8 shlokas
- 1
अथ माध्यंदिने पवमाने वाचयति सम्राड् असि त्रिष्टुप्छन्दाः
अनु त्वारभे
स्वस्ति मा संपारयेति
atha mādhyaṃdine pavamāne vācayati samrāḍ asi triṣṭupchandāḥ
anu tvārabhe
svasti mā saṃpārayeti
- 2
स यद् आह सम्राड् असीति सोमं वा एतद् आह
sa yad āha samrāḍ asīti somaṃ vā etad āha
- 3
एष ह वै वायुर्भूत्वान्तरिक्षलोके संराजति
eṣa ha vai vāyurbhūtvāntarikṣaloke saṃrājati
- 4
तद्यत्संराजति तस्मात्सम्राट्
tadyatsaṃrājati tasmātsamrāṭ
- 5
तत्संराजस्य सम्राट्त्वम्
tatsaṃrājasya samrāṭtvam
- 6
स यद् आह त्रिष्टुप्छन्दा अनु त्वारभ इति त्रैष्टुभेन छन्दसा रुद्रैर्देवैर्माध्यंदिने सवने ऽन्तरिक्षलोके वायुं सन्तम् अन्वारभते
sa yad āha triṣṭupchandā anu tvārabha iti traiṣṭubhena chandasā rudrairdevairmādhyaṃdine savane 'ntarikṣaloke vāyuṃ santam anvārabhate
- 7
स यद् आह स्वस्ति मा संपारयेति त्रैष्टुभेनैव छन्दसा रुद्रैर्देवैर्माध्यंदिने सवने अन्तरिक्षलोके वायुना देवेन स्वस्ति मा संपारयेति
sa yad āha svasti mā saṃpārayeti traiṣṭubhenaiva chandasā rudrairdevairmādhyaṃdine savane antarikṣaloke vāyunā devena svasti mā saṃpārayeti
- 8
त्रैष्टुभेनैवैनं तच्छन्दसा रुद्रैर्देवैर्माध्यंदिने सवने अन्तरिक्षलोके वायुना देवेन स्वस्ति सम्पद्यते य एवं वेद
traiṣṭubhenaivainaṃ tacchandasā rudrairdevairmādhyaṃdine savane antarikṣaloke vāyunā devena svasti sampadyate ya evaṃ veda

