20 shlokas
- 1
पूषा त्वेत इति प्रस्थिताम् अनुमन्त्रयते
pūṣā tveta iti prasthitām anumantrayate
- 2
पूषा त्वेतो नयतु हस्तगृह्याश्विनौ त्वा प्रवहतां रथेन
गृहान्गच्छ गृहपत्नी यथासो वशिनी त्वं विदथम् आवदासीति
pūṣā tveto nayatu hastagṛhyāśvinau tvā pravahatāṃ rathena
gṛhāngaccha gṛhapatnī yathāso vaśinī tvaṃ vidatham āvadāsīti
- 3
स्वं कुलं प्राप्तां कल्याणशीलाः कल्याणप्रजाः समवजीर्णाः प्रत्यवरोपयन्तीह प्रियं प्रजया ते समृध्यताम् अस्मिन्गृहे गार्हपत्याय जागृहि
एना पत्या तन्वं संसृजस्वाथाजीव्री विदथम् आवदासीति
svaṃ kulaṃ prāptāṃ kalyāṇaśīlāḥ kalyāṇaprajāḥ samavajīrṇāḥ pratyavaropayantīha priyaṃ prajayā te samṛdhyatām asmingṛhe gārhapatyāya jāgṛhi
enā patyā tanvaṃ saṃsṛjasvāthājīvrī vidatham āvadāsīti
- 4
प्रत्यवरोप्यानडुहे चर्मण्युत्तरलोमन्युपवेशयेद् इह गावो निषीदन्त्विहाश्वा इह पुरुषाः
इहो सहस्रदक्षिणो ऽभि पूषा निषीदत्विति
pratyavaropyānaḍuhe carmaṇyuttaralomanyupaveśayed iha gāvo niṣīdantvihāśvā iha puruṣāḥ
iho sahasradakṣiṇo 'bhi pūṣā niṣīdatviti
- 5
कुमारम् उपस्थ आधाय शकलोटान् आवपेत्फलानि वा
kumāram upastha ādhāya śakaloṭān āvapetphalāni vā
- 6
उत्थाप्य कुमारम् अन्वारब्धायां जुहुयाद् इह धृतिर् इत्यष्टाभिः स्वाहाकारान्तैः
utthāpya kumāram anvārabdhāyāṃ juhuyād iha dhṛtir ityaṣṭābhiḥ svāhākārāntaiḥ
- 7
इह धृतिर् इह स्वधृतिर् इह रन्तिर् इह रमस्व
मयि धृतिर्मयि स्वधृतिर्मयि रमो मयि रमस्वेति
iha dhṛtir iha svadhṛtir iha rantir iha ramasva
mayi dhṛtirmayi svadhṛtirmayi ramo mayi ramasveti
- 8
त्रिरात्रम् अक्षारालवणाशिनौ ब्रह्मचारिणावधः संवेशिनाव् असंवर्तमानौ सह शयाताम्
trirātram akṣārālavaṇāśinau brahmacāriṇāvadhaḥ saṃveśināv asaṃvartamānau saha śayātām
- 9
ऊर्ध्वं त्रिरात्रात्संभवः
ūrdhvaṃ trirātrātsaṃbhavaḥ
- 10
निशायां जायापतिकर्मण्यम्
niśāyāṃ jāyāpatikarmaṇyam
- 11
प्रायश्चित्तीर्जुहुयाद् अग्ने प्रायश्चित्ते त्वं देवानां प्रायश्चित्तिर् असि ब्राह्मणस्त्वा नाथकाम उपधावामि यास्यै प्रजाघ्नी तनूस्ताम् अस्या उपजहि स्वाहा
वायो प्रायश्चित्ते त्वं देवानां प्रायश्चित्तिर् असि ब्राह्मणस्त्वा नाथकाम उपधावामि यास्यै पशुघ्नी तनूस्ताम् अस्या उपजहि स्वाहा
सूर्य प्रायश्चित्ते त्वं देवानां प्रायश्चित्तिर् असि ब्राह्मणस्त्वा नाथकाम उपधावामि यास्यै पतिघ्नी तनूस्ताम् अस्या उपजहि स्वाहा
चन्द्र प्रायश्चित्ते त्वं देवानां प्रायश्चित्तिर् असि ब्राह्मणस्त्वा नाथकाम उपधावामि यास्यै गृहघ्नी तनूस्ताम् अस्या उपजहि स्वाहा
अग्ने वायो सूर्य चन्द्र प्रायश्चित्तयो यूयं देवानां प्रायश्चित्तय स्थ ब्राह्मणो वो नाथकाम उपधावामि यास्यै यशोघ्नी तनूस्ताम् अस्या उपहत स्वाहेति
prāyaścittīrjuhuyād agne prāyaścitte tvaṃ devānāṃ prāyaścittir asi brāhmaṇastvā nāthakāma upadhāvāmi yāsyai prajāghnī tanūstām asyā upajahi svāhā
vāyo prāyaścitte tvaṃ devānāṃ prāyaścittir asi brāhmaṇastvā nāthakāma upadhāvāmi yāsyai paśughnī tanūstām asyā upajahi svāhā
sūrya prāyaścitte tvaṃ devānāṃ prāyaścittir asi brāhmaṇastvā nāthakāma upadhāvāmi yāsyai patighnī tanūstām asyā upajahi svāhā
candra prāyaścitte tvaṃ devānāṃ prāyaścittir asi brāhmaṇastvā nāthakāma upadhāvāmi yāsyai gṛhaghnī tanūstām asyā upajahi svāhā
agne vāyo sūrya candra prāyaścittayo yūyaṃ devānāṃ prāyaścittaya stha brāhmaṇo vo nāthakāma upadhāvāmi yāsyai yaśoghnī tanūstām asyā upahata svāheti
- 12
स्थालीपाकाद् अग्निं प्रजापतिं चेष्ट्वा संपातांश्चमस आनीय स्रोतांस्याङ्क्ष्वेत्येनां ब्रूयात्
sthālīpākād agniṃ prajāpatiṃ ceṣṭvā saṃpātāṃścamasa ānīya srotāṃsyāṅkṣvetyenāṃ brūyāt
- 13
नाभिं प्रथमम्
nābhiṃ prathamam
- 14
ततो यान्य् ऊर्ध्वम्
tato yāny ūrdhvam
- 15
ततो यान्यर्वाञ्चि
tato yānyarvāñci
- 16
ऊर्ध्वम् अर्धरात्रात्संवेशनं विष्णुर्योनिं कल्पयत्वित्येतेन तृचेन
ūrdhvam ardharātrātsaṃveśanaṃ viṣṇuryoniṃ kalpayatvityetena tṛcena
- 17
विष्णुर्योनिं कल्पयतु त्वष्टा रूपाणि पिंशतु
आसिञ्चतु प्रजापतिर्धाता गर्भं दधातु ते
गर्भं धेहि सिनीवालि गर्भं धेहि सरस्वति
गर्भं ते अश्विनौ देवावाधत्तां पुष्करस्रजौ
हिरण्ययी अरणी यं निर्मन्थताम् अश्विनौ
तं ते गर्भं दधाम्यहं दशमे मासि सूतवा इति
viṣṇuryoniṃ kalpayatu tvaṣṭā rūpāṇi piṃśatu
āsiñcatu prajāpatirdhātā garbhaṃ dadhātu te
garbhaṃ dhehi sinīvāli garbhaṃ dhehi sarasvati
garbhaṃ te aśvinau devāvādhattāṃ puṣkarasrajau
hiraṇyayī araṇī yaṃ nirmanthatām aśvinau
taṃ te garbhaṃ dadhāmyahaṃ daśame māsi sūtavā iti
- 18
ऋतावृतावेवम् एव संवेशने
ṛtāvṛtāvevam eva saṃveśane
- 19
हुत्वाचार्याय गां दद्यात्
hutvācāryāya gāṃ dadyāt
- 20
अदर्शने ब्राह्मणेभ्यो गां दद्यात्
adarśane brāhmaṇebhyo gāṃ dadyāt

