26 shlokas
- 1
तृतीये संवत्सरे जटाः कुर्वीत
tṛtīye saṃvatsare jaṭāḥ kurvīta
- 2
गर्भतृतीय इत्येके
garbhatṛtīya ityeke
- 3
उदगयने पूर्वपक्षे पुण्ये नक्षत्रे ब्राह्मणान्स्वस्ति वाच्यापराह्णे ऽग्निं प्रणयित्वा दक्षिणतो ऽग्नेश्चत्वारि पूर्णपात्राणि निदध्याद्व्रीहियवानाम् अभितः
udagayane pūrvapakṣe puṇye nakṣatre brāhmaṇānsvasti vācyāparāhṇe 'gniṃ praṇayitvā dakṣiṇato 'gneścatvāri pūrṇapātrāṇi nidadhyādvrīhiyavānām abhitaḥ
- 4
मध्ये तिलमाषाणाम्
madhye tilamāṣāṇām
- 5
आचान्तोदके ऽन्वारब्धे जुहुयात्
ācāntodake 'nvārabdhe juhuyāt
- 6
महाव्याहृतिभिर्हुत्वा विरूपाक्षेणात्र पञ्चमीं जुहोति
mahāvyāhṛtibhirhutvā virūpākṣeṇātra pañcamīṃ juhoti
- 7
सर्वौषधीभि स्फाण्टम् उदकम् आनयन्ति
sarvauṣadhībhi sphāṇṭam udakam ānayanti
- 8
व्रीहियवास्तिलमाषा इत्येतत्सर्वौषधम्
vrīhiyavāstilamāṣā ityetatsarvauṣadham
- 9
आयम् अगात्सविता क्षुरेणेति क्षुरम् आदत्त आयम् अगात्सविता क्षुरेण विश्वैर्देवैर् अनुमतो मरुद्भिः
स नः शिवो भवतु विश्वकर्मा यूयं पात स्वस्तिभिः सदा न इति
āyam agātsavitā kṣureṇeti kṣuram ādatta āyam agātsavitā kṣureṇa viśvairdevair anumato marudbhiḥ
sa naḥ śivo bhavatu viśvakarmā yūyaṃ pāta svastibhiḥ sadā na iti
- 10
उष्णेन वाय उदकेनेहीत्युदकम् आदत्त उष्णेन वाय उदकेनेह्यदितिः केशान्वपत्विति
uṣṇena vāya udakenehītyudakam ādatta uṣṇena vāya udakenehyaditiḥ keśānvapatviti
- 11
आप उन्दन्तु जीवस इति दक्षिणं केशान्तम् अभ्युन्द्याद् आप उन्दन्तु जीवसे दीर्घायुष्ट्वाय वर्चस इति
āpa undantu jīvasa iti dakṣiṇaṃ keśāntam abhyundyād āpa undantu jīvase dīrghāyuṣṭvāya varcasa iti
- 12
तस्मिंस्तिस्रो दर्भपिञ्जूलीर् उपदधात्येकां वा
tasmiṃstisro darbhapiñjūlīr upadadhātyekāṃ vā
- 13
धारयतु प्रजापतिर् इति धारयेद्धारयतु प्रजापतिः पुनः पुनः सुवप्तवा इति
dhārayatu prajāpatir iti dhārayeddhārayatu prajāpatiḥ punaḥ punaḥ suvaptavā iti
- 14
ऊर्ध्वं त्रिर् आदर्शेन स्पृष्ट्वा येन धातेति क्षुरेण छिन्द्याद्येन धाता बृहस्पतेर् अग्नेर् इन्द्रस्य चायुषे ऽवपत्
तेन त आयुषे वपामि सुश्लोक्याय स्वस्तय इति येन तत्प्रजापतिर्मरुद्भ्यो गृहमेधिभ्यो ऽवपत्
तेन त आयुषे वपामि सुश्लोक्याय स्वस्तय इति
ūrdhvaṃ trir ādarśena spṛṣṭvā yena dhāteti kṣureṇa chindyādyena dhātā bṛhaspater agner indrasya cāyuṣe 'vapat
tena ta āyuṣe vapāmi suślokyāya svastaya iti yena tatprajāpatirmarudbhyo gṛhamedhibhyo 'vapat
tena ta āyuṣe vapāmi suślokyāya svastaya iti
- 15
येन भूयश्चरात्य् अयं ज्योक्च पश्याति सूर्यम्
तेन त आयुषे वपामि सुश्लोक्याय स्वस्तय इत्येवं पश्चात्
yena bhūyaścarāty ayaṃ jyokca paśyāti sūryam
tena ta āyuṣe vapāmi suślokyāya svastaya ityevaṃ paścāt
- 16
तथोत्तरतः
tathottarataḥ
- 17
प्रतिमन्त्रं केशांश्च दर्भपिञ्जूलीशेषांश्चानडुहे गोमये ऽभूमिस्पृष्टे निदध्याद्ब्राह्मणस्य पुरस्तात्पश्चाद् इतरयोर्वर्णयोः
pratimantraṃ keśāṃśca darbhapiñjūlīśeṣāṃścānaḍuhe gomaye 'bhūmispṛṣṭe nidadhyādbrāhmaṇasya purastātpaścād itarayorvarṇayoḥ
- 18
यत्क्षुरेणेति नापिताय क्षुरं प्रयच्छेद्यत्क्षुरेण मम्ला वप्त्रा वपसि नापिताङ्गानि शुद्धानि कुर्वायुर्वर्चो मा हिंसीर्नापितेति
yatkṣureṇeti nāpitāya kṣuraṃ prayacchedyatkṣureṇa mamlā vaptrā vapasi nāpitāṅgāni śuddhāni kurvāyurvarco mā hiṃsīrnāpiteti
- 19
यथैषां गोत्रकल्पः कुलकल्पो वा
yathaiṣāṃ gotrakalpaḥ kulakalpo vā
- 20
आप्लुते प्रायश्चित्तीर्जुहुयात्
āplute prāyaścittīrjuhuyāt
- 21
आवृतैव स्त्रियाः कुर्याद् अमन्त्रम्
āvṛtaiva striyāḥ kuryād amantram
- 22
समन्त्रं चेत्पश्चाज्जुहुयात्
samantraṃ cetpaścājjuhuyāt
- 23
अथास्य मूर्धानम् आरभ्य जपति त्रियायुषं कश्यपस्य जमदग्नेस्त्रियायुषं यद्देवानां त्रियायुषं तत्ते अस्तु त्रियायुषम् इति
athāsya mūrdhānam ārabhya japati triyāyuṣaṃ kaśyapasya jamadagnestriyāyuṣaṃ yaddevānāṃ triyāyuṣaṃ tatte astu triyāyuṣam iti
- 24
धान्यपल्वले गोष्ठे वा केशान्निखनेत्
dhānyapalvale goṣṭhe vā keśānnikhanet
- 25
कुशलीकर्ता पूर्णपात्राणि हरेत्
kuśalīkartā pūrṇapātrāṇi haret
- 26
गौर्दक्षिणा
gaurdakṣiṇā

