11 shlokas
- 1
षट्पदं तूष्णींशंसं शंसति
षड्वा ऋतवः
ऋतून् एव तत्कल्पयति
ऋतून् अप्येति
ṣaṭpadaṃ tūṣṇīṃśaṃsaṃ śaṃsati
ṣaḍvā ṛtavaḥ
ṛtūn eva tatkalpayati
ṛtūn apyeti
- 2
द्वादशपदाम्पुरोरुचं शंसति
द्वादश वै मासाः
मासान् एव तत्कल्पयति
मासान् अप्येति
dvādaśapadāmpurorucaṃ śaṃsati
dvādaśa vai māsāḥ
māsān eva tatkalpayati
māsān apyeti
- 3
प्र वो देवायाग्नय इति शंसति
अन्तरिक्षं वै प्र
अन्तरिक्षं हीमानि सर्वाणि भूतान्य् अनुप्रयन्ति
अन्तरिक्षम् एव तत्कल्पयति
अन्तरिक्षमप्येति
pra vo devāyāgnaya iti śaṃsati
antarikṣaṃ vai pra
antarikṣaṃ hīmāni sarvāṇi bhūtāny anuprayanti
antarikṣam eva tatkalpayati
antarikṣamapyeti
- 4
दीदिवांसम् अपूर्व्यम् इति शंसति
असौ वै दीदाय यो ऽसौ तपति
एतस्माद्धि न किंचन पूर्वम् अस्ति
एतम् एव तत्कल्पयति
एतम् अप्येति
dīdivāṃsam apūrvyam iti śaṃsati
asau vai dīdāya yo 'sau tapati
etasmāddhi na kiṃcana pūrvam asti
etam eva tatkalpayati
etam apyeti
- 5
स नः शर्माणि वीतय इति शंसति
अग्निर्वै शर्मान्य् अन्नाद्यानि यच्छति
अग्निम् एव तत्कल्पयति
अग्निम् अप्येति
sa naḥ śarmāṇi vītaya iti śaṃsati
agnirvai śarmāny annādyāni yacchati
agnim eva tatkalpayati
agnim apyeti
- 6
उत नो ब्रह्मन्न् अविष इति शंसति
चन्द्रमा वै ब्रह्म
चन्द्रमसम् एव तत्कल्पयति
चन्द्रमसम् अप्येति
uta no brahmann aviṣa iti śaṃsati
candramā vai brahma
candramasam eva tatkalpayati
candramasam apyeti
- 7
स यन्ता विप्र एषाम् इति शंसति
वायुर्वै यन्ता
वायुना हीदं यतम् अन्तरिक्षं न समृच्छति
वायुम् एव तत्कल्पयति
वायुम् अप्येति
sa yantā vipra eṣām iti śaṃsati
vāyurvai yantā
vāyunā hīdaṃ yatam antarikṣaṃ na samṛcchati
vāyum eva tatkalpayati
vāyum apyeti
- 8
ऋतावा यस्य रोदसी इति शंसति
द्यावापृथिवी वै रोदसी
द्यावापृथिवी एव तत्कल्पयति
द्यावापृथिवी अप्येति
ṛtāvā yasya rodasī iti śaṃsati
dyāvāpṛthivī vai rodasī
dyāvāpṛthivī eva tatkalpayati
dyāvāpṛthivī apyeti
- 9
नू नो रास्व सहस्रवत्तोकवत्पुष्टिमद्वस्व् इत्य् उत्तमया परिदधाति
संवत्सरो वै समस्तः सहस्रवांस्तोकवान्पुष्टिमान्
संवत्सरम् एव तत्समस्तं कल्पयति
संवत्सरं समस्तम् अप्येति
nū no rāsva sahasravattokavatpuṣṭimadvasv ity uttamayā paridadhāti
saṃvatsaro vai samastaḥ sahasravāṃstokavānpuṣṭimān
saṃvatsaram eva tatsamastaṃ kalpayati
saṃvatsaraṃ samastam apyeti
- 10
याज्यया यजति
वृष्टिर्वै याज्या विद्युद् एव
विद्युद्धीदं वृष्टिम् अन्नाद्यं सम्प्रयच्छति
विद्युतम् एव तत्कल्पयति
विद्युतम् अप्येति
yājyayā yajati
vṛṣṭirvai yājyā vidyud eva
vidyuddhīdaṃ vṛṣṭim annādyaṃ samprayacchati
vidyutam eva tatkalpayati
vidyutam apyeti
- 11
स एवं विद्वान् एतन्मयो देवतामयो भवति भवति
sa evaṃ vidvān etanmayo devatāmayo bhavati bhavati

