16 shlokas
- 1
सप्त सुत्याः सप्त च पाकयज्ञाः हविर्यज्ञाः सप्त तथैकविंशतिः
सर्वे ते यज्ञा अङ्गिरसो ऽपियन्ति नूतना यान् ऋषयो सृजन्ति ये च सृष्टाः पुराणैः
sapta sutyāḥ sapta ca pākayajñāḥ haviryajñāḥ sapta tathaikaviṃśatiḥ
sarve te yajñā aṅgiraso 'piyanti nūtanā yān ṛṣayo sṛjanti ye ca sṛṣṭāḥ purāṇaiḥ
- 2
एतेषु वेदेष्व् अपि चैकम् एवापव्रजम् ऋत्विजां संभरन्ति
कृट्स्तृपात्सचते ताम् अशस्तिं विष्कन्धम् एनं विसृतं प्रजासु
eteṣu vedeṣv api caikam evāpavrajam ṛtvijāṃ saṃbharanti
kṛṭstṛpātsacate tām aśastiṃ viṣkandham enaṃ visṛtaṃ prajāsu
- 3
निवर्तन्ते दक्षिणा नीयमानाः सुते सोमे वितते यज्ञतन्त्रे
मोघाशिषो यन्त्य् अनिवर्तमाना अनिष्टयज्ञा न तरन्ति लोकान्
nivartante dakṣiṇā nīyamānāḥ sute some vitate yajñatantre
moghāśiṣo yanty anivartamānā aniṣṭayajñā na taranti lokān
- 4
द्वादशवर्षं ब्रह्मचर्यं पृथग्वेदेषु तत्स्मृतम्
एवं व्यवस्थिता वेदाः सर्व एव स्वकर्मसु
dvādaśavarṣaṃ brahmacaryaṃ pṛthagvedeṣu tatsmṛtam
evaṃ vyavasthitā vedāḥ sarva eva svakarmasu
- 5
सन्ति चैषां समानाः मन्त्राः कल्पाश्च ब्राह्मणानि च
व्यवस्थानं तु तत्सर्वं पृथग्वेदेषु तत्स्मृतम्
santi caiṣāṃ samānāḥ mantrāḥ kalpāśca brāhmaṇāni ca
vyavasthānaṃ tu tatsarvaṃ pṛthagvedeṣu tatsmṛtam
- 6
ऋग्वेदस्य पृथिवी स्थानम् अन्तरिक्षस्थानो ऽध्वरः
द्यौ स्थानं सामवेदस्यापो भृग्वङ्गिरसां स्मृतम्
ṛgvedasya pṛthivī sthānam antarikṣasthāno 'dhvaraḥ
dyau sthānaṃ sāmavedasyāpo bhṛgvaṅgirasāṃ smṛtam
- 7
अग्निर्देवत ऋग्वेदस्य यजुर्वेदो वायुदेवतः
आदित्यः सामवेदस्य चन्द्रमा वैद्युतश्च भृग्वङ्गिरसाम्
agnirdevata ṛgvedasya yajurvedo vāyudevataḥ
ādityaḥ sāmavedasya candramā vaidyutaśca bhṛgvaṅgirasām
- 8
त्रिवृत्स्तोम ऋग्वेदस्य यजूंषि पञ्चदशेन सह जज्ञिरे
सप्तदशेन सामवेद एकविंशो ब्रह्मसंमितः
trivṛtstoma ṛgvedasya yajūṃṣi pañcadaśena saha jajñire
saptadaśena sāmaveda ekaviṃśo brahmasaṃmitaḥ
- 9
वाग् अध्यात्मम् ऋग्वेदस्य यजुषां प्राण उच्यते
चक्षुषी सामवेदस्य मनो भृग्वङ्गिरसां स्मृतम्
vāg adhyātmam ṛgvedasya yajuṣāṃ prāṇa ucyate
cakṣuṣī sāmavedasya mano bhṛgvaṅgirasāṃ smṛtam
- 10
ऋग्भिः सह गायत्रं जागतम् आहुर्यजूंषि त्रैष्टुभेन सह जज्ञिरे
उष्णिक्ककुब्भ्यां भृग्वङ्गिरसो जगत्या सामानि कवयो वदन्ति
ṛgbhiḥ saha gāyatraṃ jāgatam āhuryajūṃṣi traiṣṭubhena saha jajñire
uṣṇikkakubbhyāṃ bhṛgvaṅgiraso jagatyā sāmāni kavayo vadanti
- 11
ऋग्भिः पृथिवीं यजुषान्तरिक्षं साम्ना दिवं लोकजित्सोमजम्भाः
अथर्वभिर् अङ्गिरोभिश्च गुप्तो यज्ञश्चतुष्पाद्दिवम् उद्वहेत
ṛgbhiḥ pṛthivīṃ yajuṣāntarikṣaṃ sāmnā divaṃ lokajitsomajambhāḥ
atharvabhir aṅgirobhiśca gupto yajñaścatuṣpāddivam udvaheta
- 12
ऋग्भिः सुशस्तो यजुषा परिष्कृतः सविष्टुतः सामजित्सोमजम्भाः
अथर्वभिर् अङ्गिरोभिश्च गुप्तो यज्ञश्चतुष्पाद्दिवम् आरुरोह
ṛgbhiḥ suśasto yajuṣā pariṣkṛtaḥ saviṣṭutaḥ sāmajitsomajambhāḥ
atharvabhir aṅgirobhiśca gupto yajñaścatuṣpāddivam āruroha
- 13
ऋचो विद्वान्पृथिवीं वेद संप्रति यजूंषि विद्वान्बृहद् अन्तरिक्षम्
दिवं वेद सामगो यो विपश्चित्सर्वान्लोकान्यद्भृग्वङ्गिरोवित्
ṛco vidvānpṛthivīṃ veda saṃprati yajūṃṣi vidvānbṛhad antarikṣam
divaṃ veda sāmago yo vipaścitsarvānlokānyadbhṛgvaṅgirovit
- 14
यांश्च ग्रामे यांश्चारण्ये जपन्ति मन्त्रान्नानार्थान्बहुधा जनासः
सर्वे ते यज्ञा अङ्गिरसो ऽपियन्ति नूतना सा हि गतिर्ब्रह्मणो यावरार्ध्या
yāṃśca grāme yāṃścāraṇye japanti mantrānnānārthānbahudhā janāsaḥ
sarve te yajñā aṅgiraso 'piyanti nūtanā sā hi gatirbrahmaṇo yāvarārdhyā
- 15
त्रिविष्टपं त्रिदिवं नाकम् उत्तमं तम् एतया त्रय्या विद्ययैति
अत उत्तरे ब्रह्मलोका महान्तो ऽथर्वणाम् अङ्गिरसां च सा गतिः
triviṣṭapaṃ tridivaṃ nākam uttamaṃ tam etayā trayyā vidyayaiti
ata uttare brahmalokā mahānto 'tharvaṇām aṅgirasāṃ ca sā gatiḥ
- 16
अथर्वणाम् अङ्गिरसां च सा गतिर् इति ब्राह्मणम्
atharvaṇām aṅgirasāṃ ca sā gatir iti brāhmaṇam

