9 shlokas
- 1
विहाय विधृती तूष्णीं प्रस्तरं न्यस्यति
vihāya vidhṛtī tūṣṇīṃ prastaraṃ nyasyati
- 2
हविषाम् उद्वासने यथाभागमन्त्रेण धाना विभज्य पिष्ट्वार्धान्सक्तून्कृत्वा वारणपात्रे ऽभिवान्यवत्साया दुग्धम् आनीय तस्मिन्सक्तून् ओप्येक्षुशलाकामन्थेन दक्षिणेनाहवनीयं त्रिः प्रसव्यं दक्षिणामुखो ऽनारभ्योपमन्थति
haviṣām udvāsane yathābhāgamantreṇa dhānā vibhajya piṣṭvārdhānsaktūnkṛtvā vāraṇapātre 'bhivānyavatsāyā dugdham ānīya tasminsaktūn opyekṣuśalākāmanthena dakṣiṇenāhavanīyaṃ triḥ prasavyaṃ dakṣiṇāmukho 'nārabhyopamanthati
- 3
अन्वाहार्यपचनाद् एकोल्मुकम् आदायापरेण गार्हपत्यं हृत्वाग्रेणाहवनीयं पर्याहृत्यान्तर्वेदि दक्षिणेनाहवनीयं निदधाति
anvāhāryapacanād ekolmukam ādāyāpareṇa gārhapatyaṃ hṛtvāgreṇāhavanīyaṃ paryāhṛtyāntarvedi dakṣiṇenāhavanīyaṃ nidadhāti
- 4
हवींष्य् अलंकृत्याज्यानि पुरोडाशं धानाः करम्भम् इति हवींष्य् एकैकम् अनूचीनान्य् उदाहरन्ति दक्षिणतः पुरोडाशं मध्यतो धाना उत्तरतः करम्भम्
havīṃṣy alaṃkṛtyājyāni puroḍāśaṃ dhānāḥ karambham iti havīṃṣy ekaikam anūcīnāny udāharanti dakṣiṇataḥ puroḍāśaṃ madhyato dhānā uttarataḥ karambham
- 5
दक्षिणेन परिश्रयणम् आञ्जनम् अभ्यञ्जनं कशिपूपबर्हणं दशा स्फ्यम् उदकुम्भं चैकैकं स्थापयति
dakṣiṇena pariśrayaṇam āñjanam abhyañjanaṃ kaśipūpabarhaṇaṃ daśā sphyam udakumbhaṃ caikaikaṃ sthāpayati
- 6
ब्रह्मा च यजमानश्च दक्षिणतो होताध्वर्युर् आग्नीध्रश्चोत्तरतः
brahmā ca yajamānaśca dakṣiṇato hotādhvaryur āgnīdhraścottarataḥ
- 7
अध्वर्युर्वेदं निधायाग्नये देवेभ्यः पितृभ्यः समिध्यमानायानुब्रूहीति संप्रेष्यति
adhvaryurvedaṃ nidhāyāgnaye devebhyaḥ pitṛbhyaḥ samidhyamānāyānubrūhīti saṃpreṣyati
- 8
उशन्तस्त्वा हवामह इत्य् एकां सामिधेनीं होता त्रिर् अन्वाह
uśantastvā havāmaha ity ekāṃ sāmidhenīṃ hotā trir anvāha
- 9
इमम् अध्वर्युस्त्रैधं विभज्यानूयाजसमिधम् अवशिष्य प्रणवे प्रणवे त्रैधम् आदधाति
imam adhvaryustraidhaṃ vibhajyānūyājasamidham avaśiṣya praṇave praṇave traidham ādadhāti

