bhava paśūnāṃ tvā hiṃkāreṇābhijighrāmīti
- 8
एवम् एव प्रवासाद् एत्य पुत्राणां मूर्धानम् उपजिघ्रति
evam eva pravāsād etya putrāṇāṃ mūrdhānam upajighrati
- 9
फलीकरणमिश्रान्सर्षपान्दशरात्रम् अग्नौ जुहुयात्शण्डायेति द्वाभ्यां शण्डाय मर्कायोपवीराय शौण्डिकेर उलूखलो मलिम्लुचो दुणाशि च्यवनो नश्यताद् इतः स्वाहा
आलिखन्विलिखन्न् अनिमिषन्किंवदन्त उपश्रुतिर् अर्यम्णः कुम्भी शत्रुः पात्रपाणिर्निपुणहान्त्रीमुखः सर्षपारुणो नश्यताद् इतः स्वाहेति
phalīkaraṇamiśrānsarṣapāndaśarātram agnau juhuyātśaṇḍāyeti dvābhyāṃ śaṇḍāya markāyopavīrāya śauṇḍikera ulūkhalo malimluco duṇāśi cyavano naśyatād itaḥ svāhā
ālikhanvilikhann animiṣankiṃvadanta upaśrutir aryamṇaḥ kumbhī śatruḥ pātrapāṇirnipuṇahāntrīmukhaḥ sarṣapāruṇo naśyatād itaḥ svāheti
- 10
दशरात्रं दम्पती सूतकौ भवतः
daśarātraṃ dampatī sūtakau bhavataḥ
- 11
तस्यान्ते स्नात्वोत्थानम्
tasyānte snātvotthānam

