6 shlokas
- 1
देवा वै यद् एव यज्ञे ऽकुर्वंस्तद् असुरा अकुर्वन्
ते समावद्वीर्या एवासन्न व्यावर्तन्त
ततो वै देवा एतं तूष्णींशंसम् अपश्यन्
तम् एषाम् असुरा नान्ववायन्
तूष्णींसारो वा एष यत्तूष्णींशंसः
devā vai yad eva yajñe 'kurvaṃstad asurā akurvan
te samāvadvīryā evāsanna vyāvartanta
tato vai devā etaṃ tūṣṇīṃśaṃsam apaśyan
tam eṣām asurā nānvavāyan
tūṣṇīṃsāro vā eṣa yattūṣṇīṃśaṃsaḥ
- 2
देवा वै यं यम् एव वज्रम् असुरेभ्य उदयच्छंस्तं तम् एषाम् असुराः प्रत्यबुध्यन्त
ततो वै देवा एतं तूष्णींशंसं वज्रम् अपश्यन्
तम् एभ्य उदयच्छन्
तम् एषाम् असुरा न प्रत्यबुध्यन्त
तम् एभ्यः प्राहरन्
तेनैनान् अप्रतिबुद्धेनाघ्नन्
ततो वै देवा अभवन्परासुराः
devā vai yaṃ yam eva vajram asurebhya udayacchaṃstaṃ tam eṣām asurāḥ pratyabudhyanta
tato vai devā etaṃ tūṣṇīṃśaṃsaṃ vajram apaśyan
tam ebhya udayacchan
tam eṣām asurā na pratyabudhyanta
tam ebhyaḥ prāharan
tenainān apratibuddhenāghnan
tato vai devā abhavanparāsurāḥ
- 3
भवत्य् आत्मना परास्य द्विषन्पाप्मा भ्रातृव्यो भवति य एवं वेद
bhavaty ātmanā parāsya dviṣanpāpmā bhrātṛvyo bhavati ya evaṃ veda
- 4
ते वै देवा विजितिनो मन्यमाना यज्ञम् अतन्वत
तम् एषाम् असुरा अभ्यायन्यज्ञवेशसम् एषां करिष्याम इति
तान्समन्तम् एवोदारान्परियत्तान् उदपश्यन्
ते ऽब्रुवन्संस्थापयामेमं यज्ञम्
यज्ञं नो ऽसुरा मा वधिषुर् इति
तथेति
तं तूष्णींशंसे संस्थापयन्
भूर् अग्निर्ज्योतिर्ज्योतिर् अग्निर् इत्य् आज्यप्रौगे संस्थापयन्
इन्द्रो ज्योतिर्भुवो ज्योतिर् इन्द्र इति निष्केवल्यमरुत्वतीये संस्थापयन्
सूर्यो ज्योतिर्ज्योतिः स्वः सूर्य इति वैश्वदेवाग्निमारुते संस्थापयन्
तम् एवं तूष्णींशंसे संस्थापयन्
तम् एवं तूष्णींशंसे संस्थाप्य तेनारिष्टेनोदृचम् आश्नुवत
te vai devā vijitino manyamānā yajñam atanvata
tam eṣām asurā abhyāyanyajñaveśasam eṣāṃ kariṣyāma iti
tānsamantam evodārānpariyattān udapaśyan
te 'bruvansaṃsthāpayāmemaṃ yajñam
yajñaṃ no 'surā mā vadhiṣur iti
tatheti
taṃ tūṣṇīṃśaṃse saṃsthāpayan
bhūr agnirjyotirjyotir agnir ity ājyaprauge saṃsthāpayan
indro jyotirbhuvo jyotir indra iti niṣkevalyamarutvatīye saṃsthāpayan
sūryo jyotirjyotiḥ svaḥ sūrya iti vaiśvadevāgnimārute saṃsthāpayan
tam evaṃ tūṣṇīṃśaṃse saṃsthāpayan
tam evaṃ tūṣṇīṃśaṃse saṃsthāpya tenāriṣṭenodṛcam āśnuvata
- 5
स तदा वाव यज्ञः संतिष्ठते यदा होता तूष्णींशंसं शंसति
sa tadā vāva yajñaḥ saṃtiṣṭhate yadā hotā tūṣṇīṃśaṃsaṃ śaṃsati
- 6
स य एनं शस्ते तूष्णींशंस उप वा वदेद् अनु वा व्याहरेत्तम्ब्रूयाद् एष एवैताम् आर्तिम् आरिष्यति
प्रातर्वाव वयम् अद्येमं शस्ते तूष्णींशंसे संस्थापयामस्तम्
यथा गृहान् इतं कर्मणानुसमियाद् एवम् एवैनम् इदम् अनुसमिम इति
सो ह वाव ताम् आर्तिम् ऋच्छति य एवं विद्वान्संशस्ते तूष्णींशंस उप वा वदत्य् अनु वा व्याहरति
तस्माद् एवं विद्वान्संशस्ते तूष्णींशंसे नोपवदेन्नानुव्याहरेत्
sa ya enaṃ śaste tūṣṇīṃśaṃsa upa vā vaded anu vā vyāharettambrūyād eṣa evaitām ārtim āriṣyati
prātarvāva vayam adyemaṃ śaste tūṣṇīṃśaṃse saṃsthāpayāmastam
yathā gṛhān itaṃ karmaṇānusamiyād evam evainam idam anusamima iti
so ha vāva tām ārtim ṛcchati ya evaṃ vidvānsaṃśaste tūṣṇīṃśaṃsa upa vā vadaty anu vā vyāharati
tasmād evaṃ vidvānsaṃśaste tūṣṇīṃśaṃse nopavadennānuvyāharet

