16 shlokas
- 1
श्रद्धायां रेतस्तपसा तपस्वी वैश्वानरः सिषिचे ऽपत्यम् ईप्सन्
ततो जज्ञे लोकजित्सोमजम्भा ऋषेर् ऋषिर् अङ्गिराः संबभूव
śraddhāyāṃ retastapasā tapasvī vaiśvānaraḥ siṣice 'patyam īpsan
tato jajñe lokajitsomajambhā ṛṣer ṛṣir aṅgirāḥ saṃbabhūva
- 2
ऋषेर्यज्ञस्य चतुर्विधस्य श्रद्धां यः श्रेयसीं लोकम् अमुं जिगाय
यस्मै वेदाः प्रसृताः सोमबिन्दुयुक्ता वहन्ति सुकृताम् उ लोकम्
ṛṣeryajñasya caturvidhasya śraddhāṃ yaḥ śreyasīṃ lokam amuṃ jigāya
yasmai vedāḥ prasṛtāḥ somabinduyuktā vahanti sukṛtām u lokam
- 3
ऋचो ऽस्य भागांश्चतुरो वहन्त्य् उक्थशस्त्रैः प्रमुदो मोदमानाः
ग्रहैर्हविर्भिश्च कृताकृतश्च यजूंषि भागांश्चतुरो वहन्ति
ṛco 'sya bhāgāṃścaturo vahanty ukthaśastraiḥ pramudo modamānāḥ
grahairhavirbhiśca kṛtākṛtaśca yajūṃṣi bhāgāṃścaturo vahanti
- 4
औदुम्बर्यां सामघोषेण तावत्सविष्टुतिभिश्च स्तोमैः छन्दसा
सामानि भागांश्चतुरो वहन्ति गीत्या स्तोमेन सह प्रस्तावेन च
audumbaryāṃ sāmaghoṣeṇa tāvatsaviṣṭutibhiśca stomaiḥ chandasā
sāmāni bhāgāṃścaturo vahanti gītyā stomena saha prastāvena ca
- 5
प्रायश्चित्तैर्भेषजैः संस्तुवन्तो ऽथर्वाणो ऽङ्गिरसश्च शान्ताः
ब्रह्मा ब्रह्मत्वेन प्रमुदो मोदमाना असंसृष्टान्भागांश्चतुरो वहन्ति
prāyaścittairbheṣajaiḥ saṃstuvanto 'tharvāṇo 'ṅgirasaśca śāntāḥ
brahmā brahmatvena pramudo modamānā asaṃsṛṣṭānbhāgāṃścaturo vahanti
- 6
यो ब्रह्मवित्सो ऽभिकरो ऽस्तु वः शिवो धिया धीरो रक्षतु धर्मम् एतम्
मा वः प्रमत्ताम् अमृताच्च यज्ञात्कर्माच्च येनानङ्गिरसो ऽपियासीत्
yo brahmavitso 'bhikaro 'stu vaḥ śivo dhiyā dhīro rakṣatu dharmam etam
mā vaḥ pramattām amṛtācca yajñātkarmācca yenānaṅgiraso 'piyāsīt
- 7
मायुं दशं मारुशस्ताः प्रमेष्टा मा मे भूर्युक्ता विदहाथ लोकान्
दिव्यं भयं रक्षत धर्मम् उद्यतं यज्ञं कालाश स्तुतिगोपनायनम्
māyuṃ daśaṃ māruśastāḥ prameṣṭā mā me bhūryuktā vidahātha lokān
divyaṃ bhayaṃ rakṣata dharmam udyataṃ yajñaṃ kālāśa stutigopanāyanam
- 8
होता च मैत्रावरुणश्च पादम् अच्छावाकः सह ग्रावस्तुतैकम्
ऋग्भि स्तुवन्तो ऽहरहः पृथिव्या अग्निं पादं ब्रह्मणा धारयन्ति
hotā ca maitrāvaruṇaśca pādam acchāvākaḥ saha grāvastutaikam
ṛgbhi stuvanto 'harahaḥ pṛthivyā agniṃ pādaṃ brahmaṇā dhārayanti
- 9
अध्वर्युः प्रतिप्रस्थाता नेष्टोन्नेता निहितं पादम् एकम्
सम् अन्तरिक्षं यजुषा स्तुवन्तो वायुं पादं ब्रह्मणा धारयन्ति
adhvaryuḥ pratiprasthātā neṣṭonnetā nihitaṃ pādam ekam
sam antarikṣaṃ yajuṣā stuvanto vāyuṃ pādaṃ brahmaṇā dhārayanti
- 10
साम्नोद्गाता छादयन्न् अप्रमत्त औदुम्बर्यां स्तोभदेयः सगद्गदः
विद्वान्प्रस्तोता विदहाथ सुष्टुतिं सुब्रह्मण्यः प्रतिहर्ताथ यज्ञे
sāmnodgātā chādayann apramatta audumbaryāṃ stobhadeyaḥ sagadgadaḥ
vidvānprastotā vidahātha suṣṭutiṃ subrahmaṇyaḥ pratihartātha yajñe
- 11
साम्ना दिव्य् एकं निहितं स्तुवन्तः सूर्यं पादं ब्रह्मणा धारयन्ति
ब्रह्मा हैकं ब्राह्मणाच्छंसिनः सह पोताग्नीध्रो निहितं पादम् एकम्
sāmnā divy ekaṃ nihitaṃ stuvantaḥ sūryaṃ pādaṃ brahmaṇā dhārayanti
brahmā haikaṃ brāhmaṇācchaṃsinaḥ saha potāgnīdhro nihitaṃ pādam ekam
- 12
अथर्वभिर् अङ्गिरोभिश्च गुप्तो ऽप्सु चन्द्रं पादं ब्रह्मणा धारयन्ति
षोडशिकं होत्रका अभिष्टुवन्ति वेदेषु युक्ताः प्रपृथक्चतुर्धा
atharvabhir aṅgirobhiśca gupto 'psu candraṃ pādaṃ brahmaṇā dhārayanti
ṣoḍaśikaṃ hotrakā abhiṣṭuvanti vedeṣu yuktāḥ prapṛthakcaturdhā
- 13
मनीषिणो दीक्षिताः श्रद्दधाना होतारो गुप्ता अभिवहन्ति यज्ञम्
दक्षिणतो ब्रह्मणस्यों जनद् इत्य् एतां व्याहृतिं जपन्
manīṣiṇo dīkṣitāḥ śraddadhānā hotāro guptā abhivahanti yajñam
dakṣiṇato brahmaṇasyoṃ janad ity etāṃ vyāhṛtiṃ japan
- 14
सप्तदशं सदस्यं तं कीर्तयन्ति पुरा विदुः
अष्टादशी दीक्षिता दीक्षितानां यज्ञे पत्नी श्रद्दधानेह युक्ता
saptadaśaṃ sadasyaṃ taṃ kīrtayanti purā viduḥ
aṣṭādaśī dīkṣitā dīkṣitānāṃ yajñe patnī śraddadhāneha yuktā
- 15
एकोनविंशः शमिता बभूव विंशो यज्ञे गृहपतिर् एव सुन्वन्
एकविंशतिर् एवैषां संस्थायाम् अङ्गिरो वह
ekonaviṃśaḥ śamitā babhūva viṃśo yajñe gṛhapatir eva sunvan
ekaviṃśatir evaiṣāṃ saṃsthāyām aṅgiro vaha
- 16
वेदैर् अभिष्टुतो लोको नानावेशापराजितः
vedair abhiṣṭuto loko nānāveśāparājitaḥ

