21 shlokas
- 1
अथास्या दक्षिणेन पाणिना दक्षिणं पाणिं गृह्णाति
athāsyā dakṣiṇena pāṇinā dakṣiṇaṃ pāṇiṃ gṛhṇāti
- 2
प्रहस्तं पुंसः
prahastaṃ puṃsaḥ
- 3
अङ्गुली स्त्रियः
aṅgulī striyaḥ
- 4
साङ्गुष्ठं मिथुनकामः
sāṅguṣṭhaṃ mithunakāmaḥ
- 5
गृह्णामि ते सौभगत्वाय हस्तं मया पत्या जरदष्टिर्यथासत्
भगो ऽर्यमा सविता पुरंधिर्मह्यं त्वादुर्गार्हपत्याय देवाः
सोमो ऽददद्गन्धर्वाय गन्धर्वो ऽददद् अग्नये
रयिं च पुत्रांश्चादाद् अग्निर्मह्यम् अथो इमाम्
सोमः प्रथमो विविदे गन्धर्वो विविद उत्तरः
तृतीयो ऽग्निष्टे पतिस्तुरीयो ऽहं मनुष्यजा इति
gṛhṇāmi te saubhagatvāya hastaṃ mayā patyā jaradaṣṭiryathāsat
bhago 'ryamā savitā puraṃdhirmahyaṃ tvādurgārhapatyāya devāḥ
somo 'dadadgandharvāya gandharvo 'dadad agnaye
rayiṃ ca putrāṃścādād agnirmahyam atho imām
somaḥ prathamo vivide gandharvo vivida uttaraḥ
tṛtīyo 'gniṣṭe patisturīyo 'haṃ manuṣyajā iti
- 6
उपनयनावृताश्मानम् अधिष्ठापयेत्स्त्रीवत्
उत्तरपुरस्ताद् अग्नेर्भार्यया सम्प्रेक्ष्यमाणो जपत्यघोरचक्षुर् अपतिघ्नी म एधि शिवा पशुभ्यः सुमनाः सुवर्चाः
जीवसूर्देवकामा स्योना शं नो भव द्विपदे शं चतुष्पदे
आ नः प्रजां जनयतु प्रजापतिर् आजरसाय समनक्त्वर्यमा
अदुर्मङ्गलीः पतिलोकम् आविश शं न एधि द्विपदे शं चतुष्पदे
तां पूषञ्छिवतमाम् एरयस्व यस्यां बीजं मनुष्या वपन्ति
या न ऊरू उशती विस्रयातै यस्याम् उशन्तः प्रहरेम शेफम्
अमो ऽहम् अस्मि सा त्वं सामाहम् अस्म्य् ऋक्त्वं मनो ऽहम् अस्मि वाक्त्वं द्यौर् अहं पृथिवी त्वं तावेहि संभवाव सह रेतो दधावहै पुंसे पुत्राय वेत्तवै माम् अनुव्रता भव सहशय्या मया भवासाविति
upanayanāvṛtāśmānam adhiṣṭhāpayetstrīvat
uttarapurastād agnerbhāryayā samprekṣyamāṇo japatyaghoracakṣur apatighnī ma edhi śivā paśubhyaḥ sumanāḥ suvarcāḥ
jīvasūrdevakāmā syonā śaṃ no bhava dvipade śaṃ catuṣpade
ā naḥ prajāṃ janayatu prajāpatir ājarasāya samanaktvaryamā
adurmaṅgalīḥ patilokam āviśa śaṃ na edhi dvipade śaṃ catuṣpade
tāṃ pūṣañchivatamām erayasva yasyāṃ bījaṃ manuṣyā vapanti
yā na ūrū uśatī visrayātai yasyām uśantaḥ praharema śepham
amo 'ham asmi sā tvaṃ sāmāham asmy ṛktvaṃ mano 'ham asmi vāktvaṃ dyaur ahaṃ pṛthivī tvaṃ tāvehi saṃbhavāva saha reto dadhāvahai puṃse putrāya vettavai mām anuvratā bhava sahaśayyā mayā bhavāsāviti
- 7
अथास्या नाम गृहीत्वाग्निं परिक्रमेयाताम् ईर्त्वम् अस्यूर्क्ते माता नाम सा माम् एहि सह प्रजया सह रायस्पोषेणेति
athāsyā nāma gṛhītvāgniṃ parikrameyātām īrtvam asyūrkte mātā nāma sā mām ehi saha prajayā saha rāyaspoṣeṇeti
- 8
तस्यां प्रत्याव्रजितायां भ्रातान्यो वा सुहृद् अभिघारितान्लाजाञ्छूर्पाद् अञ्जलिनोपघातम् अञ्जलावावपेत्
tasyāṃ pratyāvrajitāyāṃ bhrātānyo vā suhṛd abhighāritānlājāñchūrpād añjalinopaghātam añjalāvāvapet
- 9
उपस्तीर्णाभिघारितान्कृत्वा तान् इतराग्नौ जुहुयात्कन्यलेयं नार्यर्यम्णम् इति
upastīrṇābhighāritānkṛtvā tān itarāgnau juhuyātkanyaleyaṃ nāryaryamṇam iti
- 10
कन्यला पितृभ्यः पतिलोकं यतीयम् अव दीक्षाम् अयक्षत स्वाहा
इयं नार्युपब्रूते ऽग्नौ लाजान् आवपन्ती
दीर्घायुर् अस्तु मे पतिर् एधन्तां ज्ञातयो मम स्वाहा
अर्यम्णं नु देवं कन्याग्निम् अयक्षत
स इमां देवो अर्यमा प्रेतो मुञ्चातु मामुतः स्वाहेति
kanyalā pitṛbhyaḥ patilokaṃ yatīyam ava dīkṣām ayakṣata svāhā
iyaṃ nāryupabrūte 'gnau lājān āvapantī
dīrghāyur astu me patir edhantāṃ jñātayo mama svāhā
aryamṇaṃ nu devaṃ kanyāgnim ayakṣata
sa imāṃ devo aryamā preto muñcātu māmutaḥ svāheti
- 11
होमान्तेषु जपति चतुर्विश्वा उत त्वया वयं धारा उदन्या इव
अतिगाहेमहि द्विष इति
homānteṣu japati caturviśvā uta tvayā vayaṃ dhārā udanyā iva
atigāhemahi dviṣa iti
- 12
तूष्णीं धारिका कामायावपेच्चतुर्थम्
tūṣṇīṃ dhārikā kāmāyāvapeccaturtham
- 13
दक्षिणं शूर्पपुटं काम इत्याचक्षते
dakṣiṇaṃ śūrpapuṭaṃ kāma ityācakṣate
- 14
उत्तरपुरस्ताद् अग्नेः सप्त पदान्यभ्युत्क्रमयेद् एकम् इष इति प्रतिमन्त्रम्
uttarapurastād agneḥ sapta padānyabhyutkramayed ekam iṣa iti pratimantram
- 15
एकम् इषे विष्णुस्त्वान्वेतु
द्वे ऊर्जे विष्णुस्त्वान्वेतु
त्रीणि रायस्पोषाय विष्णुस्त्वान्वेतु
चत्वारि मयोभवाय विष्णुस्त्वान्वेतु
पञ्च प्रजाभ्यो विष्णुस्त्वान्वेतु
षड् ऋतुभ्यो विष्णुस्त्वान्वेतु
सखा सप्तपदी भवेति
ekam iṣe viṣṇustvānvetu
dve ūrje viṣṇustvānvetu
trīṇi rāyaspoṣāya viṣṇustvānvetu
catvāri mayobhavāya viṣṇustvānvetu
pañca prajābhyo viṣṇustvānvetu
ṣaḍ ṛtubhyo viṣṇustvānvetu
sakhā saptapadī bhaveti
- 16
सप्तमे प्राचीम् अवस्थाप्योदकुम्भेन मार्जयेरन्न् आपोहिष्ठीयाभिस्तिसृभिः
saptame prācīm avasthāpyodakumbhena mārjayerann āpohiṣṭhīyābhistisṛbhiḥ
- 17
प्रेक्षकान् अनुमन्त्रयते सुमङ्गलीर् इयं वधूर् इमां समेत पश्यत
सौभाग्यम् अस्यै दत्त्वायाथास्तं विपरेतनेति
prekṣakān anumantrayate sumaṅgalīr iyaṃ vadhūr imāṃ sameta paśyata
saubhāgyam asyai dattvāyāthāstaṃ viparetaneti
- 18
प्रेक्षयेद्ध्रुवम् अरुन्धतीं सप्त ऋषीन्पश्यानीति प्रतिजानानाम्
prekṣayeddhruvam arundhatīṃ sapta ṛṣīnpaśyānīti pratijānānām
- 19
ध्रुवो ऽसीति ध्रुवम् उपतिष्ठते
dhruvo 'sīti dhruvam upatiṣṭhate
- 20
ध्रुवो ऽसि ध्रुवाहं पतिकुले भूयासम् अमुष्येति पतिनाम गृह्णीयाद् असावित्य् आत्मनः
dhruvo 'si dhruvāhaṃ patikule bhūyāsam amuṣyeti patināma gṛhṇīyād asāvity ātmanaḥ
- 21
अरुन्धतीम् अरुन्धत्यरुद्धाहं पत्या भूयासम् अमुनेति पतिनाम गृह्णीयाद् असावित्यात्मनः
arundhatīm arundhatyaruddhāhaṃ patyā bhūyāsam amuneti patināma gṛhṇīyād asāvityātmanaḥ

