11 shlokas
- 1
प्र तद्विष्णुर् इति पूर्वेण द्वारेण निष्क्रामतः
pra tadviṣṇur iti pūrveṇa dvāreṇa niṣkrāmataḥ
- 2
ऊर्ध्वम् अन्यया वैष्णव्या वा
ūrdhvam anyayā vaiṣṇavyā vā
- 3
दक्षिणस्य पुरोऽक्षम् उक्तम् उपरवकर्म
dakṣiṇasya puro'kṣam uktam uparavakarma
- 4
देवस्य त्वेत्य् अभ्रिम् आदायाविर् असीत्य् अभिमन्त्र्य व्याघारवद् अक्ष्णया चतुरः प्रादेशमुखान्प्रादेशमध्यान् उपरवान्परिलिखितम् इति त्रिः परिलिख्य रक्षोहणो वलगहन इति बाहुमात्रम् उपरवान् अधस्तात्संतृण्णान् उपर्यसंभिन्नान्खात्वा बृहन्न् असीत्य् अभ्रिं निदधाति
devasya tvety abhrim ādāyāvir asīty abhimantrya vyāghāravad akṣṇayā caturaḥ prādeśamukhānprādeśamadhyān uparavānparilikhitam iti triḥ parilikhya rakṣohaṇo valagahana iti bāhumātram uparavān adhastātsaṃtṛṇṇān uparyasaṃbhinnānkhātvā bṛhann asīty abhriṃ nidadhāti
- 5
एषां पुरीषम् उदुप्य दक्षिणस्यानसः पूर्वेणोपस्तम्भनं तेन खरं चतुरश्रं करोति यावद् अलं सोमपात्रेभ्यः
eṣāṃ purīṣam udupya dakṣiṇasyānasaḥ pūrveṇopastambhanaṃ tena kharaṃ caturaśraṃ karoti yāvad alaṃ somapātrebhyaḥ
- 6
पुरस्तात्संचरं शिनष्टि
purastātsaṃcaraṃ śinaṣṭi
- 7
रक्षोहणो वलगहनो वैष्णवान्खनामीति पुनर् अभ्रिया खात्वा विराड् असि सपत्नहेति पूर्वयोर्दक्षिणस्मिन्न् उपरवे बाहुम् उपावहृत्येदम् अहं तं वलगम् उद्वपामीति पांसून् आदायेदम् एनम् अधरं करोमि यो नः समानो यो ऽसमानो ऽरातीयतीति तद्बिले ऽवबाध्य निरस्तो वलग इति हृत्वा गायत्रेण छन्दसावबाढो वलग इति यजमानस्याधस्पदं तान्पांसून्निवपति
rakṣohaṇo valagahano vaiṣṇavānkhanāmīti punar abhriyā khātvā virāḍ asi sapatnaheti pūrvayordakṣiṇasminn uparave bāhum upāvahṛtyedam ahaṃ taṃ valagam udvapāmīti pāṃsūn ādāyedam enam adharaṃ karomi yo naḥ samāno yo 'samāno 'rātīyatīti tadbile 'vabādhya nirasto valaga iti hṛtvā gāyatreṇa chandasāvabāḍho valaga iti yajamānasyādhaspadaṃ tānpāṃsūnnivapati
- 8
सम्राड् असि भ्रातृव्यहेत्य् अपरयोर् उत्तरस्मिन्बाहुम् उपावहृत्य पूर्ववद् आदानबाधनहरणानि
samrāḍ asi bhrātṛvyahety aparayor uttarasminbāhum upāvahṛtya pūrvavad ādānabādhanaharaṇāni
- 9
त्रैष्टुभेन छन्दसावबाढो वलग इति तथा निवपति
traiṣṭubhena chandasāvabāḍho valaga iti tathā nivapati
- 10
अपरयोर्दक्षिणस्मिन्स्वराड् अस्य् अभिमातिहेति बाहुम् उपावहृत्य तथादानावबाधनहरणानि
aparayordakṣiṇasminsvarāḍ asy abhimātiheti bāhum upāvahṛtya tathādānāvabādhanaharaṇāni
- 11
जागतेन छन्दसावबाढो वलग इति तथा निवपति
jāgatena chandasāvabāḍho valaga iti tathā nivapati

