6 shlokas
- 1
देवासुरा वा एषु लोकेषु समयतन्त
ते वै देवाः सद एवायतनम् अकुर्वत
तान्सदसो ऽजयन्
त आग्नीध्रं सम्प्रापद्यन्त
ते ततो न पराजयन्त
तस्माद् आग्नीध्र उपवसन्ति न सदसि
आग्नीध्रे ह्य् अधारयन्त
यद् आग्नीध्रे ऽधारयन्त तद् आग्नीध्रस्याग्नीध्रत्वम्
devāsurā vā eṣu lokeṣu samayatanta
te vai devāḥ sada evāyatanam akurvata
tānsadaso 'jayan
ta āgnīdhraṃ samprāpadyanta
te tato na parājayanta
tasmād āgnīdhra upavasanti na sadasi
āgnīdhre hy adhārayanta
yad āgnīdhre 'dhārayanta tad āgnīdhrasyāgnīdhratvam
- 2
तेषां वै देवानाम् असुराः सदस्यान् अग्नीन्निर्वापयांचक्रुः
ते देवा आग्नीध्राद् एव सदस्यान् अग्नीन्विहरन्त
तैर् असुररक्षांस्य् अपाघ्नत
तथैवैतद्यजमाना आग्नीध्राद् एव सदस्यान् अग्नीन्विहरन्ति
असुररक्षांस्य् एव तद् अपघ्नते
teṣāṃ vai devānām asurāḥ sadasyān agnīnnirvāpayāṃcakruḥ
te devā āgnīdhrād eva sadasyān agnīnviharanta
tair asurarakṣāṃsy apāghnata
tathaivaitadyajamānā āgnīdhrād eva sadasyān agnīnviharanti
asurarakṣāṃsy eva tad apaghnate
- 3
ते वै प्रातर् आज्यैर् एवाजयन्त आयन्
यद् आज्यैर् एवाजयन्त आयंस्तद् आज्यानाम् आज्यत्वम्
te vai prātar ājyair evājayanta āyan
yad ājyair evājayanta āyaṃstad ājyānām ājyatvam
- 4
तासां वै होत्राणाम् आयतीनाम् आजयन्तीनाम् अछावाकीयाहीयत
तस्याम् इन्द्राग्नी अध्यास्ताम्
इन्द्राग्नी वै देवानाम् ओजिष्ठौ बलिष्ठौ सहिष्ठौ सत्तमौ पारयिष्णुतमौ
तस्माद् ऐन्द्राग्नम् अछावाकः प्रातःसवने शंसति
इन्द्राग्नी हि तस्याम् अध्यास्ताम्
tāsāṃ vai hotrāṇām āyatīnām ājayantīnām achāvākīyāhīyata
tasyām indrāgnī adhyāstām
indrāgnī vai devānām ojiṣṭhau baliṣṭhau sahiṣṭhau sattamau pārayiṣṇutamau
tasmād aindrāgnam achāvākaḥ prātaḥsavane śaṃsati
indrāgnī hi tasyām adhyāstām
- 5
तस्माद् उ पुरस्ताद् अन्ये होत्रकाः सदः प्रसर्पन्ति पश्चाछावाकः
पश्चेव हि हीनो ऽनुसंजिगमिषति
tasmād u purastād anye hotrakāḥ sadaḥ prasarpanti paścāchāvākaḥ
paśceva hi hīno 'nusaṃjigamiṣati
- 6
तस्माद्यो ब्राह्मणो बह्वृचो वीर्यवान्स्यात्सो ऽस्याछावाकीयां कुर्यात्
तेनैव साहीना भवति
tasmādyo brāhmaṇo bahvṛco vīryavānsyātso 'syāchāvākīyāṃ kuryāt
tenaiva sāhīnā bhavati

