21 shlokas
- 1
अपरेणाहवनीयं त्रिषु प्रक्रमेष्व् अत्र रमेथाम् इति नभ्यस्थे हविर्धाने स्थापयित्वाभिमन्त्रयतः
apareṇāhavanīyaṃ triṣu prakrameṣv atra ramethām iti nabhyasthe havirdhāne sthāpayitvābhimantrayataḥ
- 2
यावदर्थम् एतयोर् अन्तरालम्
yāvadartham etayor antarālam
- 3
वैष्णवम् असि विष्णुस्त्वोत्तभ्नात्व् इति तयोश्चुबुके उत्तम्भयतः
vaiṣṇavam asi viṣṇustvottabhnātv iti tayoścubuke uttambhayataḥ
- 4
दिवो वा विष्णव् इत्य् आशीर्पदयर्चा दक्षिणस्य हविर्धानस्य मेथीं निहन्ति दक्षिणं तूष्णीम् उत्तरं च
divo vā viṣṇav ity āśīrpadayarcā dakṣiṇasya havirdhānasya methīṃ nihanti dakṣiṇaṃ tūṣṇīm uttaraṃ ca
- 5
विष्णोर्नु कम् इति तथोत्तरस्य
viṣṇornu kam iti tathottarasya
- 6
विष्णोर्ध्रुवम् असीति स्पन्द्यया मेथिष्व् एते निबध्नीतो विष्णोर्ध्रुवो ऽसीति ग्रन्थिं कुरुतः
viṣṇordhruvam asīti spandyayā methiṣv ete nibadhnīto viṣṇordhruvo 'sīti granthiṃ kurutaḥ
- 7
तौ सुरक्षितौ बद्ध्वोर्ध्वाः शम्याः समुत्कृष्योपरि धारयतः
tau surakṣitau baddhvordhvāḥ śamyāḥ samutkṛṣyopari dhārayataḥ
- 8
दक्षिणस्य हविर्धानस्य प्राञ्चम् अरत्निं मीत्वा महो वा विष्णव् इति प्राचीनकर्णास्तिस्र उदगपवर्गाः स्थूणाः स्थापयति
dakṣiṇasya havirdhānasya prāñcam aratniṃ mītvā maho vā viṣṇav iti prācīnakarṇāstisra udagapavargāḥ sthūṇāḥ sthāpayati
- 9
एवम् उत्तरस्य प्रतिप्रस्थाता
evam uttarasya pratiprasthātā
- 10
एवम् अपराः षट्स्थूणाः स्थापयतः
evam aparāḥ ṣaṭsthūṇāḥ sthāpayataḥ
- 11
तासूदञ्चौ वंशौ प्रोहतः प्राचश्च
tāsūdañcau vaṃśau prohataḥ prācaśca
- 12
विष्णो रराटम् असीति पुरस्ताद्रराटं वंशे बध्नीतः
viṣṇo rarāṭam asīti purastādrarāṭaṃ vaṃśe badhnītaḥ
- 13
तथा परितः
tathā paritaḥ
- 14
विष्णोः पृष्ठम् असीति त्र्यरत्निविस्तारं नवायामं मध्यमं छदिः प्राञ्चम् उदञ्चं वा निधाय विष्णो श्नप्त्रे स्थ इति तद् अभितश्छदिषी च
viṣṇoḥ pṛṣṭham asīti tryaratnivistāraṃ navāyāmaṃ madhyamaṃ chadiḥ prāñcam udañcaṃ vā nidhāya viṣṇo śnaptre stha iti tad abhitaśchadiṣī ca
- 15
परि त्वा गिर्वण इति सर्वतः परिश्रयति
pari tvā girvaṇa iti sarvataḥ pariśrayati
- 16
पृष्ठ्याम् अभितः पूर्वम् अपरं च द्वारे कुरुतः
pṛṣṭhyām abhitaḥ pūrvam aparaṃ ca dvāre kurutaḥ
- 17
विष्णोः स्यूर् असीति दर्भैर्द्वारस्थूणे वेष्टयतः
viṣṇoḥ syūr asīti darbhairdvārasthūṇe veṣṭayataḥ
- 18
विष्णोर्ध्रुवो ऽसीति ग्रन्थी कुरुतः
viṣṇordhruvo 'sīti granthī kurutaḥ
- 19
तौ सुरक्षितौ
tau surakṣitau
- 20
एवम् अपरे द्वारस्थूणे
evam apare dvārasthūṇe
- 21
प्रागुन्नतं पश्चादवनतम् एतद्वैष्णवम् असि विष्णवे त्वेत्य् अभिमृशतः
prāgunnataṃ paścādavanatam etadvaiṣṇavam asi viṣṇave tvety abhimṛśataḥ

