20 shlokas
- 1
स्नात्वा मातापितरौ परिचरेत्
snātvā mātāpitarau paricaret
- 2
तदधीनः स्यात्
tadadhīnaḥ syāt
- 3
ताभ्याम् अनुज्ञातो जायां विन्देतानग्निकां समानजातीयाम् असगोत्रां मातुर् असपिण्डां ज्यायसः कनीयसीम्
tābhyām anujñāto jāyāṃ vindetānagnikāṃ samānajātīyām asagotrāṃ mātur asapiṇḍāṃ jyāyasaḥ kanīyasīm
- 4
दूतम् अनुमन्त्रयते ऽनृक्षरा ऋजवः सन्तु पन्था एभिः सखायो यन्ति नो वरेयम्
सम् अर्यमा सं भगो नो ऽनुनीयात्सं जास्पत्यं सुयमम् अस्तु देवा इति
dūtam anumantrayate 'nṛkṣarā ṛjavaḥ santu panthā ebhiḥ sakhāyo yanti no vareyam
sam aryamā saṃ bhago no 'nunīyātsaṃ jāspatyaṃ suyamam astu devā iti
- 5
पाणिग्रहणे ऽग्निम् आह्रियमाणम् अनुमन्त्रयते ऽग्निर् ऐतु प्रथमो देवतानां सो ऽस्यै प्रजां मुञ्चतु मृत्युपाशात्
तद् अयं राजा वरुणो ऽनुमन्यतां यथेयं स्त्री पौत्रम् अघं न रोदाद् इति
pāṇigrahaṇe 'gnim āhriyamāṇam anumantrayate 'gnir aitu prathamo devatānāṃ so 'syai prajāṃ muñcatu mṛtyupāśāt
tad ayaṃ rājā varuṇo 'numanyatāṃ yatheyaṃ strī pautram aghaṃ na rodād iti
- 6
प्रज्वलितम् उपतिष्ठत इमाम् अग्निस्त्रायतां गार्हपत्यः प्रजाम् अस्यै नयतु दीर्घम् आयुः
अशून्योपस्था जीवताम् अस्तु माता पौत्रम् आनन्दम् अभि प्रबुध्यताम् इयम् इति
prajvalitam upatiṣṭhata imām agnistrāyatāṃ gārhapatyaḥ prajām asyai nayatu dīrgham āyuḥ
aśūnyopasthā jīvatām astu mātā pautram ānandam abhi prabudhyatām iyam iti
- 7
पुरस्ताद् अग्नेर्ब्राह्मणो वाग्यतः प्रत्यङ्मुख उदकुम्भं धारयंस्तिष्ठेत्
purastād agnerbrāhmaṇo vāgyataḥ pratyaṅmukha udakumbhaṃ dhārayaṃstiṣṭhet
- 8
दक्षिणतो ऽग्नेः शमीपलाशमिश्रान्लाजाञ्छूर्पे माता धारयेत्
dakṣiṇato 'gneḥ śamīpalāśamiśrānlājāñchūrpe mātā dhārayet
- 9
मातुर् अभावे तन्मात्री
mātur abhāve tanmātrī
- 10
प्रत्यग् अग्नेर् एरकां तेजनीं वान्यद्वैवंजातीयं संवेष्ट्य निदध्याद्यथा प्रसार्यमाणं पश्चार्धं बर्हिषः प्राप्नोति
pratyag agner erakāṃ tejanīṃ vānyadvaivaṃjātīyaṃ saṃveṣṭya nidadhyādyathā prasāryamāṇaṃ paścārdhaṃ barhiṣaḥ prāpnoti
- 11
अथास्यै वाससी प्रोक्ष्यानुमन्त्र्य ददाति या अकृन्तन्न् अवयन्या अतन्वत याश्च देवीर् अन्ताम् अभितो ऽददन्त
तास्त्वा देवीर्जरसा संव्ययन्त्व् आयुष्मतीदं परिधत्स्व वास इति
athāsyai vāsasī prokṣyānumantrya dadāti yā akṛntann avayanyā atanvata yāśca devīr antām abhito 'dadanta
tāstvā devīrjarasā saṃvyayantv āyuṣmatīdaṃ paridhatsva vāsa iti
- 12
तां ब्रूयाद् इमाम् एरकां दक्षिणेन पादेनाभिजहीति
tāṃ brūyād imām erakāṃ dakṣiṇena pādenābhijahīti
- 13
प्र मे पतियानः पन्थाः कल्पताम् इति
pra me patiyānaḥ panthāḥ kalpatām iti
- 14
अजपत्यां स्वयं जपेत्प्रास्या इति
ajapatyāṃ svayaṃ japetprāsyā iti
- 15
दक्षिणत एरकायां भार्याम् उपवेश्योत्तरतः पतिः
dakṣiṇata erakāyāṃ bhāryām upaveśyottarataḥ patiḥ
- 16
उभावन्वारभेयाताम्
ubhāvanvārabheyātām
- 17
स्वयम् उच्चैर्जुहुयाज्जायायाम् अन्वारब्धायाम्
svayam uccairjuhuyājjāyāyām anvārabdhāyām
- 18
महाव्याहृतिभिर्हुत्वा या तिरश्चीति सप्तभिर्जुहोति
mahāvyāhṛtibhirhutvā yā tiraścīti saptabhirjuhoti
- 19
संपातं प्रथमया मूर्धन्यासिञ्चेत्
saṃpātaṃ prathamayā mūrdhanyāsiñcet
- 20
या तिरश्ची निपद्यसे ऽहं विधरणीति
तां त्वा घृतस्य धारया संराधा राधयामसि संराधायै स्वाहा
मा ते गृहे निशि घोष उत्थाद् अन्यत्र त्वद्रुदत्यः संविशन्तु
मा त्वं विकेश्युर आवधिष्ठा जीवपत्नी पतिलोके विराज प्रजां पश्यन्ती सुमनस्यमाना स्वाहा
अन्वद्य नो ऽनुमतिर्यज्ञं देवेषु मन्यताम्
अग्निश्च हव्यवाहनस्तत्करोतु समृध्यतां स्वाहा
द्यौस्ते पृष्ठं रक्षतु वायुर् ऊरू अश्विनौ च स्तनं धयतस्ते पुत्रान्सविताभिरक्षतु
आ वाससः परिधानाद्बृहस्पतिर्विश्वे देवा अभिरक्षन्तु पश्चात्स्वाहा
अप्रजस्तां पौत्रमृत्युं पाप्मानम् उत वाघम्
शीर्ष्णः स्रजम् इवोन्मुच्य द्विषद्भ्यः प्रतिमुञ्चामि पाशं स्वाहा
यानि कानि च पापानि सर्वाङ्गेषु तवाभवन्
पूर्णाहुतिभिर् आज्यस्य सर्वाणि तान्यशीशमं स्वाहा
प्रजापत इत्येका
yā tiraścī nipadyase 'haṃ vidharaṇīti
tāṃ tvā ghṛtasya dhārayā saṃrādhā rādhayāmasi saṃrādhāyai svāhā
mā te gṛhe niśi ghoṣa utthād anyatra tvadrudatyaḥ saṃviśantu
mā tvaṃ vikeśyura āvadhiṣṭhā jīvapatnī patiloke virāja prajāṃ paśyantī sumanasyamānā svāhā
anvadya no 'numatiryajñaṃ deveṣu manyatām
agniśca havyavāhanastatkarotu samṛdhyatāṃ svāhā
dyauste pṛṣṭhaṃ rakṣatu vāyur ūrū aśvinau ca stanaṃ dhayataste putrānsavitābhirakṣatu
ā vāsasaḥ paridhānādbṛhaspatirviśve devā abhirakṣantu paścātsvāhā
aprajastāṃ pautramṛtyuṃ pāpmānam uta vāgham
śīrṣṇaḥ srajam ivonmucya dviṣadbhyaḥ pratimuñcāmi pāśaṃ svāhā
yāni kāni ca pāpāni sarvāṅgeṣu tavābhavan
pūrṇāhutibhir ājyasya sarvāṇi tānyaśīśamaṃ svāhā
prajāpata ityekā

