13 shlokas
- 1
सायंप्रातर्होमौ स्थालीपाको नवश्च यः
बलिश्च पितृयज्ञश्चाष्टका सप्तमः पशुः
इत्य् एते पाकयज्ञाः
sāyaṃprātarhomau sthālīpāko navaśca yaḥ
baliśca pitṛyajñaścāṣṭakā saptamaḥ paśuḥ
ity ete pākayajñāḥ
- 2
अग्न्याधेयम् अग्निहोत्रं पौर्णमास्यमावास्ये
नवेष्टिश्चातुर्मास्यानि पशुबन्धो ऽत्र सप्तमः
इत्य् एते हविर्यज्ञाः
agnyādheyam agnihotraṃ paurṇamāsyamāvāsye
naveṣṭiścāturmāsyāni paśubandho 'tra saptamaḥ
ity ete haviryajñāḥ
- 3
अग्निष्टोमो ऽत्यग्निष्टोम उक्थ्यः षोडशिमांस्ततः
वाजपेयो ऽतिरात्रश्चाप्तोर्यामात्र सप्तमः
इत्य् एते सुत्याः
agniṣṭomo 'tyagniṣṭoma ukthyaḥ ṣoḍaśimāṃstataḥ
vājapeyo 'tirātraścāptoryāmātra saptamaḥ
ity ete sutyāḥ
- 4
के स्विद्देवाः प्रवोवाजाः के स्विद्देवा अभिद्यवः
के स्विद्देवा हविष्मन्तः किं स्विज्जिगाति सुम्नयुः
ke sviddevāḥ pravovājāḥ ke sviddevā abhidyavaḥ
ke sviddevā haviṣmantaḥ kiṃ svijjigāti sumnayuḥ
- 5
ऋतव एव प्रवोवाजा मासा देवा अभिद्यवः
अर्धमासा हविष्मन्तस्तज्जिगाति सुम्नयुः
ṛtava eva pravovājā māsā devā abhidyavaḥ
ardhamāsā haviṣmantastajjigāti sumnayuḥ
- 6
कति स्विद्रात्रयः कत्य् अहानि कति स्तोत्राणि कति शस्त्राण्य् अस्य
कति स्वित्सवनाः संवत्सरस्य स्तोत्रियाः पदाक्षराणि कत्य् अस्य
kati svidrātrayaḥ katy ahāni kati stotrāṇi kati śastrāṇy asya
kati svitsavanāḥ saṃvatsarasya stotriyāḥ padākṣarāṇi katy asya
- 7
द्वाव् अतिरात्रौ षट्शतम् अग्निष्टोमा द्वे विंशतिशते उक्थ्यानां
द्वादश षोडशिनः षष्टिः षडहा वैषुवतं च
dvāv atirātrau ṣaṭśatam agniṣṭomā dve viṃśatiśate ukthyānāṃ
dvādaśa ṣoḍaśinaḥ ṣaṣṭiḥ ṣaḍahā vaiṣuvataṃ ca
- 8
अहान्यस्य विंशतिशतानि त्रीण्य् अहश्चैकं तावद् अस्य
संवत्सरस्य सवनाः सहस्रम् असीति त्रीणि च संस्तुतस्य
ahānyasya viṃśatiśatāni trīṇy ahaścaikaṃ tāvad asya
saṃvatsarasya savanāḥ sahasram asīti trīṇi ca saṃstutasya
- 9
षट्षष्टिश्च द्वे च शते भवत स्तुतशस्त्राणाम् अयुतं चैकम् अस्य
स्तोत्रियाश्च नवतिसहस्रा द्वे नियुते नवतिश्चाति षट्च
ṣaṭṣaṣṭiśca dve ca śate bhavata stutaśastrāṇām ayutaṃ caikam asya
stotriyāśca navatisahasrā dve niyute navatiścāti ṣaṭca
- 10
अष्टौ शतान्य् अयुतानि त्रिंशच्चतुर्नवतिश्च पदान्य् अस्य
संवत्सरस्य कविभिर्मितस्यैतावती मध्यमा देवमात्रा
aṣṭau śatāny ayutāni triṃśaccaturnavatiśca padāny asya
saṃvatsarasya kavibhirmitasyaitāvatī madhyamā devamātrā
- 11
अयुतम् एकं प्रयुतानि त्रिंशद्द्वे नियुते तथा ह्य् अनुसृष्टाः
अष्टौ शतानि नव चाक्षराण्य् एतावान् आत्मा परमः प्रजापतेः
ayutam ekaṃ prayutāni triṃśaddve niyute tathā hy anusṛṣṭāḥ
aṣṭau śatāni nava cākṣarāṇy etāvān ātmā paramaḥ prajāpateḥ
- 12
आद्यं वषट्कारः प्रदानान्तम् एतम् अग्निष्टोमे पर्वशः साधु कॢप्तम्
सौभेषजं छन्द ईप्सन्यद् अग्नौ चतुःशतं बहुधा हूयते यत्
ādyaṃ vaṣaṭkāraḥ pradānāntam etam agniṣṭome parvaśaḥ sādhu kḷptam
saubheṣajaṃ chanda īpsanyad agnau catuḥśataṃ bahudhā hūyate yat
- 13
प्रातःसवनस्तुत एकविंशो गायत्रस्तोममित एक एव
माध्यंदिनः सप्तदशेन कॢप्तस्त्रयस्त्रिंशेन सवनं तृतीयम्
prātaḥsavanastuta ekaviṃśo gāyatrastomamita eka eva
mādhyaṃdinaḥ saptadaśena kḷptastrayastriṃśena savanaṃ tṛtīyam

